الكنداكات وذكري 6/أبريل (سناء محمد سليمان ) / أماني محمد صالح
- قبل سنة من الليلة ضربت لياAmna Khalid تلفون بتسال عن بكرة كيف.. المهم في النهاية اتفقنا نمشي مع بعض. لاننا الاتتين شخصيات قلقات (بعض) الشئ وصلنا الخرطوم بدري.. بصراحة هي كانت شجاعة طول الوقت وانا لا(انا زولة خووووووافة جد?) المهم حمنا في شوارع الخرطوم شئ مقفل وشئ ممنوع وعيادة قعدنا فيها دقائق ومنها قعدنا في مسطبة في شارع الحوادث.. في الاول الشارع بقي ليا فاضي. الوقت مر وانا حماس علي قلق علي ترقب.. لمن الساعة بقت واحدة طق طرق صوت زغردوة اقوي منها مافي جاءت من الno where.. اكيد ما ح في كلام يناسب الشعور بالقوة والفرح والحماس لحظتها.. وكان الارض طلعت من ناس.. بشر من كل مكان.. يا ربي لمن وصلنا شارع السيد عبدالرحمن كمية الكجر والبنبان الفكو فينا وكانه معاه نار دخلوها في حلقومنا? ما بعرف لقيت روحي في جنب مستشفي جعفر ابن عوف وانا اصلا عندي ازمة. نفسي اتكتم وقلت دا الموت.. امنة جاءبت ليا صفق نيم وموية غسلت ليا بيها عيوني.. قلت ليها انا راجعة بيتنا اموت فيهو وهي كانت في منتهي الشجاعة وقررت تواصل.. قلت ليها امشي يا بت الناس انا نفسي يهدى شوية وراجعة طوالي رفضت وقالت ح تقعد معايا لمن تطمئن اني بقيت كويسة وح ارجع خلاص.. عطلتها قريب الربع ساعة وفجاءة غيرت راي ليه احرم روحي من يوم قد لا يتكرر في حياتي.. اتنفضت ومسكنا يدين بعض شئ جري شئ عطيس ووووو. بعد اقل من عشرة دقائق لقيت روحي بحضن في امنة والاتنين نبكي في وسط القيادة… ما ح اعرف اوصف الشعور الجاءني وقتها بكاء علي فرح علي انهيار علي عدم تصديق.. بعدها اليوم واصل بي شوية تصرفات من ناس كانهم ما بشر ملائكة في نصنا… لقيت بت شابة صغيرونة بتغسل في وشي.. ولد عفصني رجع في لحظتها بعتذر ليا بكل تهذيب الدنيا.. فجاءة اصوات ناس بتكبر وناس بتصرخ وناس تحضن بعضها بلا معرفة مسبقة غير اننا سودانين تعبو من ظلم وفساد… اناشيد تبكي وتنطق الحجر… المهم.. شكرا ياامنة❤️… اما يوم30يونيو داك يوم تاني برضو
المزيد من المشاركات
