عِـشْقٌ سَرْمَـدِيٌّ– هُـوَيْـدَا الـمـاحى(ج-2)-سيسطع سمو الهلال على المَلأُ  فى ثوب عرس.!

 سيسطع سمو الهلال على المَلأُ  فى ثوب عرس.!

قدام قدام للشباب أعدام  إعدام

استراليا-ملبورن-عشق البلد

@هلالاب اسلطين العشاق :يقينى اننا الصاعدون المتأهلون لا محالة فاعل ..سندحر الشباب التنزانى ..ليس تقليل من عنفوانه التنزانى فريق صعب بالحيل مدجج بالمبدعين..وخبرة مدربهم “..النابى “ بسمو الهلال والكره السودانيه.. كفتنا باذن الله هى الارجح ..سندفن الشباب!

@أساطين العشاق..الحِجُّ الى الجوهرة المفخرة يوم الاحد ..خلونا نقول لمن استطاع اليه سبيلا..والناس المشاتره وما بنسمع ليها صوت الا وكت 

معارضة قرارات المجلس ما بقولوا “بغم”..وكت الدفع ..وكت مجلس الاداره يصرف صرف “الجن” تلقاهم لابدين وساكتين ..كم وكم تمنيت ان يقترح احدهم ان شاء الله “ختت”صندوق لدعم المجلس بس فالحين فى الفوجاج والفشخره وترديد الهلال لشعبه ولشعبه القرار ..سمح كونوا ذلكم الشعبى الذى يقدم التضحيات والدعم العينى و”اللوجستى” ..!

@فعلا التزاكر قايده نار حمراء. يا حكومة السوباط ..خفوا على جيوب العشاق..ليست نظره احادية الجانب لا وربى اعلم ان سقف الصرف على فريق كرة القدم وحده يقفز عالية مقارنة بميزانية دولة السودان نفسها لكن الرفق بالعشاق “فضيلة..!

@ طرحت اليوم  الجمعه تزاكر  مباراة الاحد..من  الساعة 2 ظهرًا وحتى 8م..على في كافة منافذ البيع المعلنه :_(ام درمان الجوهرة الزرقاء–أبو الأمين للمعدات الرياضية شارع العرضة _- استاد الخرطوم- ركز ابشرا للموبايلات بمول عفراء- البحرين للمعدات الرياضية بشارع الجمهورية بحرى استاد التحرير- شرق النيل- صرافة Mb Mini Bank، الفيحاء مربع “2” جوار مدخل الردمية..والكاش بقلل النقاش تدفع تقطع شغلك بيتك ترجع.!

@الاليت حكومة دولة سمو الهلال عادت القهقرى الى سنوات خلت كنا نعول فيها على صدنوق موصد باقفال شداد غلاظ ..نصب فى صحن صالة الاستاد اعلاه فتحه بتدخل القروش عندك جنيه بتجدعه عندك قرش “ابوقرشين”عندك تعريفه ان شاء الله حتى لو مليم ..تجى التمرين او المباراة او لو جابك الطريق بتجدع الفى النصيب وعادة يتم فتح الصندوق فى توقيت بعينه عبر لجنة وتخصيص القريشات لخدمة سمو الهلال ..ليتكم كمان فعلتوا التزاكر الاكراميه ..بعدين وين ناس الخندقاوى المرشح المنسحب القال سيكون داعما لسمو الهلال الدعم وينه ..؟ ووين تنظيم فجر الغد من دعم سمو الهلال وليس مجلس السيد هشام السوباط متى ستدعمون ..؟ دا وكت حوبتكم ومحبتكم ان شاء الله تتقاسموهن قصدى تخفيف عبء التزاكر على الغلابه.

@بالله شوف التابع المريخ سيلقى حتفه فوق (ملعب الشهداء  مدينة بنغازي عاصمة الشرق معقل 
 ثورة 17 الحضرها التابع المريخ يا سبحان الهلال المره دى التابع المريخ” بيندفن”..بمنتهى السذاجه المريخاب اتخولعوا من تزاكر 
زقلها ليهم واحد فوق الفندق ممهورة بى اسم الزعيم الهلال لمنازلة الاهلى الليبى ..المريخاب اتخولعوا ياخ ابسط القواعد تزاكر المباريات متين كانوا بدزوها للفندق من زول ما هو زول ..اى والله- تخيل شربوا المقلب نقول شنو ما الكومبارس رئيسن الما حلال ..يعنى الليبى دا لو كان “اداهن” قنبله” -“كان زمانن انفجرن”..حصل شفتوا ليكم فريق فى الليق بيستلم التزاكر من كل من هب ودب..؟ سمح الاجتماع التقليدى “بسلموكن” فوقه شنو ؟لنا ان نتصور حال كان المقلب فى زول هناك قال ليهم هاكن القرار دا انتوا ح تلبسوا “لون قوس قزح” احسنوا الظن يا جماعه ..كدى ولبسنه  للملعب (مرقنبو ..“يلعبنبو”..؟البنقو ما كعب.!

@عاشق سنو الهلال”ابوطه-قطع أخدر”:(أعمدتك اليومين دى بقيتى بتجيبيها مسبكة سبكة ابوها الجاك..لو كمان ظبطتيها بحملة إسقاط وإرهاب الشباب ودخول الجوهرة عمودك بلحوسوهو لحوسة ويتشاكلوا فيهو والناس تقيف بالصف راجياهو من الدقش)

@”اولتراس” لا تكونوا خميرة “العكننه”..مواقفكم السياسيه تعنيكم وحدكم دولة سمو الهلال ليست مسرحا للخصومات السياسيه ..كما ان “الاولتراس” حول العالم “معروفين “ما شغلتكم بالجالسين على الكراسى زبانية كانوا ام ملائكة قتلى ام ضحايا..انتوا مهمتكم التشجيع فقط لا غير ..الاولتراس عباره عن عشاق دراويش وفى عرف الاولتراس انهم ليسوا معنيين بمجريات المباراة التى يديرون لها ظهورهم ..اى لا يشاهدون ما يجرى على ارض الملعب البته ..كونوا كذلك وبلاش النبره التهديديه لا الوعيد ولا التهديد سيغيران شيئا من الامر ودونكم معارككم مع الدكتور الكاردينال ماذا جنيتم منها ..؟

كما انكم لستم الهة رفعت عنكم الاقلام ..وحق الوطن الهلال على المجلس لفت نظر المتسببين فى ايقاع الغرامات على سمو الهلال ..يعنى انتوا عايزين تعملوا السبعه وذمتها ومافى زول يقول ليكم عينكم فى راسكم ..؟هيهات هيهات ..بدلا عن الاقرار بالذنب وبذل الوعود وقطعها بالحرص على عدم التكرار ..بيناكم  ملغوما مشحونا ….لو جابت ليها تهديدات حروب وكروب الله الغنى-اى والله-انتوا كنتوا السبب فى حرمان الوطن الهلال سموه من جماهيره طوال عمر الابطال العام الماضى وها انتم ذا تتسببون من جديد فى غرامة ماليه دولاريه ..وعقوبه جماهيريه وقف التنفيذ..فالتعلموا ودولة سمو الهلال كفيله بتكوين رابطة مشجعين تهز الارض وتقدم اعذب واشرس واجمل عرض تشجيعى ..وعشاق الهلال الخلص اهل لتكوين تنظيم اولتراس يهز الارض ..بعيدا عن الشحناء والبغضاء..فعلوا شعار (درء المفاسد مقدم على جلب المصالح) ..ثوبوا الى رشدكم يرحمكم الله.!

@نبض العشق السرمدى ..نقرات عشق نمة ريد.. غرام الروح ..(من الأعماق ناداني حنينك وعيش كمان حياتي سنينك كل جوارحي تقول أهواك -ويبقى العشق ما بقى سموالهلال !”)