عِـشْقٌ سَرْمَـدِيٌّ– هُـوَيْـدَا الـمـاحى-رِفقآ بيْ يَآ وجعْ “..لقد خُدعنا..!!-إنقلاب مريخى باهت.. كم هان عليكم مريخكم ..!

-الموقع الرسمى ظل مغردا خارج السرب باعثا بالتأكيدات والتطمينات على التبارى مع فريق “مازمبى”..الذى لم يعتذر البته عن اداء الوديه ..كان ترضوا كان تأبوا الرماده فى خشمكم يا اعلام الضلال ..ويا بعثة فريق الزعيم الهلال والامانه العامه ..صدقت صفحة المشجعين فكذبتم وكذبتم علينا ..احترموا عقولنا ياخ وابرزوا الينا مخاطباتكم الرسميه مع ادارة الفرقه المازمبيه ..

وحكاية انكم زعلتوا وسألتوا ادارة مازمبى :(مازمبى ما زمبى يا اللخو مازمبى تلعب لى بى “اتنين” نفر بس ..والبقيه من فريق تانى ..اسمه بوسكو..؟ هى (كوره ولا دسكو )..بينما صفحتكم عديمة الفايده والشغله قاعده فى السهلة..ابسط حاجه المواعين السقتوهم مع البعثة ديل تحت مسمى الاليه الاعلاميه كان واحد فوقهم يختف رجله الى معقل مازمبى لاستجلاء الامر ..!؟ دا كان لسان حال اعداء المجلس والمتربصين الراجيين ليهم فرد هفوة لوتسيع الجفوه..!

-اما فى واقع الحال فريق مازمبى مقدم الاعذار بعد سؤال ادارة بعثة سمو الهلال مازمبى ما ذنبى ..وشنو السويته ليا ..سويت ليك شنو ؟ ومبرراتهم بالايقاف من قبل الكاف والسم الزعاف والمرض الرجاف “الكاف اوقف 5 من لاعبيه وإصابة 4 لاعبين في صفوفه )..ما مقبوله وفيها عدم احترام للزعيم الهلال كان يتوجب على ادارة مازمبى تمليك الزعيم الهلال الحقائق كامله قبل وقت كاف ..!

السؤال “المحرقنى ” شديد صفحة الجماهير الموثقه عرفت من وين انه هذا المازمبى لحس لسانه ..واعلنتها من بدرى وما كضبت ..؟

الناس لازم تعرف وتعترف الحصل قصور ادارى يا “العليقى” و”حقارى” عديل من “مازمبى” يا مستر فلوران ..ما بندفن روسينا فى الرمال ولن نغالى ولا اتحدث عن المردود الفنى حتى لو لعبها البروف فلوران تقسيمه داخليه فهى ذات مردود ايجابى حتما دون ادنى شك ..؟

ولكن التغبيش والاستغباء غير يخصم من رصيدك ما بفيدك..تحلوا بالشجاعه واعترفوا باحد الامرين واحلاهما مر

1-تعرض الزعيم الهلال لخديعه من مازمبيه اذا يتوجب عليه توجيه خطاب شديد اللهجة للفريق الكنغولى على هذا التغرير ..حيث مكث سمو الهلال اياما كافيه للبحث عن فريق بديل للتبارى معه غايتو السواها مازمبى رقدت رز ..!

2-لم تكن هنالك مكاتبات رسميه حتى تلزم مازمبى اداء الوديه بفريقه الرديف ان شاء الله ..ولا كمان ما عندهن رديف ..؟..هلالاب ماومبى ما احترمنا ومن الفرحه حرمنا استقل طيبتنا وسماحتنا وكرمنا ..!

@فقد المريخ التحكم بصفحة النادي الرسمية وسط شكوك بإستيلاء” الإدارة السابقة عليها” ياكافى البلاء سمعنا وسلمنا ..لكن السؤال هو الادارات السابقات كتيراارت ..ياتى فيهن ..؟السودكاليه ولا الحزوميه المرميه البارحه ..؟بينى وبينكم عدو الزعيم الهلال الجرثومى الجاكومى .الما بخاف من الله .بعملها ..؟

سمح ككيف تم تعيين لجنة ابوجيبين ..؟ و راس ماله انه وعد بالتمديد “التجديد” لاربعه من اللاعبين ..؟ عليكم الله دى هملت شنو ورخصة شنو ..؟ اهان عليكم مريخكم الى هذا الحد اى جلابى عنده تعريفتين تختوا فوق راسكم ..”ابوجيبين “دا مرقتوا من وين اخير “حزومى ” ابو الشورت البنصل لانه على الاقل  “كنسل” ..ابوجيبين دا يطلع مين وجبيتوا من وين ..لا دفع ليكم الغرمات عشان يرفع عنكم العقوبات ولا حتى “كشكر” ليكم بالدفع ساكت ؟

@فى بريد العشق وانا بريد الوطن الهلال -اى والله!

=عاشق سمو الهلال “عمر بيناوى”:(لك كل الود والتحيه استاذه هويدا صاحبت العشق السرمدي ولك الحق ان تفخري بحبك وعشقك الجميل هلال الوطنيه والوطن اتابع عمودك الراتب يوميا لما فيه من الحقائق في ردم المتسلقين من بعض كتاب الاعمده وكشف عوراتهم لاكن اليوم اعجبت ايما اعجاب بردمك للمدعو منصور الهادي المتسلق وهو يعتبر زاكرتنا سمكيه ونسينا ما كشفت عنه الاعلاميه فاطمه الصادق إبان عهد الكاردينال واصبح هذا الدعي يمجد الكيزان ويسبح بحمدهم في بعض قروبات الهلال السياسيه وعلي ما اعتقد فقد فقد البوصله تماما واصبح يهرطق في كل الاتجاهات..كل الود والتقدر وحب الهلال يجمعنا..نحن كهلالاب لنا الشرف والفخر بوجود امثالك في محيط الهلال وانتن تزودن عن حياض سيد البلد بالاعمده الهادفه والتصدي لكل من تسول له نفسه مس معشوقنا وحبنا الهلال باي كلام خارج النص لاكن ياستاذه كبد الحقيقه دي كلمه تلوع الكبد علي قول اهل الخليج وتزكرنا الانسان الاحوص الحاقد مزمز ابو القنابل وكان تقولي عين الحقيقه وبما انك صحفيه محترمه لايمكن نصححك وكلمتك صاح وفي محلها لاكن كرهنا لصاحب ذلك العمود النتن الذي يحمل نفس الاسم والفرق مابين الارض والسماء..مابين اسم العمود ومحتوي العمود)

=عاشق سمو الهلال “ابوقصى ” السعوديه:(يا لروعة الكلمات التي تدق الحماس في العشاق قبل اللعيبه قلناها ونقولها كل يوم بأن يراع بنت الماحي كل يوم يقطر ذهبا مصفي في حق سيد البلد وسما زعاق بإذن الله لاعدائه ومن سار سيرهم من المرجفين..وقلوبنا وافئدتنا اليوم تتضرع للمولي عز وجل أن يسهل أمر الهلال في تجربته الودية الخارجيه أمام احد أعنف فرق القاره متمنين له الفوز واسعاد الملايين..اما بالعوده للأحداث التي جرت يوم مباراه التاهل قلناها من قبل ونقولها اليوم بأنها كانت بتدبير من أعداء الهلال وتنفيذ من أصحاب النفوس الضعيفه واما من يهم أمر الهلال من تلك الأحداث براء حتي لو حاول البعض تلفيقها لهم ونتمني من إدارة سيد البلد أن تعمل كل ما بوسعها لمنع مثل هذه الأحداث في قابل اللقاءات لان الأعداء كثر ولابد من تفتيش الدخول واتخاذ كل القرارات التي تحفظ حقوق سيد البلد وليتهم استعانو في ذلك بالتوصيات التي تسوقها لهم بنت الماحي كل يوم والتي تقرأ الأحداث من كل الزوايا وكل همومها مصلحة الهلال واسعاد عشاقه. ونواصل)

@مانشستر زرقاء.. -اى والله “السيتى” عفيت منه امس اكتسح المان يونايتد بسداسية مذلة..!

@انى أغرق ..اغرق ..انى اتنفس عشقا أزرق ..سَيْلٌ عَرِمٌ.. عَظِيمٌ زَاخِرٌ..من “أساطين العشاق “داهمنى وغمرنى البارحه عقب نشر عمودى التانى ..من كل السحنات والاعراق طَوَّقنى..طوقوا عنقى بايات البسالة والتضامن منقطع النظير..للذين اسرفوا على انفسهم (مَّا لَكُمْ لا تَرْجُونَ لِلَّهِ وَقَارًا).