عِـشْقٌ سَرْمَـدِيٌّ– هُـوَيْـدَا الـمـاحى- غدا يسطع الهلال فى سماء القاره.!

@ هلالاب “اساطين العشاق” :كونوا السند وابقوا الوتد .ابقوا الصمود ابقوا الجلد..عزوا الحبيب سمو الهلال سيد البلد ..ان تنصروه بالدعاء سينصره الله على اقوى الانديه التزانية جمعاء ..الا وهو “الشباب” ..!

فريق الشباب يا الاحباب اقوى واعتى  من فريق “سيمبا “..وكل الخير فى التبارى مع الاقوياء للمضى قدما بشراسة على عتبات الابطال ..تفتكروا الدلاقين الملاعين استفادوا حاجه من التبارى مع “المعفنه- سلارى “..برى وحاتكم والشباب التنزانى ذاته صعد على اكتاف زعلان الجنوب سودانى الهوان ..عشان كدى “حيكشر ” عن انيابه قدام الزعيم الهلال ..هم يحسبون  ان معرفة مدربهم “النابى “..والمامه بتضاريس دولة سمو الهلال كرتا رابحا ..سمح انحنا ذاتنا بنعرف عقلية” النابى” وفكره التدريبى “..وفلوران كورتكم عنه ماها “غريبى” شاربها شراب ..والحشاش”  ملا شبكته ..ومافى حشاش سبق الزعيم الهلال فى الحش وجاب للدلاقين الملاعين المغص غير دولة سمو الهلال المصنف مع الكبار اوووى جدا ..!

@اهلي طرابلس ..جاب القنبله “محمد المنير “..مشتكى المريخ فوق محكمة الكاس ..سجلوا زى الزواج العرفى بالدس ..وما اتحرك ولا شبر من بلده بعد توقيع العقد ..وصبر لحدود مافتر ..وقام طوالى ستف الشكوى لمحكمة الكاس عدل ..حالف ومتندر ومتيمن يسقي المريخ كؤوس العلقم جوووه الملعب ومن محكمة الكاس..تشربوا ما ترووا

@ فخامة هشام السوباط ..النطاس البارع “قدوره” وينه ؟-لست بحاجة الى توضيح كونى كنت فى خط الدفاع الاول عن “لجنة التطبيع “منذ لحظة الاعلان عنها ولا تربطنى بك ولا اركان حربك اى صلات او تواصل ..كنت ادافع عن استقرار الوطن الهلال ..وتوسمت فيكم خيرا كثيرا ..”حدثتنى..نفسى”..عنكم ولم يحدثنى أحد سوى نفسى انكم :(غَيْثُ مُزْنٍ غَامِرٌ حَيْثُ يُجْدِي..وَإذا يَسْطو فَلَيْثٌ أَبَلُّ)..وظللت اسجد للرحمن شكرا على اننى لم اراهن على جواد خاسر ..!-ولكن  اسمح لى “انقول” ليك ظني أن صفحتك قد تولى امرها حديث عهد .. جاء يكحلها قام “طبزها ..وعماها”-اى والله-هاكم دى مثلا :(صحيح انها تزعجنا وتكاد تحطم مقاديف قدرتنا على احتمال هذا السلوك الذي يخدش هلاليتنا..وهلمجرا )..وهل ياترى يا عنتره دا كلام موزون ..؟ بربكم ماهذا ولماذا..؟ فاتنى اقول ليكم الكلمات ديل “لقطهن” من فوق حيطة صفحة رئيس دولة سمو الهلال “هشام السوباط”..منشور حمل من التناقضاءت ما “” تنوء بحمله الجبال ..!!..ودا واحد من اكبر بلاوى حكومة سمو الهلال ما بدوا العيش لى “الفران” ..الموضوع مجرد شكوى اى ممارسه ديمقراطيه ..من قبل شخصين من اعضاء الجمعيه العموميه اول التبادى شكوى يعنى تقاضى ما فرقت داخل لجان النادى ولا ان شاء الله حتى فى “لاهاى”..اول التبادى رئيس سمو الهلال يعنى رئيس دولة يعنى للفخامه عنوان..والشكوى لم تمس طرفه بل استدعى الامين العام ومن ثم تم استدعاء نفر من رجالات حكومته وليسوا جميعا من اعضاء مجلسه ودا طبيعى جدا جدا جدا ..لجنتنا وفى “حلتنا” يعنى جووه بيتنا ..وبنحل شكاوينا وبنقدس الديقراطيه..الدخل السيد الرئيس هنا شنو ..؟ يفترض الامانه العامه تصدر بيان توضيحى عبر الموقع الرسمى والقانون ياخد مجراها ..و” العارف عزو ..بتنزل عليه “قرآن” جمال الوالى ..!!!

-عندما يصدح  فخامة الرئي بالقول لاحظوا الرئيس نفسه ما زول غيره: ان الممارسه الديمقراطيه..مصدر قلق وازعاج ..بل ريح هوجاء تكاد تكسر مجاديفنا ..اجى ..؟ ما الذى يرعبكم ويؤرق مضاجعكم من الممارسه الديمقراطيه بل  وكمان “يخدش هلاليتكم “..؟

(اذا فالتعلم سيدى الرئيس عشقنا السرمدى سمو الهلال لا بتهبش ولا بتخدش ولا بتلحق ولا بتلمس ..دا بعد هلال السماء من المسك .. لا قهقرتنا السيوف ولا هزتنا محنة ..دا عشق عظيم يا زول ..!

بعدين معقوله بس “حتة” شكوى ديمقراطية المظهر ..حتى لو قدر لها ان تعجن بخميرة الدسائس والمكائد فهى حتما لن تزلزل عرشا جبارا ..الغريبه انت فى نفس المنشور وصفتها بالممارسه الديمقراطيه ..سمح كيف لها ان تضحى  بالنسبه لكم  زلزالا مدمرا ..؟ اى قاصمة الظهر ..؟ يا سبحان الله قسما عظما الكتب ليك البوست دا ما استخار نوهائى ..والتوقيت ذاته زباله ..اما كان حرى بك ان تخرج علينا بما يلهب حماس فرساننا ويحفز جماهيرنا ..؟ بربكم ما هذا العبث ..؟

@مزمل السايق المريخ بالخلاء ..كتب :(إذا كان قرار تعيين اللجنة الجديدة “قاصد “اللت “الكومبارس ..باطلاً فقرار تعيين التي سبقتها (أبطل)..!

@ فى بريد العشق وانا بريد الوطن الهلال-اى والله.!

=عاشق سمو الهلال “يوسف الجبادى “:(اخوان بت الماحى سلام الهلالاب ويتقدم امامهم مدربهم الذى لابد له ان ﻻيكون تقليدا بل عليه ان حديثا يواكب اما الاخت هويدا لقد اصبحت ﻻتطاق من قبل الحساد والمندسين والمتملقين الذين ﻻيعرفون فرح النصر ومرارة الهزيمة اما عن الاخت هويدا حدث وﻻحرج فقد اتعبت وارهقت روحها وهى كالمحاربة التى تحمل سلاحا ابيضا وهؤلاء يحملون اسلحة فتالة على الاداريين اتمنى ان يعوا م تقوله هذه الباسلة ام الاعبين فيكفى شرفا ان لهم قلما يمجدهم يخلدهم يعظمهم لكن نحن نريدهم ان يتلألؤوا بدرا كاملا فى سماء كل ارض تطأطى اقدامهم الهلال هو قاهر الكرة الافريقية والعربية ..ي جماعة خلونا نفرح دون شماته عاوزين هلال كهلال 87..سلام.)

@الاشقاء فى الاهلى طرابلس”قدموا شكوى من ارضية ملعب شيكان..لمراقب المباراة ..الشكاوى ملحوقه انتوا فوزوا بس وفى طرابلس افرموهم فرم ..!

@من اقوال مزمل ابوالقاسم :(يسوؤني أن لا أستجيب لمناشدة صديقي وزميلي الحبيب إسماعيل حسن، لأن من تشفع فيه لا يستحق سوى “النعال”..؟ الله حى

@ وكتين حط سمو الهلال رحله باراضيها أَخَذَتِ زُخْرُفَهَا وَازَّيَّنَتْ..”تنزانيا” بقت حاجه تانيه بالله اتقول “اسبانيا” بس ..واتقسمت نصين .. ..باكر الزعيم الهلال يروض “الشباب” ويفرح الاحباب باذن الله..!