عِـشْقٌ سَرْمَـدِيٌّ– هُـوَيْـدَا الـمـاحى(ج-1) -بـوح  سلاطين الكيف..اساطين العشاق

عِـشْقٌ سَرْمَـدِيٌّ– هُـوَيْـدَا الـمـاحى(ج-1)

بـوح  سلاطين الكيف..اساطين العشاق

الخرطوم-عشق البلد

أساطين العشاق :عزوتى وسندى ..وتاج راسى ..الليللى دى تاوقت فوق “المشلعيب” لقيته الخلاء عليهو ..فاااااضى ..حسيت بالحسره والندم..وقلت سلاطين العشاق سمو الهلال  عايش بى حسكم الله لا جاب اليوم البسكت خشومكم ويدسكم وبينما كنت ساهمة حزينة شاردة ..سمعت لى صوت “كرعين” عند “النفاج”..ولقيت ليك ديك يا الرسايل الما خمج المره دى من شان كتيره دزوها بالنفاج ولا يا ربى تقليدا لتزاكر  الحرب النفسيه من “الاهلى “الليبي الجننت” التابع المريخ”..! 

@عاشق سمو الهلال “مهندس”طارق عبدالماجد”:(تحياتى الماجده الصنديده “هويدا الماحى” ..وكل الهلالاب انا والله ندمان وسافى التراب ..واكتر حاجه هزتنى لما رديتى على “اعكس الايه وخت نفسك فى مكانى..الانسان سمعه ..وانت دنستها دون ان يهتز لك ضميرا ..تقدر تقول لى ماذا جنيت؟ والله العظيم فى اللحظه دى انا جنيت عديل يا استاذه..فعلا سالت نفسى لاول مره انت يا طارق استفدت شنو من ..؟ والله ولا حاجه ..بالعكس انا حصلت معاى مصائب كتيره ومافى اوجع من “جناك” لما ربنا يردها ليك فوقه..وحاجه تانيه هزتنى انك ما عفيتى عنى على الخاص بل اعلنتى عفوك عبر عمودك ووجعتنى ودمرتنى وعذبتنى (عفوتُ حتى لا يكون لنا عند الله لقاء”)شكرا اخوانى الهلالاب انا تابعت تعليقاتكم على الفيس وفى بعض قروبات الواتساب ..وشكرا استاذتنا الجميله هويدا الماحى لمراعاتك وانتى تختارين اسما حركيا بديلا عن اسمى حتى لا يكون اعتذارى سببا فى نفور الهلالاب والاهل والاصحاب عنى كم انتى عظيمة هويدا ..اسمحى لى عبر عمودك اوصل صوتى ورسالتى لى كل الناس ما تسمحوا لانفسكم بالتشهير من اى زول عبر الاستماع الى الملاعين وما يقولونه عن الاخرين وانا عن نفسى تانى حتى لو شفت شوف العين خشمى عندى ..!)

@عاشق سمو الهلال “محمد طه الامين شقدى”:(الله يجبر بخاطرك … ويديك علي حسب نيتك)

@عاشق سمو الهلال “ابراهيم الدنقلاوى “:(اختنا الغالية الأستاذة الفاضلة هويدا الماحي بالله ركزي علي كلامي بتاع الشماريخ والنزول للملعب شوفي الآن القرارات الكنا خايفين منها ..اليومين ديل كتري من الإرشاد والتوعية والتحفيز عشان نكون في السليم قدامنا مهمه خطيرة يا نكون يا لا نكون والهلال قدرها بإذن الله)

@عاشق سمو الهلال”ابراهيم النور”:({إذ تلقونه بأَلسنتكم وتقولون بافواهكم ماليس لكم به علم وتحسبونه هينا وهو عند الله عظيم }الإنسان ليس مكلفا إلا بنفسه ولن تحاسب على أخطاء غيرك حتي ولو ذلك حقيقة وأن السير خلف إساءة الظن قد يدفعك إلى التهلكة من حيث لا تشعر..لذلك لاتستيطع التميز بين الناس بما تسمعه منهم بعضهم حاقدين كما ذكر الاخ في المقال وحكم علي الاستاذة هويدا الشريفه الكريمة سليلة الكرام بما سمعه لكن يمكن أن تميز بعد التجربة والتعامل معها مثل الملح والسكر لا تفرق بينهم الا بعد التذوق..لاتحكم علي الناس وأخلاقهم بمجرد النظر والسماع هداك الله)

@عاشق سمو الهلال”ابوقصى” السعوديه:(عاشقة سمو الهلال صاحبة التميز في العشق السرمدي لك التحيه ولقلمك الرائع مع بداية المشوار المحلي وسيد البلد يتربع على عرش البطوله من اسبوعها الأول برباعيه ذهبيه باقدام محليه واحترافيه تنبئ العشاق بموسم كله فرح بإذن الله وليلة الأحد هي اللقاء المنتظر ليكتب معشوق الملايين اسمه باحرف من ذهب في سجل الكبار بحول الله وقوته….نعود للمباراة القادمه ونرجو الملايين من العشاق داخل الميدان بالحزر ثم الحزر مما هو ممنوع لدي الكاف وان كنا على يقين بأن الدلاقيين الحاقدين لهم يد في ما يحدث بمساعدة الماجورين من ضعاف النفوس حتى بعطلو مسيرة سيد البلد ولكن نقول لهم هيهات وهيهات متضرعين للمولي عز وجل أن ينصر الهلال في اى محفل محلي وقاري ولك التحية بنت الماحي وانتي تسعدي الملايين من عشاق سيد البلد بكلماتك التي كلها خيار من خيار… ونواصل).

@عاشق سمو الهلال”فاروق السنى “:(الاستاذة الصحفية المخضرمة عاشقة الهلال الصنديدة التي لاتخاف ولاتهاب من اجل الهلال العظيم والمصادمة في كل من يحاول الاساءة والتقليل من الهلال العظيم ، لقد ضحت كثيرا من اجل الهلال..واقول للاخ المهندس طارق عبد الماجد قيل ان بعض الطن اثم والاية اذا جاءكم فاسق بنبأ فتبينوا لان الوسط الرياضي والقروبات مليانة بهذا النوع من البشر والمابعرف بت الماحي فهي انسانة شريفة عفيفة اليد واللسان نظيفة الاصل والفصل ومن اسرة كريمة وعائلة كبيرة ممتده داخل السودان وخارجه وان كل الذين يطلقون السهام السامة ويظنون ظن الجاهلية الاولي فان سهام وظنهم ردت اليهم ، فارجو من الناس ان تتحري قبل ماتكتب وتسيء الظن لان عاقبة ذلك سوف تظهز عليه في الدنيا قبل الاخرة٠اختنا بنت محمد الماحي مهيرة وصنديدة الهلال بت العز والشرف امضي الي سبيلك ولاتلتفي لشذاذ الافاق والنفوس المريضة وانتي تساوي عشرة منهم واكثر..حفظك الله وحماك ورعاك ووفقك واكرمك وحبب فيك خلقه وابعد عنك الحاقدين والحاسدين وذوي النفوس المريضة من شذاذ الافاق ، وتسلمين)

@نبض العشق السرمدى ..نقرات عشق نمة ريد.. غرام الروح ..(من الأعماق ناداني حنينك وعيش كمان حياتي سنينك كل جوارحي تقول أهواك -ويبقى العشق ما بقى سموالهلال !”)