عِـشْقٌ سَرْمَـدِيٌّ– هُـوَيْـدَا الـمـاحى-سلاطين العشاق فرحين بما اتاهم مجلس السوباط

عِـشْقٌ سَرْمَـدِيٌّ– هُـوَيْـدَا الـمـاحى

سلاطين العشاق فرحين بما اتاهم مجلس السوباط

لم اهضم ما شاع عن محاولة قرصنه الموقع الرسمى

بلاغ جنائى بحق المقلدين ماذا عن مافيا البث وبرنامج آيه افروا

استراليا ملبورن\عشق البلد

@ الله الوطن الهلال1898..!!..الله النصر الهلال..الله الوعد الهلال ..الله العشق الهلال ..الله العشم الهلال ..الله الامل الهلال ..الله الفرح الهلال ..!

@ البارحه الاثنين كان صباحه عديله وزين ..سلاطين العشاق اصبحوا فرحين بما اتاهم الله التأهل الحلال الى دور ال32..وتوالت البشريات بتصريحات رئيس دولة سمو الهلال فخامة السوباط اول شى زف البشريات بتشيد طابق اضافى فى معقل سمو الهلال ..وشويه قدى وصلت اخر شحنه من الاضاءة لى مضارب سمو الهلال ..وما كدنا نحتفل بمقدمها حتى اتانا حوار فخامته على احدى افضائيات وعدا وتمنى والبشريات بالكوم ما تديك الدرب ..تكلم فأسمع..سرد فامتع .. وضربت فأوجع الدلاقين بالبارد والكلام الرصين لو كانوا يعلمون ويفقهون ويتبصرون ولكن دمهم تقيل وما عندهم مثقال ذرة من الكرامه.
@الرشيدالمهدية للصدى الدلقونيه:(لم ينتبه أحد لضعف قدرات أجانب الهلال بسبب ضعف أداء سانت جورج)..كفايه انه لا احد لم ينتبه الى غثاءك وحربك النتنه على سماحة دولة سمو الهلال ..الصدى الدلقونيه مكانك الطبيعى ..تَـبْغَـضُ أَنْ تَـرَا سمو هلالنا فى الْمَعَـالِي ولا نبالى …. يا “كنعان ابن نوح)..القائل سَآوِي إِلَى جَبَلٍ يَعْصِمُنِى ..(وَقِيلَ يَا أَرْضُ ابْلَعِي مَاءَكِ وَيَا سَمَاءُ أَقْلِعِي وَغِيضَ الْمَاءُ وَقُضِيَ الْأَمْرُ وَاسْتَوَتْ عَلَى الْجُودِيِّ وَقِيلَ بُعْدًا لِلْقَوْمِ الظَّالِمِينَ )..اما وقد اويت الى “الصدى الدلقونيه”.. ياها شبهك ولن تعصمك سيجرفك الطوفان “.نهيقك ونعيقك لن يضيرنا بل ارتدى عليك مَـقْـتـًا وَكَـرْهًـا تلاحقك لعنات امة دولة سمو الهلال حيثما كنت .ومسيرة دولة سمو الهلال ومشروعها الحضارى يمضى بخطى واثقة.
@عبر خطاب رسمى خطب ” اهلى طرابلس” ود سمو الهلال للتبارى وديا بالقلعه الزرقاء..متشكرين ومقدرين وكمان بنعتذر ..الغدر والجبن والخسه والنداله ماها “هيلنا” ولا بنعرف الخيانه بنواجه من يعادينا ولا نعرف الغدر والطعن من الخلف لسنا الدلاقين ..بنكتلهم بعضمة انجاواتنا ومنجزاتنا ..ولن ننزل الى الدرك السحيق لمجارتهم إنه هلال “التربيه” والحركه الوطنيه .
درمان»..@ فى بريد العشق وانا بريد الوطن الهلال
1\عاشق سمو الهلال” ابو وليد”:(القون في تسفاي والوجع في هناي هاهاهاهاهاهاهيييييب ..ياخوانا انتو ملاحظين الجهلاء من الجمهور سيكونو خطر علي الهلال نفسه..الناس الفي الاستاد هل شفتو تدافع الجمهور بعدصافرة الحكم..لسع الحكم ماطلع من الملعب والحبش ماطلعو..تدفق الجمهور جو الملعب..ودي ظاهره خطيره جدا قد تحرمنا من مشاهدة حبيبنا من داخل الاستاد..نحن ماصدقنا الكاف سمح لينا
طوالي تخربوها في اول مره؟ا لفرق المنافسه حتشتكي وترفق مثل هذه الصور واكيد الحكم بدونها في التقرير وكذلك المراقب..الي يظل بعض جمهورنا جاهل وضار للفريق..الناس ديل ماقاعدين يشوفو كور اروبيه او عربيه او حتي افريقيه؟مايحدث عندنا من فوضي لايحدث في اي دوله..الي متي جمهورنا يكون مثقف ويتعامل بنظام
2\من عاشق سمو الهلال” يوسف الجبادى”..المملكة العربية السعودية(السلام عليكم دائما صاحب العظمات له كبوة سؤ الحظ والعيون الحارة حرمت الهلال من سيل جارف من الاهداف فى مرمى خصمه ادى مباراة سيد البلد رغم انف كل حاقد مباراة كل من شاهدها..كريمات سخيات عارضاتنا وقوائمنا تحترم الضيوف صدت لهم سيل الاهداف ..جرعة صغييييرة حتى تأتى جحافل جيوش كلماتك لنفرح م تجيش به قريحتك بهذا النصر لك ودى وتقديرى)
3\ من عاشق سمو الهلال “محمد احمد مصطفى”:(الاستاذه القامه والغاليه
السلام عليكم ورحمة الله وبركاته ..اولا قسما بالله العظيم انتي الفال الحسن علي الهلال ومبرووووك النصر اولا علي الدلاقين وثانيا علي الاحباش
انتي معي اختي الاستاذه هويدا بان شكل الهلال هذه المباراة لعب بتنظيم ممتاز والاداء كان متجانس والفريق كان مترابط بس اختي نحتاج لمهاجم سوبر فيجب ان يكون قلمك وصوتك ومناشدتك باحضار مهاجم يعرف الشباك اليوم ضاعت اهداف بالجمله والتي كانت تحتاج للمهاجم السوبر
اختي هويدا اناشدك بالله ان تكرسي قلمك من اجل هذا النداء الهداف الهداف الهداف هو ماينقص الهلال ..غدا ان شاءالله في انتظار عامودك في شوق احر من الجمر عامود بطعم الفرح والنصر الكبير
4\من عاشق سمو الهلال”عبدالفضيل آدم”:(مساء الانتصار الف مبروك للهلال من الطبيعي ان يتاهل الهلال ولكن الماطبيعي خروج.الهلال من التمهيدي واصحاب التمهيدي معروفين احب ان.اذكرك انا واستاذ هاشم عبدالرحمن واستاذي يهني جميع الاهل بي الانتصار ويقول لكم القادم احلي
ثانيا عندي سوال لماذا يقود كتله الممتاز الجاكومي وللهلال مجلس منتخب عكس المريخ الذي به لجنه تسير بقياده حازم والجاكومي وسودكال هو اخر رئس منتخب بعد محمد الياس حسب علمي بعد مل هذا لماذا لايقود الكتله الهلال وباي حق يمثل الجاكومي الكتله.ودمتي بخير)
@عليكم الله “كلكلونى” عشان يا ام مت من الضحك ويا كمان دفقت دموع “حزومى” ..عدو الهلال الجاكومى قال شنو قال “نفاضل بين استاد الهلال و والأبيض..يا عدو الله عدو الزعيم الهلال ..كنتوا فاكرين الحبش زى المصريين ..فضل سعيكم ..بعدين تفاضل “تكاكى “..ما شغلتنا استاد دولة سمو الهلال للايجار ..بعدين رئيسك “الاهطل” لحق يلحس تصريحه الارعن :(حازم تصريح عبر احدى الفضائيات يعنى صوره وصوت:لن نلعب في استاد الهلال حتى لو خرجنا من الابطال)..ما يبقى راجل قدر كلمته ..! والراجل بمسكوا من “لقاليقه” .
@تاوقت فوق للمشلعيب ..كالعاده لقيته يتلولح عرفته تقيل وطوالى اتناولته ودليته ولقيت عاشق سمو الهلال “محمد طه الامين شقدى معلق على عيمودى الليل امس:(محمد طه الامين شقدي..والله الشئ الكنت خايف منه حصل ..ماكنت اتمني يفعلو تجربة التذاكر الإلكترونية في هذه المباراة توقعاتي حصلت …طريقة الفحص كانت بطئية مما ادي للتزاحم وماادراك ماالهرجلة الحصلت ..مشروع زي دا عايز مباراة نسبة حضور الجمهور متوسط نسبيا عشان تقدر تقيم مشروعك ..لكن مباراة زي دي ومصيرية بالاضافة لتشوق الجمهور لرؤية اللاعبين الجددماكان مفروض يتم التجريب في هذه المباراة ..التنظيم والأمن صفر كبيييير ونقول الله يستر بس)..قمت رديتلو :(اى تجربه جديده ستصاحبها هنات واخفاقات ..ولم يكن بالامكان افضل مما كان ….الدورى ما شغال كيف كان سيتم التجريب ..حتما فى قادم المواعيد ستتم المعالجه..مشكلة الدخول قديمه ما جديده وعلى دولة سمو الهلال توسيع سعة البوابات عشان الناس تدخل بى مهل وتمرق بى مهل .
@اناشد حكومة دولة سمو الهلال واخص السيد “كركساوى ” مخاطبة الاولتراس ومطالبتهم باتخاذ ما يلزم حيال ما قام به نفر منهم باطلاق الشماريخ المحرمه عقب الهدف الحلال ..وما اعرفه عن الاولتراس انهم منظمون وحادبون على مصلحة الكيان ولا يتورعون فى الحسم والبتر حال دعا الداعى ..مخاطبتهم ولفت النظر امر حتمى لان ما حدث منهم امر جلل له تبعات اقلهن حرمان سلاطين العشاق من مؤاورة الفريق ..لم نسمع اعتذارا من الاولتراس لذا نأمل ان نسمع موقف وقرار قوى من دولة سمو الهلال .
@ تعين “ابو بكر كاكي” مشرفا على منشط ألعاب القوى بالهلال ..آآآى دا الشغل دا الشغل.
@البارحه ناضمنى فنان الهلال روعه وجمال ..ابراهيم الشاطئ عن “الكديسى” القطه ..الدخلت الجوهرة ..عشية لقاء سانت جورج ..قتلو :انها من عمايل الدلاقين حتما لا محاله ربنا يجعل كيدكم وسحركم فى نحوركم وفي واعز ماتماكون) المره الجايه بدل الكديسه رسلوا حمار يا سجم.
@الحبشي قالوا دخل الكورة واخر خمسة دقايق قاعد يدعي يا رب” انسفنا” يا رب” انسفنا “لحدى ما “تووووف” ليلبو نسف حنانو ..!ونسف معاهو ناس تاني كدا 😜.
@لمحت ما يشبه الاعتذار من موقع دولة سمو الهلال الرسمى ولم يروقنى فلم اكمل الاطلاع الذى حوى محاولة قرصنه للموقع هو الموقع شن عماره وشن فيهو عشان القراصنه يعشموا فيهو ..اى قرصنه سيستشعرها المتابعون حتما وهذا ما لم يحدث البته ..القرصنه يا شطار حال كان الموقع شغال صح ..اشتم رائحة اللاعيب الكيزان يا “هيثم السوباط” ..ياخ احترموا عقولنا ..واشتغلوا صح وبلاش الحركات السخيفه دى .
@فتح بلاغ جنائي أمام النيابة التجارية بالرقم 75 / 2022 م تحت المادة 27 من قانون العلامات التجارية في مواجهة المقلدين للعلامة التجارية الخاصة بالنادي بواسطة المستشار القانوني الأستاذ علي هاشم مفوض النادي وطالب بتعويض مبدئي بمبلغ وقدرة 50 مليون جنية سوداني لحين حصر الأضرار التي لحقت بالنادي جراء هذا التقليد وقد أصدرت النيابة التجارية أوامر قبض في مواجهة المقلدين وأوامر مصادرة لبضائعهم وأوامر تفتيش والجدير بالذكر أن الوكيل الحصري لمنتجات نادي الهلال هي شركة اوت اوف ذا بوكس المسموح لها بتوزيع وتسويق منتجات نادي الهلال) سمح دا القبيل راجينه نحنا ..وماذا عن سرقات البث التى تدر عليهم ارباح دولاريه..؟ وكمان مدورين التربح بالاعلانات ..؟ وماذا عن البرنامج الذى تقدمه ايه “كمال افرو”..بشعار دولة سمو الهلال ..اوليس انتهاكا صريحا للعلامه التجاريه والشعار ..؟

@نبض العشق السرمدى ..نقرات عشق نمة ريد هلاليه

يا غرام الروح :(رأيت الهلال ..سمو الهلال ..ووجه الحبيب فصارا هلالين عند النظر . فلم ادرى ايهما قاتلى هلال السماء ام هلال البشر)- “ويبقى العشق ما بقى الهلال.حفظ الله سمو الهلال

زرقاء العشق