رمضانيات هشام صديق
- رمضانيات
،قاعد انا والحجه وفجاة نسمع ليك الكواريك ورخيت اضاني كان يجيني ليك الصوت الما بغباني . ناديت الحجه وقلت ليها تعالي اسمعي الفضائح .دي بت اختك . اسمها نسمة ولو الناس بسموهم بعد يكبرو كان سموها عاصفة .اسرع من البورش بتصل من الهدوء للكسير في ٥ ثواني. وعكسها زوجها معتز زول برااااحة بااارد وباااايخ وونستو كلها اكل .يونسك عن البامية الفروكة يقرب يبكي. لمن تفتكرو بتكلم عن خالتو.
امي قالت لي امشي شوف الجماعة ديل . قلت ليها ونحن مالنا يا حجه ؟وبعدين انتي عارفة بت اختك لا بتدورني لا بدورا. قالت لي بمسكنة شديدة انا قلت نتدخل قبل يطلقوها. لانها لو اتطلقت، حاجيبا تسكن معاي. بت اختي ويتيمة.
قبل تتم كلامها كنت في باب الجماعة . فتحت لي الباب بت خالتي ولابسة تيشيرت مكفكفة يدينو ومنكشة تشبه شمهورش ملك الجان. قلت ليها خير مالكم؟ قالت لي مافي حاجه يا مبعوث الامم المتحدة. جا زوجها وقال لي ادخل اشكي ليك قريبتك دي. قلت ليهم :قولو بسم الله يا جماعة قالت لي لو كررتها الزول ده بختفي اعمل حسابك.
قال لي تصور جبت حمام عديل كده نطت هي وقالت ليه جبتو صيد، ما من عمتك ام صلعة. وواصل عملتو لينا نتعشا بيه وسحور مرة واحدة وفجاة ناس التلفزيون قالو السنة دي شعبان ٣١ يوم . قامت صادرت الاكل وقالت لعشا بكرة وعشا الليلة سندوتشات. نطت وقالت ليه اليسمع صادرت دي يفتكرك عبد الباسط حمزة. اتلفت وقلت ليه طلقا ياخ اختي بتدقها.
المزيد من المشاركات
