ليه نحن نحل مشاكلنا من المانحين

بقلم د ماجدة مصطفى صادق

اتعلمنا درس انه بلدنا عمرها ما خذلتنا ونحن مفروض مانخذلها ابدا

اتعلمنا خلال فترة الكورونا وتأجيل مؤتمر المانحين انو ليه اصلا نحن نحل مشاكلنا من المانحين

وليه دايما نتنظر الاغاثات ونلجأ للقروض والاقتراض الخارجى رغم انو العالم كلو محتاج لى بعض وانو حركة رؤوس الاموال والديون الخارجية هى ديدن الاقتصاد العالمى

وانه نحنا
مفروض نشجع الانتاج والصناعة

حسي مالو بلدنا ما انهارت زى باقى الدول
ماهو مقفولين وقمحنا ماشي وخضارنا ولحمتنا وبى لبنا وحتى علاجنا البلدى قاعد وكل يوم بنشرب فى العصاير الطبيعية وفى القنقليز والكركدى وبناكل فى سلطاتنا

خلال فترة قاعدين فى بيوتنا الحمد لله مافى شيء انعدم ولا نقص مما يعنى ان هناك اخطاء فى احصائياتنا بتاعة السكان والموارد وان هناك مافيا عايزة تستورد وبس وعايزة تضيع دولارنا فى الفارغة
بلدنا للاسف ملانة متاجر وكلها تجار وسماسرة وتجار الشنطة نص الشعب وكلها وارادت استهلاكية نحن ممكن ننتج احسن منها

خلال فترة العزل المنزلى ماضاع مننا شيء بالعكس اتعلمنا درس انو بلدنا عمرها ما خذلتنا ونحن مفروض مانخذلها

حتى مجال الصحة وزير الصحة ولجنة الطؤارى حتى اليوم احتووا الامر تماما وعدد الحالات متزايد ببطء واضح مما يعنى انو الاجراءات بتاعة اغلاق البلد تماما ادت نتيجة ايجابية
طيب ومالو لو طبقنا الكلام دة فى اقتصادنا قفل البلد تماما لمدة سنة كاملة مادايرين استيراد عايزين تصدير فقط وعايزين نشجع الانتاج المحلى والصناعات التحويلية عايزين نحقق الاكتفاء الذاتى ونقضى على فجوة الطلب على الاقل فى المنتجات الغذائية

ولازم نقتنع كشعب وكدولة انو
نحن ما محتاجين لاى دولة تانية

محتاجين بس نثق فى انو بلدنا غنيانة بقوة مواردها

د ماجدة مصطفى صادق