رمضانيات / هشام صديق
رمضانيات
بعد الفطور معتز اتذكر فطور الشارع وعزتو لمن دمعتو جرت . ،نسمة تزبط الصينية عشان تنافس مرة محمود الثقيل وبعد يكمل الونسة برة، يدخل يشرب القهوة ومرات ياكل تاني من الاكل المخصوص. تاني وين يلقى العزة دي .قالها وهو يمسح يدينو بالكريم بعد غسل عدة الفطور المسكونة دي. في الصالون نسمة قاااعدة في الكنبة مفرورة .ذكرتو دوار ابوي العمدة في المسلسلات .وماسكة التلفون بيد والريموت بيد وتكورك لاحمد ولدها يجيب الشاي وما يكتر القرنفل.
قعد يدعو الله تنوم عشان يحضر ربحة البن وهي تقلب في القنوات وتكتب اسماء المسلسلات والزمن. يا الله تنوم ونحضر اعادة اغاني واغاني .والمسلسل شغال وتوبريني بنت عمي .في الاخر عاين لاحمد لقاه ماسك تلفونو ويتبسم . طلع تلفونو وقعد مقابل نسمة وفتح الواتس اب. قروب خور طقت. وقعد يكتب ويتبسم ولاحظ ليها بقعر عينو جات ماشة وراه دخلت المطبخ قال خلاص الغيرة حتشتغل وتخليني اشوف التلفزيون زاد البسمة والغرودة. رجعت اتفرت تاني وابتسمت وقالت لي انت بتكتب لناس السر ديل من غير نضارة مالك ؟هسه نشاذ الخبؤ دي يعرفوها ليك مساء الخير كيف؟ قفل تلفونو ودخل الاوضة وهو يطنطن الله ياذاك يا كرونا.
