عِـشْقٌ سَرْمَـدِيٌّ– هُـوَيْـدَا الـمـاحى-لَعْنَة الزعيم الْهِلَال جُبَارَة مريخاب الْأَخْسَرِين أَعْمَالِهَا – الكاردينال والغربال علمان  عِمْلاَقُان خفاقان..”ثَقِيلَانِ على المريخ الدلقان ..!

لَعْنَة الزعيم الْهِلَال جُبَارَة مريخاب الْأَخْسَرِين أَعْمَالِهَا 

الكاردينال والغربال علمان  عِمْلاَقُان خفاقان..”ثَقِيلَانِ على المريخ الدلقان ..!

استراليا-ملبورن-عشق البلد

@زعيم السودان يستقبل ” هلال الفاشر “مساء اليوم بالجوهرة  نهائى كأس السودان”..الحرق الدلقان وطاروا منه “البارحه ..!!

المباراة حتما تدخل فى اطار البرنامج الاعدادى لمباراة الشباب التنزانى نريدها “قوية ..قوية.. قوية “.ومنتصرين باذن الله.

@.”الكاردينال -الغربال”..”-علمان يرفرفان “فى سماوات الاوطان  الهلال والسودان  -..معمر الجوهرة الزرقاء دكتور “اشرف سيد احمد الكاردينال ..”رجل الممتاز ..هداف القرن”الغربال “… “الكاردينال والغربال””إسمان”عملاقان ” جوهرتان عذبتان على اللسان .. “ثَقِيلَتانِ قاتلتان للمريخ الدلقان ..!

@ بى “كسرى و اسكندر” المريخ وقع واتجندل ..!..مريخاب “اذناب” جاتكم الصغيره وراجياكم الكبيره ليبيا نفر ..ومدد ..مدد..مدد

@البارحه المغلوبه على امرها ..دفرت باب بيتها ووليداتها فى طرفها ..وشايله هموم الدنيا كلها فوق راسها ..راجلها ملعون جنس لعنة مكرها عيشتها ومشحططها مبهدلها وممرمطها بين العالمين ..دخلتها كدى ولسسه كراع جوه وكراع بره قال كدى ونفش فوقها ريشه:(يا فقر يا وش النقر انتى هسى دا وكتى ترجعى فوقه البيت وما جايبه معاكى اى حاجه..؟ اكيد الاولاد من اتعشوا انا جيب ليكم السم الهارى من وين وانتى ذاتك كنتى وين ..قالت ليهو يا راجل استهدى بالله انا جايه من بيت “أهلى” وهم ذاتهم طردونى

..وقال كدى “فننا”-ليك “بالبراطيش”والعيال فزوا جروا.. والراجل ركبه جن احمر ..المهم طلقها طلاق تلاته..وشابكها ليك “ماتا هارى”الملعونه انتى سبب ودارى ودمارى ..الله لا بارك فيكى ولا فى عيالى ..يا زوله ديل ذاتهم ما عيالى ..!!

الجيران اتلموا ..عشان يحجزوا الراجل الفاير سمه من “المره”الغلبانه وفى ذات نفس الوكت حارقن شمار “ماتا هارى “..بدوروا يفكوا الشفره..

وكت سألوا “التور الهايج “عن السبب قال ليهم :(الوليه طلعت “عميله استخباراتيه..لدولة العدو…!!!””اها يا” فلاديمير بوتين “..؟

“بقوا “يسووووا” لى :(بسم الله الرحمن الرحيم استهدى بالله يا راجل انت ماك نصيح ..؟ دى ام عيالك وستره حالك ..قال ليهم تغور فى ستين العميله الخاينه الغداره ..ابوها وصله خبر المعركه قام جاء ..وصاحبنا يرغى ويزبد ..وقال كدى طقشه ليك “كف” واعقبه بى ام دلدوم ..قال ليهو فتح عينك راضيين بالهم والهم ما راضى بينا ..كمان جابت ليها جاسوسيه وعماله .. ورد “الملطوم “الجاكومى ” يا عمى داخله على لابسه توب أزرق اسمه”الزعيم الهلال” وقالت كانت مع ناس الاهلى الذبحونا ..فبكى.. “حزومى”..!

@النشرة الجوية ليوم الثلاثاء 27 (ضرب اعصار “اهلاوى “مدمر مريخ حزومى والجرثومى وجاب اجله ).

@فى بريد العشق وانا بريد الوطن الهلال 

&عاشق سمو الهلال “ابو وليد”:(بعدماطار من كأس السودان..غازي الغرايري مدرب المريخ || الطقس و عدم تعود اللاعبين ع اللعب بالاجواء السودانية سبب هزيمتنا امام النادي الاهلي الخرطوم)

&عاشق سمو الهلا “عبدالفضيل ادم”:(الاستاذه هويدا الماحي نهارك.سعيد اعود بعدغياب لمواصله ملاحظاتي اليوم قرعه الممتاز ماذا فعل الاتحاد بشان القرعه.ماهي القناه الناقله وهل حددت ام تكون مثل الموسم السابق دوره كامله لم تتلفز هذه لم تحصل الا في السودان اين القناه الناقله وكذالك الرعايه رقم وجود عضو في الاتحاد للرعايه والتسويق في كل العالم.القناه محدد وكذالك الرعايه وحتي الانديه نصيبها معروف ويصل بي اتفاق مسبق وهنالك جوائز للاعبين احسن حارس وكذلك مدافع ولاعب وسط وهداف الموسم ونجم.الموسم واحسن لاعب صاعد وواعد اليوم تجري القرعه اتمني ان تنتهي كل تلك العقبات ونراي رعايه.وقناه.ناقله.وتكون.في جوائز للاعبين وتختفي كل السلبيات الماضيه حتي يصبح دورينا جاذب ونخرج.للعالم بي صوره جميل خاصه كره القدم اصبت المتنفس الوحيد في ظل الظروف الحاليه التي تمر بها البلاد اللهم اصلح البلاد والعباد)

&عاشق سمو الهلال”يوسف الجبادى “:(الاخت هويدا بت الماحى اسم حلو علينا نحنا الهلالب هذا العمود سوف يجعل جيوب المريخاب تنزف كل م تملك من مبالغ مالية هذا العمود سوف يسبب لهم الام القلب والجلطات وكل الصدمات وخاصة المندسين فى جلباب الهلالاب غايتو بتعبوا ناس بيتهم والناس المعاهم..م شرط بساهمهم فى ذلك كما ساهم الكردنال فى بناءاستادهم هذه انملة جرعة للرد على نكران جميلهم المابشبهو الهلال تحياتى لك)

& عاشق سمو الهلال “ابو قصى”السعوديه:(الإعلام هو عنوان الحكومات والهلال دوله لابد أن يكون إعلامه اقوي من اعلام الحكومات لان شعب الهلال يمثل ما يفوق الثمانيين في المائه من سكان السودان في الداخل والخارج وبقية العشرون في المائه يتباري حولها الجاكومى وانصارة وبقية فرق الممتاز..حفظك الله بنت الماحي وانتي كل يوم تأتي بالجديد من المرافعات التي تفيد الأجيال من شباب سيد البلد واكرمك الله وانتي تدفعين بكلماتنا البسيطه عبر هذا العمود العالمي ليطلع عليها كل مريدي سيد البلد..حفظ الله الهلال وكتب النصر حليفه في كل محفل وحفظ يراعك البتار الذي يجد لكل تقصير يد من حديد تصحح مساره وتحفظ حقوق الزعيم خاصة ضد من تسول له نفسه المساس بها من الوصيفاب المرجفين. ونواصل.)

& عاشق سمو الهلال “فهمى ابوحنون “:(علي الطلاق ريحتيني راحه والله الهلال طول ما انتي موجوده محروس نسيتينا الاداره والخزلان وعدم الرد علي الاهطل (الجرثومي)عايز الفت نظرك للاعلام المرئي والمسموع حقيقه كلهم اصبحو دلاقين واصبحت منابر لضرب سيد البلد معقول الهلال مافيه كوادر …ثانيا رؤسا الاتحادات بالولايات كلهم مريخاب وادارات انديه الولايات..الثا معقول كل مدربين المنتخباب واختيار لاعبي المريخ اول ورديف وشباب والي اخره ..نحتاج لي توره حقيقي وقلمك مؤثر جدا فالنعلنها ثوره لتصحيح الوضع المقلوب)

&عاشق سمو الهلال”فتوح حلفا”:(عد تعثره القوقو في كاس السودان الهلال يقترب من الكاس والمريخ يودع يا ناس دمعه جديده بعد خروجه من كاس السودان . والله ما بقي ليكم يا قوقو الا تنظموا ليكم كاس سيكافا كما فعل رئيسكم جمال الوالي من قبل .)

& عاشق سمو الهلال “امير دهب”:(عاشقه الهلال الولهانه والله ياختي الدلافين سالخ لا يعلم به إلا الله كدي تاني واحد بفتح خشمو انتي سيف الهلال البتار من عمر دهب عاشق هلال الملاين انتي امه انتي لا اعرف ماذا اقول عجزت الكلمات عن وصفك. لله درك بت الماحي).

@المريخ انضرب يا جدعان ..اكان شفتوا مرمططة الدلقان المهترى الفلتان الفلسان المدعوم الهلكان ..وقد تهاوى فهوى وانزوى مدحورا من كاس السودان..!

@سمعت لى نضمى بل عنتريات منسوبه لى “أسامة عطا المنان “:طالما انا موجود في الاتحاد لن يدرب المنتخب الوطني الأجانب)..حتى متى يا “اسامه” انت موجود ..؟ ام سيغفلك حمام الموت ..؟ نحنا غير “الصنج” دا مافى حاجه “مودرانا”..من حليفة طلاق لى عنتريات وعولاق الناس بتمشى لى قدام وانتوا راجعين لى ورا..!-اى والله- يا راجل غياب الحجه والمنطقه سبيل العاجزين بدل تقول للناس ..دا مشروعنا وخطتنا الخماسيه او العشريه ودى السلبيات والايجابيات ..انت ناسى انكم “اتحاد” يعنى مجموعه وليست حظيرتك الخاصه.. وهَاؤُمُ اقْرَءُوا كتابيه إِنِّي ظننت أَنِّي مُلَاقٍ حسابيه)..تقعد تحرق لينا فى الزلابيه ؟

@مريخاب اس البلاء والعذاب..جاتكم الصغيره وراجياكم..الكبيره “ضقلها يكركر “منكسرين مدحورين لا حنه ولا ضريرا كلام ايه خبر ايه التسوى فى هلال الوطن سيد البلد والفرقان..يترد عليك جندله وبهدله ومهزله ومسخره وال…يكرشوك ويطردوك من كاس السودان ..وحزومى يعيط والجاكومى الجرثومى الممعوط يزيت ومزمز ..يفيص..ونحنا نهيص..جاتكم الصغيره وراجياكم الكبيره حق الزعيم الهلال ما بروح يتلاقكم فى سكرات الموت وغراير الروح.

@ بتوقيع فرسان الوطن الهلال “الشعلة والغربال” صقور الجديان والمنتخب الاثيوبى حبايب وديه تعادليه.

@بين نعيق بوم الشركه الراعيه ” كابيتال بلو سبورت”..”الما دسيسه” ونهيق فنان “الليق” (محمد عيسى)..كانت قطوعات الكهرباء المنقذه المخلصه ..عن قرعة بطولة الممتاز احدثكم والسؤال واقف لى فوووق “لغاليقى” انتوا يا ناس اتحاد الدلاقين خباركم عن موضوع التلفزه مطنشين ..؟..بعدين من البدايه سرى همسا فتدرج حتى صار جهرا حول ملكية الشركه الراعيه ياخ لو الشركه دى حقت حاكم السودان “الفعلى” صلاح قوش خلوا يجود الشغل وينقل الممتاز من قولت “تيت”..والحساب قدام ..وكتين يجينا رئيس من خارج اضابير الاحزاب السرطان المزمن والدولة العميقه

@هلالاب سلاطين العشاق معروفين من قديم الدهب هلالنا سيده ..والفوق دولايبنا بنزيدو..لا بعنا كاس لا بينا “نخاس”..عسكنا تماما سيدهم جمال الوالى زمااااان بااااااااع “كويس الدهب التقليد” قاموا كتابهم امس غلبهم البسوووا وحالته قبال الفضيحه والخروج على يد الاهلى الخرطوم..نحتوا صناقيرهم بعد الدكتور “اشرف الكاردينال ” بلعهم السنتهم وقعدهم فوووق حفرتهم …نحتوا “صناقيرهم” فاشاعوا العثور على كاس الدهب المختفى ..الجن بتداوى كعبه الاندراوه ..لكن بينى وبينكم نفسى تحدثنى بان :البعيد شنو يكونوا سرقوا من المشترى متل سرقة القروش من قبو الرئيس الجنوب افريقى وكمان من تحت مخدته ..اى والله.!

@لم يكن بخافى على احد احجام دولة سمو الهلال عن خوض غمار دورى السيدات لكرة القدم فى القريب العاجل “كوووله بى مهل “..لكن الفيفا قالت كلمتها .. ودفعت بالزعيم الهلال الى تكوين فريق سيدات كرة القدم ..يخطف نجمات التسجيلات لفريق السيدات والمريخ يحتج فكانت سلمى الماجدى حاضرة ملبية لنداء سمو الهلال بيتها ومهدها وما ان لبت النداء حتى انبرى قطاع المرأة لاقتناص الدرر الغوالى ..فجئن طائعات مختارات ..وربح البيع ..فبكى حزومى ونعق الجرثومى وسكلب مزمل “متشعبطين”فوق عدالة المنافسه ..وكيف الدرر الزال تجرى على الوطن الهلال ..؟تبكوا بس.

@نبض العشق السرمدى ..نقرات عشق نمة ريد 

يا غرام الروح ..يا هلال الروح يا سلاف الروح..(فى حضرة من أهوى عبثت بى الأشواق حدقت بلا وجه ورقصت بلا ساق  عشقى يفنى عشقى وفنائى استغراق مملوكك…. لكنـى “سلطان العشاق” -عشق سرمدى !)

زرقاء العشق