حبسوني ليه ليه انا ايه جنيت

بكي بورد عمر الفاروق الشيخ

تذكرت اغنية تردي ولا ما تردي حاكتب ليك يوماتي بس المزاج هذه الايام يجعل الكتابة حين ميسرة و حاكتب بالدارجي الفصحي 

يوم في الحظر 

في الحبساية دي غايتو لغاية الان مرقت عشرة مرات لغاية اول الشارع ثم منتصفه ورجعت خط 6 قربت ابقي زي رجل الخط .. شربت خمسة كبايات شاي اكلت 7 سندوتشات …. غسلت يدي بلايف بوي 13 مرة لمدة 23 ثانية لاني ملول ما بنتظر ال 40 حتي في البكيات!!!  فتحت 6 قنوات وقفلتهم كلهم يدورون حول كورونا الملعونا ….فتحت الواتس مسحت محادثات 13 قروب …  مشيت الفيس نزلت غنية شبابية اعتقد حلوة ثم عرجت علي اليوتيوب شفت قصيدة الحلزونة يمة الحلزونة لأنها تتحدث عن الحالة الحبسية الراهنة وجاني شغل عن بعد تلخيص ماستر ما بديت فيه قلت اجيب ليه مزاج من وين حبايبي انا؟

بقت علينا قصة ود ابرق الذي طار ثم دخل من نملية الشباك المشروطة وخرج  وتاني رجع من نفس السكة  وخرج تاني ياتري ماذا استفاد؟

صاحب البيت اتصل هاتفيا يسأل عن الايجار غنيت ليه مقطع من اغنية ملامة للشفيع … “لحن الحياة منك وما تقول نسينا الماضي وناسينك” رد لي من نفس الاغنية “بس تنسي كيفنك وانت الوحيد بالذات الكنا ذاكرنك”!! قلت لي وفيم الملامة يا سيدي والكرونا حايمة انا طولت لكنك اعفيني من شهرك !! ومن بعيد لبعيد …. هناك غربتنا ما هنتنا هناك الشهر بدل واحد يبين شهرين المهم فاصل ونواصل

مر علي في مواقع التواصل شاب يغني يا نديما لعبد العزيز داؤود ياخي ده قرب منه شديد حتي شككني قلت امكن زارع الصوت في وايرلس مايك!! تذكرت احد الظرفاء وهو في احد الحافلات والسواق مدور شريط لواحد بقلد في عبد العزيز داؤود علق قائلاً

“ابو داؤود ده من ما مات صوته بقي كعب كيف”!!!

الغنا مرات سمح في خشم غير خشم سيدو ومثال لذلك “يا خاين” عند زيدان حاجة تانية و “حبيبي انا فرحان” اعاد اكتشافها ابنعوف محمد ميرغني … و “غصن الرياض” عند رمضان زايد.. هذه الاغنية فيها بيت براهو معلقة “مشكلة بين هواي وجفاك وانت محايد” يا محمد عبد الله الامي لقد فقت عمر ابن ابي ربيعة وابن اي كائن من كان من شعراء العزل!!!

وقبل ما أختم كلامي اتمني ردك يجيني “أنا والأشواق”

خليتكم عافية وخليكم بالبيت مرة مرة اعملوا رياضة قريب قريب