Take a fresh look at your lifestyle.

عِـشْقٌ سَرْمَـدِيٌّ– هُـوَيْـدَا الـمـاحى(ج1) هلالنا بحر السماحة يتهادى بالعصر ظهوره-أَسَاطِينِ العشاق الجوهرة المحروسه هلكان البكوسها ..!

عِـشْقٌ سَرْمَـدِيٌّ– هُـوَيْـدَا الـمـاحى(ج1)

هلالنا بحر السماحة يتهادى بالعصر ظهوره

أَسَاطِينِ العشاق الجوهرة المحروسه هلكان البكوسها ..!

استراليا-ملبورن-عشق البلد

@الله الوطن الهلال..1898..!..افراح الوطن الهلال..

معشوقنا  البندورو بنغرق في بحورو نخوض النار ونزورو..هلالنا بحر السماحة يجو العشاق يزوره ..هلالنا بالكنغو ..فى ضيافة مازمبى الليله بالعصر ظهوره..!.

..هلالاب”أَسَاطِينِ”العشاق..بروفة اسياد البلد”الملوك “خطريه “..مع مازمبى الكنغولى وما ادراك ما مازمبى وفوق ارضه كمان ..وناس قريعتى راحت قالوا “الروووب”..عشان يقبل بالتبارى معاهم فريق “حيدوب”باكر بنسمع حى ووووب..ياربى يكون لجؤ ولا “وديه” ساكت..حيلة العاجز..؟

@ احال الكاف دولة سمو الهلال الى لجنة الانضباط لجملة مخالفات منها تسلق الجماهير السياج واستخدام الشماريخ فى مباراة العبور على “حساب سانت جورج ” الامر الذى كان متوقعا .. سبق وان حذرنا وانذرنا حتى بحت اصواتنا  من مغبة الامر قبل اللقاء بكثير ..نعلم ان العقوبات قد لا تتجاوز لفت النظر والغرامه الماليه والانذار بالحرمان من الجماهير فى قادم المواعيد حال تكرار “العمله العفينه الشينه دى ” ..للاسف الأسيف ..”الاولتراس ” اسد دولة سمو الهلال الزرق ..يد تبنى ويد تعمل الخراب..-اى والله- وحقا من الحب ما قتل ..والامانه العامه بدولة سمو الهلال لا هشت ولا نشت ولا هرشت ولا حذرت “الاولتراس..ولا لفتت نظر الجماهير بالادانه والشجب “.

على دولة سمو الهلال الشروع فى تعلية السياج الحاجز ليعانق عنان السماء..(أقفاص اقفاص )..ارحم من العقوبات هسع عليكم الله الغرامه دى حال فرضت علينا ما كان اولى بقريشاتها دى انجاز عمل فى الجوهرة ان شاء الله يفتحوا بيها بوفيه راقى ,,؟

يعنى الجماهير عاجبها تدفع والبدفعوها ما تسد رمق الغرامات ..ليه بس ..؟

فالنتصالح مع انفسنا ما تم من خرمجه واقتحام للملعب ونط السياج..واشعال الشماريخ  قام به نفر من الاولتراس و عشاق سمو الهلال ..شئنا ام ابينا ..ببساطه حال كون الدلاقين المندسين والاحباش وحدهم الفاعل اذا اين كان رد الفعل لردعهم من جمهورنا الواعى العاقل ..؟..المَغَبَّةُإقتحام الملعب قبل مغادرة الحكام والفريق المنافس قد لا تحمد عقباها حال تم استغلالها من قبل المندسين قد يتعرض الحكم للاصابه او حتى   اعضاء الفريق الخصم  ..عندها من سيدفع الثمن ومن سيتجرع مرارة العقوبات والندم من غيرنا ؟

@السودان طار ..قصدى طيروا ..ياخ القرعه قرعته قرعة بطاله ووقعته مع السودان في مجموعة حامل اللقب..المغرب وغانا ومدغشقر في بطولة الشان..كان الله فى عون السودان مع دورينا “الكحيان”.

@دا الاعلام الدايرنوا ليك وطنى الهلال الحوبه ليك

كان موقع دولة سمو الهلال حاضرا ..اول ما جانى الاشعار “كلن كلن” من تويتر هتفت فى الحال لبيك سمو الهلال ..ولقيت ليك النفى القاطع العاجل نسف الشائعه  واجهضها وكتلها فوق مهدها..والجماعه “اتلبشوا”..ودرب الشائعات “دقشوا” دا سلاح عديم الحيله والكوره ..اخرها وليس باخر  الاعلان السرى وعم القرى عن اعتذار ..فريق ما زمبى عن اداء المباراة الحبيه امام سيد البلد الهلال..العبوا غيرها..عليكم الله يا ناس الاعلام والموقع الرسمى خليكم دايما وابدا كدا وكدا رضا ..ولكن يبدوا دوام الحال من المحال خباركم بخلتوا على “أساطين العشاق” بالخبر النتر من الكاف والتحويل للجنة الانضباط ..؟

@وراء كل مصيبة يكمن ” المريخ”..دار حمر تعلن انفصالها من غرب كردفان..و”موسى كانتى” لاعب الدلقون يتسبب في إبعاد المنتخب الوطني للناشئين من تصفيات امم افريقيا زون سيكافا نأمل ان تنظر اللجنه الى الاستئناف بعين الرضا باعادة منتخب الناشئين و”عجوز المريخ موسى كانتى” للمنافسه .

@فى بريد العشق وانا بريد الوطن الهلال

سلاطين العشاق يا اعز الناس يا احن الناس ..اول التبادى حق الله بق الله عساكم طيبين ..الليلى دى قسمت “عيمود” الى “عيمودين” من شان عيونكم ياالغاليين..يا عزوتى وسندى ..البارح” العيمود” كان اطول من طويل وتعذر نشره دفعة واحده عليه استوجب عيمود اليوم القسمه على “عيمودين”.

=عاشق سمو الهلال”برهان محمد”تتذكري تنبيهنا للجمهور قبل مباراة سانجورج باستاد الهلال؟..ثورة الوعي الجماهيري..نعم يجب ان تواكب الجماهير التطور الذي حدث وسيحدث في الهلال بداية بالمحافظه علي مرافق الجوهره ومراقبة اعداء الهلال عشية الاحد فالهلال مستهدف من كاف ومن الداخل من الداخل لنا اعداء حاقدون نعلمهم تماما فهم من رووجوا لسوء الاحوال الامنيه في السودان الموسم الماضي وتم حرمان الهلال من جماهيره بسبب ذلك نعلم من تواطأ ضد جمهور الهلال هنالك نافذين في الدوله حمل لهم الجاكومي الخطاب ليوقعوا عليه ويقروا بسوء الاحوال الامنيه ومن ثم يحمل الجاكومي الخطاب ويوصله للاتحاد وبالتعليمات الاتحاد يرسل الخطاب لكاف ليغير كاف رأيه بعد اقل من ساعتين من الخطاب الاول ويحرم الهلال من جماهيره ويتجه الهلال لكاس لتنصفه ويعود كاف ويطلب الجلوس مع الهلال للتوصل لحل ودي ويرفض الهلال ويغضب كاف والان كاف يبحث عن ثغره او غلطه من جماهير الهلال ليعاقب الهلال والمراقب يترصد يعني قاروره او حجر ممكن يلخبطوا الدنيا يعني بالواضح مابتقدر تتحمل اتفرج من بيتك والاهم من كده المندسين اي مشجع لازم يراقب يمينو وشمالو ضروري جدا واي عميل لكم كامل الحريه في التصرف معه نعم احذروا المندسين فانتم مستهدفون من اعداء الداخل والخارج فاعداء الدخيل يسعون بكل مااوتو من قوه لحرمان الهلال من جماهيره فهم يعلمون خطورة جمهور الهلال وقوة تأثيره فكونوا علي يقظه وحرص وحذر ولاامان للدلقان ولاعزاء للحاقدين وماالنصر الا من عندالله)

اخى” برهان محمد” :ان انسى لا انسى رسالتك التحذيريه التنويريه المتوجسه اعلاه وهانذا اعيد نشرها علهم يرعووون عن التصرفات الطائشه الهوجاء التى تعود علينا بالعقوبات والحرمان من مباريات المعشوق سمو الهلال

=عاشق سمو الهلال “ابوقصى” السعوديه:(دائما ما تتحفنا بنت الماحي بالجديد المفيد في معاني التضحيه لأجل سيد البلد ونحمد الله أن أكدت في عمود اليوم ما ذهبنا اليه بالأمس عندما قلنا وبالفم المليان بأن تجميد أموال رئيس معشوق الملايين ما هو إلا مكايدات دبرت بليل من أعداء سيد البلد وهم كثر وقد يكون فيهم البعض من ضعاف النفوس أصحاب الأهواء التي تباع وتشتري بالمال نسأل الله أن يجعل كيدهم في نحورهم ويجعل بأسهم بينهم ويحفظ الهلال وانصارة من خبثهم..ثم نعرج لما هو قادم ونؤكد على ضرورة مناصرة الزعيم والاستعداد لما هو قادم لنعبر للمجموعات من أرض الخصم بإذن الله ونفرح الملايين من عشاق سيد البلد ..ونغيظ من سواهم من المرجفين والحاقدين. وختاما حفظ الله بنت الماحي صاحبة السيف البتار الحافظ لحقوق الهلال من كيد اعدائه وسدد خطاها)..اخى ابوقصى ..اقرى قصى منى السلام ..اوافقك الراى فيما ذهبت اليه واجبنا قطع الطريق على المرجفين والمتربصين لصون حقوق دولة سمو الهلال والهاب الحماس ومساندة الفرقه الهلاليه الماسيه  لعلو كعبها دوما ابدا 

=عاشق سمو الهلال “يوسف الجبادى”:( صراحة اختى هويدا جعلتينى اشعر باننا اخوان اشقاء ارضعنا الهلال من ثدى واحد جعلنا نشعر الفرح سويا ونتوجع بالالم مع بعض ذلك الدرس تعلمناه من المدرسة التربوية الهلالية

انا شخصيا بعتبر كتاباتك رغم مراراتها وحنظلها على الدلاقين اﻻ انها دروس قيمة يستفاد منها لو سنحت لهم الفرص لفهمها ..والله على الرغم ما تقولينه فيهم انا اعتبرهم محظوظين..انك انتى توجهى فيهم من الخطأ ..ابكيتهم لكنهم ارشاد لهم ديل م فيهم حسنة اما ..بالنسبة لنا نحن ابناء الهلال لقد ارتحنا من جدالهم كل من يحاول الكلام معنا طوااالى نعطيه عمود من اعمدتك وبعد شوية نختار ليهو عنبر على الحالة (مجنون جلطة رعشة ملاريا ناس الملاريا نديهم خروج ساعة ساعتين سكرى ضغط) الاخت بت الماحى انا الليلة عندى هدربة كده كلامى فيهو صح هدربة ) -اللخو يوسف صلة رحم سمو الهلال رباط الدم ..وحاشاك من الهدربه بوصيك بى وصفة ..قرش “جنا” الليمون الاخضر “قالوا امره من الحنضل لكن علاج للملاريا الكمده بالرمده شفاك الله.

@ هلالاب أساطين العشاق :عاينوا ولا اقول ليكم اخير ما تعاينوا ..غضوا البصر..انا لا جنيت ولا الله قال.. بقول نصبر على” الدلقان “وسمو الهلال..يسمح للعدو المريخ يلعب فى الجوهرة المفخره الما مسخره المحروسه..!

يا الله ما قلنا ليكم انا “نصيحى “مانى  مجنونه..” مفلعنى” لا شنى..؟

فى كل الاحوال السوباط” بدفع ليهم قروش الحجز والتأمين..”وكوووووولنا”..بى سلامتنا قاطعين التزاكر وداخلين ..اول التبادى لحماية الجوهرة من عين الحسود ..بنضبح “العتوت” اياهو “التيس” عليكم الله على “بشيش” .. وكمان بنحرق الجلود “افففف” والاهلى الليبى تؤام فريقنا ليهو كووولنا باطبول والفوف مشجعين..وناس الاولتراس ذاتهم ب”الكافار”.. للاهلى الليبى مستقبلين ومودعين..!

“كوولنا”عضة عضة فرس النهر  بس”..تشجيع وغنا وحماس و “عرضة الصقرية “هلالابيه ميه الميه..اى والله..”والزغروده ليبيه..!! ..واللول اللو يا لوليه بدفنوك يا النجمه” المخزيه”..بالشماريخ والالعاب الناريه  ..ودق “الشتم” والحكم .. وللجاكومى الجرثومى الحتف..! ..بعدين “هن اصلن”- “الدلاقين ” متعودين على الشحده واللجؤ..وليبيا فااااااتحه اكان ما “لماهن”..الاهلى طرابلس ولعبن “مباراتن”.. التانيه فوق ارضه ..”- “بتلمهن ” قوات حفتر “يا غرقوهن يا مرمقوهن ومرمطوهن مرقوهن حفاة عراة ..!

-هلالاب”أَسَاطِينِ”العشاق  الجوهرة  المفخره المحروسه هلكان البدوسها..

واى تعاطف مع “الدلاقين الملاعين” نهى زندهى “جنريتر”..!..وقع ليك يا السيد السوباط ..! ؟

@نبض العشق

السرمدى ..نقرات عشق نمة ريد 

يا غرام الروح ..يا هلال الروح يا سلاف الروح(فى حضرة من أهوى عبثت بيا الأشواق حدقت بلا وجه ورقصت بلا ساق  عشقى يفنى عشقى وفنائى إستغراق مملوكك لكنى سلطان العشاق ويبقى العشق ما بقى سموالهلال !)

زرقـاء الـعشق

هُـوَيْـدَا اَلْـمَـاحِى

شاركها على
أكتب تعليقك هنا

لن يتم نشر عنوان بريدك الإلكتروني.