Take a fresh look at your lifestyle.

عِـشْقٌ سَرْمَـدِيٌّ– هُـوَيْـدَا الـمـاحى(ج2)-ردود على هرطقاتهم ..لص مكاتب الهلال المرفود بالجرم المشهود

عِـشْقٌ سَرْمَـدِيٌّ– هُـوَيْـدَا الـمـاحى(ج2)

ردود على هرطقاتهم ..لص مكاتب الهلال المرفود بالجرم المشهود

استراليا -ملبورن-عشق البلد

@الله الوطن الهلال..1898..!..افراح الوطن الهلال..!

@ يطلق حكم مباراة سيد البلد الحبيه اليوم امام مازمبى صافرته عند الثالثة والنصف عصرا..الفوائد المرجوه معلومه..ندعوا الرحمن ان يجنبنا شر الاصابات .

@ايمن كبوش ماسكاهو ام فريحانه ..بغثاء اورده جاء فى عموده على لسان المرفود من دولة سمو الهلال “منصور الهادى ” ابان عهد الكاردينال بفضيحة السرقه الاشهر التى دمغته بها المنسق الاعلامى حينها فاطمه الصادق ولم يجرؤ على تبرئة ساحته ..الى يومنا هذا منصور الهادى المرفود المطرود من حياض دولة سمو الهلال طلع من الكتاب الكبار يا سبحان الهلال هل ياترى ايمن كبوش عارف انا طردتك يا منصور الهادى وازلت عمودك من اصدارتى عشق البلد قبل سنيين ..ولا يمكن يكون هو واحد من العضويه المستجلبه بتاعة الخلاوى ايها والراوى حينها مرشح الرئاسه “الخندقاوى” عندما قدمتك له للعمل فى اصدارته التى كان بصدد استهلالها معية شباب وشابات من السوشيال ميديا ..الخندقاوى اتخلع من عرضك ولستة طلباتك وقال لى بالحرف دا عايز يفتح سوبر ماركت ..؟

اما حكاية كونى قاعده فى الهجير دى فريه ودليل خواء فكرى وسفه ..

لو القاره الاستراليا بقت حر الهجير ..الصقيعه اللى انت فيها  وهى “جخانين ” اصحاب المال بقت جنة الله على الارض ( تلك إذا قسمة ضيزى ) ..

السيد “هشام السوباط ” عندما تواصل معى شقيقه الدكتور” هيثم السوباط “..حينما كنت ازود وحدى عن لجنة التطبيع ..مشيدا بمقالى الذى زلزل مضجع نيابة لجنة ازالة التمكين لم تسول لى نفسى حتى اللحظه مطالبة “هيثم السوباط “التواصل مع اخيه لاى سبب من الاسباب واسالوه هيثم السوباط ..الذى عرض بنفسه على اجراء حوار صحفى مع هشام السوباط وعندما ارسلته له الاسئلة عمل طناش والله ما سألته نهائى ؟

ومافى زول اقرب للسوباط من اخيه ..ولتعلم عقب اخر مباريات سمو الهلال فى معسكر القاهرة الاعدادى ..ونحن جلوسا فى بهو الفندق طالبنا “هيثم عفيفى ” الانتقال للجلوس على مقاعد كافتيريا الفندق انا واختى والشهود على ذلك “كيمان “وعلى رأسهم المصورين والمكتب الاعلامى و الاعلامى “هيثم هاشم” ..لا وكمان اقدم هيثم عفيفى على نقل شنطة المشروبات والسندوتشات التى احضرناها ..الى احدى الترابيز ..وكان يقبع هناك سيد شباب الهلال العليقى واخرين ..فما كان منى الا وان طلبت من هيثم عفيفى الحى ما مات اعادتها ولم نبارح للصقه فى “العليقى”..وقع ليك..وحتى مران سمو الهلال الختامى من داخل الملعب عندما رفد الينا كل رجالات بعثة سمو الهلال انا وشقيقتى وعلى رأسهم رئيس البعثه فالعليقى والجنرال واسماعيل السيد والطاهر يونس .ونزار عوض مالك..مع حفظ الالقاب بعد السلام طلبوا منا الانتقال للجلوس الى جوارهم ..فلم نفعل وظللنا فى مكاننا ..اختى قالت لى :(يقولوا علينا شنو هسى متكبرين )؟..فاجبتها بل متشكرين ومقدرين ..ودرءا للشبهات  عنهم وعنا والزعيم الهلال ..التى قد تحوم حول البعثه حال تم التقاط صوره والنتيجه كانت ما بتسر الخاطر سيقولون هم ما كانوا فاضيين ..باختصار..عزة نفسى تاج راسى يا الحرامى المرفود من ديار سمو الهلال وصحبك ..!

لست لاعقة لاحذية رجال المال ولم توصد بوابات احدهم بوجهى فلست متسولة ولا اعيش فى جلباب الرجال ولا اقتات الفتات ..يا “القعيد” الفريحان بى اموال الرجال..لست رخيصة كالذى ولج بلاط الصحافه عبر اقتسام مرتب الاستاذ الرشيد بدوى عبيد معه يا “كبوش”..!..ولم الفظ كى استجدى اموال الرجال والتقرب اليهم زلفة عبر المؤامرات الدنيئة القذره لا استبحت خصوصياتهم ولا مسكت عليهم صور وفيديوهات زلاتهم وافراد من اسرهم ابتزازا للتقرب اليهم ..!!يا سبحان الله.

لم ادنس نفسى بحق غيرى منذ ان كنت فى ريعان الطفوله وسلوا عنى الجميع ومن الله خلقنى شفت اصناف من “الرجال “الشحادين” المتسولين العايشين على اكتاف الرجال بالكوم لكن جنس البقبل على نفسه اقتسام مرتب رجل اخر ما حصل لاقانى فى التاريخ اجمع ..!!.

@فى بريد العشق وانا بريد الوطن الهلال اى والله

=عاشق سمو الهلال “عبدالغفار عطاية الله “:(مهما كتبت لن اجد التعبير الزي يليق بقلمك الساحر مباراة التنزاني تحدي يقع علي عاتق كل لاعب يرتدي شعار الهلال شعار الهلال ليس بقليل ي ابطال الهلال ف انتم اشاوس وابطال وقدر التحدي قاتلو واقعو كل الالسن البتتكلم فيكم اخرسوهم وخليهم يهضربو زي مابهضربو حاليآ طموحاتنا اكبر من التنزاني بعد احترام الفريق طبعآ والان نسأل وسنظل نسأل حتي يصدر المجلس قراره بخصوص اللاعب “عيسي الامريكي” لنعرف ماذا يجري

كل هذا الكلام بعد التحيه لكي استاذه هويدا الماحي)

=عاشق سمو الهلال”ابراهيم الدنقلاوى”الرسالة دى “ادست” منى. عديل فوق اضابير صندوق البريد تاريخها قديم ماهو جديد كانت عشية التأهل على حساب “العدو المريخ ثم سانت جورج..جاء فيها:( نبارك للاهله الفوز المستحق..الليلة دا يوم السودان..البلد الليلة هلالابى..النيل الأزرق نشوان..والأبيض أبيض ياأحبابى..يامشرّف كل الأتيام..فى يوم السعد الافريقى مفرّح كبد الأيتام..”تنبيه*الألعاب النارية “الشماريخ” تضفي علي مدر جات الملاعب مشهدا جماليا- لكن يجب ألا نغفل المخاطر والقرارات المصاحبة من الجهات المعنية لاستخدامها وقذفها داخل الملعب ويمكن ان نحرم جمهورنا من دخول الملعب)”

=عاشق سمو الهلال “عزالدين حسن محمد”صدقوني الشئ الحصل دا ماطبيعي شئ مقصود وهناك من يسعي لدمار سيد البلد الشماريخ وتسلق السور كلها اشياء تم الترتيب لها بعنايه فائقه الله يحفظ الهلال من كل حاسد والله ياجماعه في بعض الناس كانت بتسعي لخروج الهلال في حالة الفوز نعم فرحتنا تمت ومافي حل تاني غير الشماريخ وتسلق اسوار الملعب ممكن غرامه ولو اتكررت ممكن حرمان جمهور الهلال من الدخول والجمهور هو الدافع للاعبين للتقدم في هذه البطوله)

=عاشق سمو الهلال :(على السخى)يا”معتصم محمود” ان كنت معنا في القروب وبتقرا .. انا بقول لك ابعد من “العليقى” وخليك في حالك .قال اي مصيبة خلفها العليقى !!!.ياخ بتكتب وانت نايم ؟!!الذى في عينه رمد يرى بصمة العليقى وطموح العليقى في صناعة فريق الهلال .يا انت دلقون وتساعد الدلاقين في مرماهم !! الدلاقين يسعوا بكل ما في وسعهم لازاحة العليقى من المشهد الهلالى .ويبقى نحن نساعد فيهم كمان)

=عاشق سمو الهلال”اسماعيل عبدالكريم محمد”:(يا سلام مرحب مرحب حبابك بت الرجال والله نورتي وشرفتي .. حبابك بت الرجال والله يشهد الله فرحنا بانضمامك لقروب “الهلال في قلوبنا”..يا بختنا بيك ويا بختك بالهلال ويابخت الهلال بيك).

=عاشق سمو الهلال “الطيب محمد احمد”الشهير بالطيب الخضر-:(والله اني احسب هذه الكاتبة الاولي دفاعا عن الهلال اتمني من الاخ الصحفي “محمد عبد الماجد “ان يترك طريقة كتابة عموده الذي اصبح للتسلية اكثر منه فائدة للهلال فهو كاتب متمكن وملم يجب ان ينتهج طريقة الدفاع عن مكتسبات الهلال والهجوم بكل شراسةوبكل اسلحة الزمار الشامل علي كل متسول تحدثه نفسه عن نهش لحم الهلال بسهم مسموم فهو قادر علي ذلك والله هو الموفق)

=عاشق سمو الهلال “عوض الله حسن الطيب”(ليك التحية والتجلة يا دكتورة هويدا الهلالية الغيورة وربنا يمتعك بالصحة والعافية وان يعينك لخدمة هلال العز والوطن)

@اكدة قناة قناة “عزام التنزانية” نقلها مباراتى الزعيم الهلال والشباب التنزانى (الذهاب والاياب) بدورى الابطال..ما يستوجب على حكومة دولة سمو الهلال التشاور مع “عزام” للبث الارضى .

@ليس كل مانفقده خسارة …الاستغناء ومعاقبةمن لايدرك قيمتنا حياة جديدة خاليه من المنافقين ..الكحه دى عن اللاعب الهارب “عيسى رمضان” .صباح الاستغناء.

@نبض العشق السرمدى ..نقرات عشق نمة ريد

يا غرام الروح ..يا هلال الروح يا سلاف الروح(فى حضرة من أهوى عبثت بيا الأشواق حدقت بلا وجه ورقصت بلا ساق عشقى يفنى عشقى وفنائى إستغراق مملوكك لكنى سلطان العشاق ويبقى العشق ما بقى سموالهلال !)

زرقـاء الـعشق

هُـوَيْـدَا اَلْـمَـاحِى

شاركها على
أكتب تعليقك هنا

لن يتم نشر عنوان بريدك الإلكتروني.