عِـشْقٌ سَرْمَـدِيٌّ– هُـوَيْـدَا الـمـاحى-هشام السوباط حرام والله حرام يا ريت ما كان دا إعلام- اتحاد “الـعـرر”.. إقصاء منتخب  الناشئين خطب جـلـل إستقيلوا

عِـشْقٌ سَرْمَـدِيٌّ– هُـوَيْـدَا الـمـاحى

هشام السوباط حرام والله حرام يا ريت ما كان دا إعلام

اتحاد “الـعـرر”.. إقصاء منتخب  الناشئين  خطب جـلـل إستقيلوا

استراليا -ملبورن-عشق البلد

@الله الوطن الهلال..1898..!..افراح الوطن الهلال..!..يا هلال الروح يا سلاف الروح..!

@”أساطين العشاق” سلاطين الكيف والكيف هلال يتجلى ..سبت اخضر ..عصرا موشح بالنصر والفال  تلاته عصر بتوقيتنا موعد مباراة سمو الهلال والشباب التنزانى..المباراة ستكون مفتوحه على كافة الاحتمالات..علما بان قناة عزام ليست الخيار الامثل “للبث” ولكن ما باليد حيله..! 

@ مباراة سمو الهلال فى تنزانيا حكايه تانيه صاحبت الرحله اليها الكثير من المواقف السالبه والموجبه ..ودا شى طبيعى جدا .. سنعود للكثير منه لاحقا يعنى دا ما وكته ..دا وكت الدعاء والتضرع لله للخروج بنتيجة ايجابيه من معقل الشباب ..بعدين حركة النابى الما دسيسه دى ما كان فى داعى لى ترويجها بتاتا لكن نقول شنو ..؟ الناس ديل” ججت” بستغلوا طيبتنا وسماحتنا ..”النابى” شاطر عايز يمرر اجندته علينا من شان كدى قام اتصل بينا نظام بنج موضعى واصحاب اصحاب ..بعد صافرة النهاية حبابك يا “النابى” ابقى اتصل .علينا ! .

خلونا فى مباراة الارض لازم نلعبها فى عز الضهر ..”على الهلال بالسبعه”..ناس فريق الشباب..الشمس بتخليهم زى “حلاوه قطن” سريعة الذوبان .

@حكومة دولة سمو الهلال ..ما زلت اسأل عن تركيب الاضاءة وغيرى يتوسل اليكم بان “احيوا” قناة سموا الهلال هل تسمعوننا ..؟ هل من اذانن مصغية الينا ..؟

@ من “ناس تلب” ديل وآسفاى .. الله يكفينا شر تسلقهم السور فى الاستحقاق الجاى ..والاولتراس عليكم النضمى معاهم ولفت النظر عشان ما يتكرر الحصل عشية التأهل على حساب العدو المريخ وسانت جورج..التزاكر اطرحوها قبال اسبوع تمام واوصدوا دونها الابواب يوم المباراة ..!

@حزومى عبر اثير الاذاعه يا ابوجريشه عليك بال”الْحَسْبَلَةُ”..!مزمل ابوالقاسم عمل لى داونى بالتى كانت هى الداء بنفس الطريقه الجابنى بيها المريخ كشطنى وكشحنى وجاب ابوجيبين ..!

@ افاعي الانتر السامه فى سان سيرو!..فشلوناب طيروا..يا فار يا فار ياصغير يا حفار سيك سيك ناو ناو (إنتر ميلان جندل برشلونة بالفار )..بشتنونا بهدلونا وشلبونا شلعونا ناس إنتر ميلان ديل اذونا .. بالفار..!

@يا ايامى طيبى ..الاهلى الليبى يا حبيبى ..(غير وتي للشوايا فحيمة تصهر النجيمه)..منتصرين باذن الله معاكم فى كل مكان سندكم وزادكم فى ملعب شيكان.

@فى بريد العشق وانا بريد الوطن الهلال -اى والله-

=عاشق سمو الهلال ” ابو قصى “:(السعوديه:(ويبقي العشق ما بقي سمو الهلال كلمات ذات معني كبير هي التي تكمن في دواخل ثمانين في المائه من اهل السودان ولذلك صدقت بنت الماحي صاحبة القلم الذهبي عندما قالت بأن غالبية من ترأس الوصيف هم في الأصل من عشاق سيد البلد ولا غرابه وكذلك اللاعبين الذين ياخذو الشهرة في الميادين بشعار سيد البلد يسعي الوصيف لضمهم وعندما سعي الهلال لمعاملتهم بالمثل اصبحو يصيحون إدارة ومشجعين..بإذن الله الهلال سيكون له كلمات وكلمات في هذا الموسم في البطولات المحليه والقاريه وستتوسع القاعده وتزيد وعلى أهل الوصيف توحيد كلمتهم والاتفاق علي احدي الادارات لتحل مشاكلهم.

تحياتي)

=عاشق سمو الهلال” الزعيم ابراهيم :(استاذتنا الجليله هويدا الماحى ..والله العظيم انا فخور بيكى وشاهد على تضحياتك الجسام فى سبيل عشقك الهلال والله بتزكر الصحيفه الحائطيه كنتى بتحريرها لوحدك وتعليقها فى اسوار نادى الهلال كانت قبلتنا ومزارنا ..وانت طفله فى الابتدائى ..وازكر ليكى موقف عظيم شهده بعض الاخوان عندما تلفتوا يمنة ويسره اداريين ومشجعين منو البقول للثعلب كفايه اعتزل هتفت فى وسط الجموع انا لها وبالفعل التقيتى الثعلب بمنزل الراحل الطيب عبدالله وقلتيها ليهو ..علمنا انه هاج وثار وانفعل فى وشك لكن ما اشتغلتى بيهو الشغله ومن يومها تانى ما دق الكوره..انتى اداريه واعلاميه عظيمه اخدتك الغربه من الهلال نتمنى عودتك الهلال يحتاج امثالك)

=عاشق سمو الهلال محمد احمد علوب:(يا استاذه هويدا اجواء تنزانيا بارده شديد ..دى حقو الناس تطرقها بشده..يفترض الاعلام كله يطرح على المجلس اقامة المباراة فى الشمس انا بتكلم دايما بقول انا ذد مثالية المجلس التامه لو عندك اموال  قارون وما عندك ” “شفوت ” صعاليق كوره ما فى فايده لعبوهم العصر الساعه تلاته والشمس بره )

@ماهى المعايير التى تسند عبرها رئاسة البعثات من قبل اتحاد الدلاقين وما المغزى من “غز” الدلقونه ..رئيسة لجنة كرة القدم للسيدات ” منال علي بشري المنصور”..فى بعثات دولة سمو الهلال ..كانت هنالك بارض مصر فى مباراة سمو الهلال القاريه الاخيره امام الاهلى القاهرى المتواطئ النتن ..سمح شنو تانى البخلى اتحاد السجم يعينها رئيسة لبعثة سمو الهلال لتنزانيا..؟

@”موسى كانتي”..”بقى روووب “..اقصاء منتخب الناشئين من سيكافا بسبب تحاليل “الوجه” ..ومعصم اليد..خطب جلل يجب الا يمر مرور الكرام يستوجب معاقبة” المتلاعبين فى اعمار اللاعبين “..اياك اعنى يا مريخ الكفاوى والبلاوى والرشاوى .. سبب الاذيه ..واحيييا..زتانى وتالت وسابع احييا ..بعدين يا معتز الشاعر البرقص ما بغطى دقنه بطل “تهجيص” بلا استقاله بلا بطيخ ..انت وكت محشور ومصنقر فوق “جخانين” الكاف مالك كان غالبك تحذرك كلية منتخب الناشئين من مغبة الوقوع فى شرك فحص المعصم بالرنين المغنطيسى ..ولا ما سمعت بيهو علما بانه تم تطبيقه من سنة حفروا البحر 2009..؟ حالتو فحصوا المعصم ما مشوا للعرقبوا كان واطاتنا صبحت العراقيب فوقها الرواكيب يمين كان طلع اكبر من صلاح نمر ذاته.

@ألاحد16 اكتوبر قيامه وقايمه  نار حمراء ..(ليفربولxمانشستر سيتي)-

(باريس سان جيرمان x مارسيليا) ..الله يحرق برشلونا فووق جحيم الملكى الريال فى دورى الابطال والله لنتكيف..!

@لى القلبى بالريد ممتحن .. راجياك متين قلبك يحن ..رقمك يرن ويزيدنى جن

دايراك اهل عزوه وسهل.. دايراك سكنك ..مولاى  لو قلبك فطن  راجياك وطن

@حرام والله حرام يا ريت ما كان دا إعلام ..الاليه الاعلاميه بدولة سمو الهلال عباره عن “خشخيشه”..ريسوها وتيسوها..الخلاء عليها ..امة الهلال جمعاء مستاءة من الاليه الغريبه السوباط اخوان يتعمدون ضربها ضربا مبرحا لامر فى نفس يعقوب -اى والله- السوباط الكبير كيه فى السواد الاعظم مشغل “ايمن كبوش” للتسريب ..كل الاخبار .سمح وكت انت يا السيد السوباط شايف الاليه الاعلاميه مجرد “بت ام لعاب -وخيال مآته” كنت تمتكل درهم على الاقل من شجاعة الدكتور اشرف سيد احمد الكاردينال وتعلن عن “كبوتش” منسقا اعلاميا ..انت بتتشيل يدك وتطبز بيها عينك ..بتضرب فى الاليه الاعلاميه لصالح علاقاتك الشخصيه ياخ حلها وخت “كبوتش ” فى محلها ..المساكين المبعدين يجيبوا ليك الاخبار من وين ..؟بعدين عليك الله فهمه انك فرضته مستشار تحرير لانه المسكين ما بعرف تبعات التعيين اسحف بوست كتبه اعلن عبره التوقف عن كتابة “عمودك”اى والله عمودك ما عموده فى اصدارتين لا شنى قال قال من شان واحده فوقن نشرت “عمودكم” فوق القروبات ..اول مره فى التاريخ اشوف لى جريده بعاقبوها بى ذنب اختها ..والاغرب انه مستشار تحرير احداهن ودا اكبر دليل على انه مجرد “كومبارس” وتعيينه بغرض استلام الكاش ليس إلا ..!

@نبض العشق السرمدى ..نقرات عشق نمة ريد..يا غرام الروح ..(عشقى يفنى عشقى وفنائى إستغراق مملوكك لكنى سلطان العشاق ويبقى العشق ما بقى سموالهلال !)

زرقـاء الـعشق

هُـوَيْـدَا اَلْـمَـاحِى