5 ابريل 2019 عنبر النخلة – كوبر عسكري الامن : غازي الريح

5 ابريل 2019
عنبر النخلة – كوبر
عسكري الامن : غازي الريح.
– نعم
– ارح زيارة.
شوية وصايا من الشباب و كم نمرة تلفون سريعات كدا عشان ناس بيتنا يطمنوا اهل المعتقلين او لوصاية يرسلوها ليهم و طيران على الزيارة و في مليون سؤال في الراس، و لاقيت الحاج و الحجة و ريما و عماد و غنماياتهم سلمى و سهام و اواب و بعد السلامات و الإطمئنان دخلنا في الموضوع?
– إنتوا الحاصل شنو برة و ليه الحِراك ميت في العشرة ايام الاخيرة دي ؟؟
– لا لا ما ميت لكن الناس بتجهز ل 6 ابريل و بتحشد ليها و الناس شغالة مخاطبات في المواصلات،الاسواق و توزيع قصاصات في اي حتة و اي مكان.
– بالله و نحن قلنا في حاجة غلط حاصلة.
– لا لا بكرة الناس دي كلها طالعة و ماشة القيادة العامة.
– خايفين لكن اولاد الكلب لانه الإعتقالات زادت الايام دي بعد ما هدأت كل يوم بجيبو ناس زيادة و جرائدهم فيها جرسة تقيلة.
المهم ريما ادتني الزيت كله و رجعت مليان اخبار و شيكولاتة جابها اواب معاهو ? و قعدت زي التلفزيون في نص العنبر بحكي عن الحاصل برة و الشمارات بالتفصيل المُمِل و اعيد و اكرر و بنحلل في الاخبار و ضربنا العضة الجابوها ناس البيت بمزاج و كلنا حماس ليوم 6 ابريل الاصلاً نحن مُقررين نحتفل بيهو و عاملين برنامج إحتفالي فيهو كلمات و شعر و غناء و مسابقة و كلمنا بقية العنابر و الزنازين بالإحتفال، و طلب عمار يوسف (لجنة المعلمين) بالتحديد أنه ما يكون في هُتاف و ثنى على مقترحه صالح محمود (اللجنة المركزية للحزب الشيوعي) عشان ما يكون مصير العنبر زي ناس الزاوية المسكوهم جلدوهم لما هتفوا و نقلوا جزء منهم لدبك و طبعاً انا كان رأيي مُخالِف و أنه نحن ما رهائن نحن مُعتقلين سياسيين ما سكتنا برة الحيسكتنا جوة شنو ؟؟ و الناس البرة طالعة دي حتواجه نفس الحنواجهه فرقها مننا شنو ؟؟ و طبعاً حاولوا بكل الطُرق كالعادة تمييع الموضوع إلا إتفقنا انا و إبراهيم البعثي و عمر بُري و محمد ود القضارف إننا نهتِف و ما نشتغل بيهم ?
يوم 6 الصباح صحينا كلنا متوترين و مُقلقين و منتظرين الاخبار و ما أظِن فينا زول نام كويس و كل زول براحع سيناريو مُختلِف في راسه، لحدي ما جات الساعة واحدة و سمنا صوت مُظاهرة قدام السجِن و الناس جوة العنبر بتتغالط و بقول ليهم دا صوت الهتاف و بقولوا لي بتتخيل ??? فقفلت المُكيفات و حبسنا انفاسنا 23 زول في العنبر و سمعنا الهِتاف بكل وضوح و في اللحظة ديك بكل حماس الدُنيا هتفت :
حُرية سلام و عدالة .. الثورة خيار الشعب
و رددوا معاي إبراهيم و عمر و محمد لحدي المرة التالتة و بدوا زول زول جوة العنبر يهتف و إنتقل لعنبر الزاوية الفيهو اولاد بُري و فكي علي و بعدها جميع العنابر و الزنازين ثم جانا الهتاف من السجن جوة ? كُل المساجين رددوا معانا!!
هتاف ..بُكاء .. معانقة
و غردنا و نحن في أسرهم و رجفوا هم ✌?
وإحتفلت كل العنابر و الزنازين بالذكرى و نحن عملنا إحتفالنا و غنينا و رقصنا و هتفنا و وزعنا الشيكولاتة بتاعت اواب كجوائز لمسابقة 6 ابريل?

• مساجينك..مساجينك
  برغمك نحنا مازلنا
  بنكبر بي سنابلنا
  ونعشق في سلاسلنا
  ونسخر من زنازينك