الفنانه مونيكا روبرت في ضيافه صحيفه عشق البلد.. حوار مع أمجد أمين

الفنانه مونيكا روبرت في ضيافه صحيفه عشق البلد
☆كلمه قونات بتحسسني انهم كائنات فضائيه
☆لا يوجد جوع في السودان وكمال ترباس فقد للسودان
☆لا يوجد غناء هابط ولكن هناك غناء بسيط سهل الانتشار
☆علاقتي بالخندقاوي جيده بعد الانفصال ابن والدتي له كل الود
☆مع مرور الزمن ستعرفون لماذا سوف يضعونني في كتاب التاريخ
☆مسيرتي الغنائيه ناجحه وحاتنجح اكتر

*مرحب بيك يا مونيكا في صحيفه عشق البلد في البدايه عرفينا بنفسك..؟
#يامرحب بصحيفه عشق البلد وسعيده جدا للاستضافه
*بدايات مونيكا في الغناء..؟
# بداياتي كانت مرهقه جدا بحمد لله بعد اجتهاد وصبر وإصرار والحمد لله لما انا عليه
*من الداعم لك في مسيرتك الفنيه..؟
# الداعم الأساسي لي واكتر انسان كان مؤمن بي واداني القوه اختي الكبيره ربنا يخليها لي وامي الله يرحمها وبعض الاصدقاء
*هل اسرتك اعترضت على ان تصبحي فناانه.؟؟
# اكيد ابي رفض سنين طويله ولكنه لما عرف اني مصره وماشا كويس وبمارس مهنتي بكل احترام خلاني وهو راضي عني الحمد لله
*السبب وراء اختفائك من الساحه
# انا مامختفيه وبنزل اغاني وموجوده في السوشيال ميديا اكتر بس لان الفتره الاخيره جائحه كورونا وظروف البلد
*ابرز الاعمال القادمه لجماهيرك
# الأعمال القادمه كلها حاجات جديده ومميزه واتمني انها تنال اعجاب الجمهور
*ما رايك في مغادره كمال ترباس للسودان بسبب الجوع…؟
مافي جوع في البلد لكن في ظروف والظروف دي بتمر علي كل العالم وشي طبيعي بس الصبر وفي ناس فعلا جعانين وصابرين بس من ناحيه كلامو صح لانه يمكن هو حسه انه الوضع مابتصلح وكل انسان عنده وجهه نظر ولولا اختلاف الآراء لبارت السلع وعموما مغادره الفنان الكبير العزيز كمال ترباس فقد عزيز جليل للفن السوداني
*عدادك كم يا مونيكا
# عدادي دي حاجه خاصه بي وفترت من السؤال ده اعفونا منو ههه
*هل لديك فكرة العود للعمل في مجال الاعلانات
# انا مااعتزلت الاعلانات عشان ارجع انا بشوف الشي البليق بي وبشتغلو والغناء افضل بالنسبه لي
*علاقاتك بالفنانيين والفنانات ورايك في مجتمعهم…؟
# علاقتي بكل زملائي طيبه وفي حدود الاحترام والتقدير ومجالهم مجالي وكل انسان حر في حياته الشخصيه
*رايك في الغناء الهابط
# الناس بتحب تسمع اغاني متنوعه ومافي غنا هابط في غنا بسيط وسريع الانتشار للجمهور والحفلات وانا شخصيا بحترم كل الاختلافات والاستايلات
عشه الجبل ومروة الدليه رايك فيهما..؟
# انا صراحه صراحه بسمع اغاني معينه من السوداني لكن سمعتهم وعندهم لونيه جميله والفن فن طالما حرك الجمهور ولهم تقديرهم ومكانتهم
*ابرز الشعراء الذين تعاملتي معهم
# زوبا طاشين… احمد كوستي …مهدي مصطفي….اخلاص التوم …مصطفي امبو…وعبدالقادر..(قدوره في أعمال جديده)
*فنانك المفضل..؟
# فناني المفضل ابو داؤؤد وسميره دنيا
علاقتك بالرياضه محليا وعالميا
..؟
# بحب الرياضه واكتر شي بحضر كأس العالم لكن ما بتابع رياضه كتير عندي اهتمامات اخري
*ما المفضل لديك الغناء ام الكتابه ام التلحين
# لو الكتابه مفضله اكتر من الغنا كان بقيت شاعره لكن انا بغني وبكتب البحسو احيانا وبغنيه
*علاقتك بالخندقاوي بعد الانفصال…؟
# علاقتي بالخندقاوي جيده في النهايه والد بنتي له كل الود
*انا بختوني في كتاب التاريخ))تصريح سابق لك..ماذا قدمتي ليتم وضعك في كتاب التاريخ
# لما يجي التاريخ بتعرفو
*ما سبب ظهور القونات في الساحه
# انا مافاهمه كلمه قونات دي بس بتحسسوني انهم كائنات فضائيه ماهم فنانين عاديين وبغنو حلو وعندهم استايلهم والجمهور بحبو في اي بلد في أنواع غنا….كلاسيك…. شعبي ….أنواع كتيره من الغنا
*هل تفضلين البودي قارد
# اكيد في بعض المناسبات
*علاقتك بالاعلام
# اكيد بحب الظهور بس ماكتير الكتير مسيخ ….ومابقرا جرايد كتيره
*اغنيه لغيرك تمنيتي ان تكون لك
# انا بطبعي عمري مااتمنيت حاجه حقت زول تكون لي بس اكيد في اغاني كتيره بحبها وبسمعا
*فنانك من جيلك
# حسين الصادق صوته بيطربني وهلاليه برضو
*كم تبلغ ثروة مونيكا
# مابحب الفشخره عموما لكن مستوره كل البتمناه بحقق فيه الحمد لله غير اني مادخلت المجال لحوجه دخلت هوايه واحترفت مهنتي ولسه بشتغل علي نفسي لغايت وحدودي السما
*انتي مغرمه بالخندقاوي بعد الانفصال..؟
# ابو ابنتي وله كل الاحترام والود
*مسيرتك الغنائيه غير ناجحه…؟
# ناجحه وحتنجح اكتر
*سعدنا بيك يا مونيكا جدا واخيرا كلمه اخيره
# كل الحب السمح لي جمهوري الحبيب واتمني ان اكون عند حسن الظن وربنا يصلح حال البلد وتنعمو بكل السعاده