عِـشْقٌ سَرْمَـدِيٌّ– هُـوَيْـدَا الـمـاحى- هلالنا قدره عالى..جمهورنا مثالى.!- العليقى لا ..الجوهرة لالالا والف لالا..!
عِـشْقٌ سَرْمَـدِيٌّ– هُـوَيْـدَا الـمـاحى
هلالنا قدره عالى..جمهورنا مثالى.!
العليقى لا ..الجوهرة لالالا والف لالا.!
استراليا-ملبورن-عشق البلد
@ هلالاب أساطين العشاق ..غايتنا ومبتغانا ومبلغ امانينا التتويج بجائزة الجمهور المثالى ..وانتم تجسدون ملحمة عظيمة عشية التأهل على حساب الشباب التنزانى وتضربون اروع الامثال انتم الجمهور الاروع طوبى لكم.
احسب كما اظنكم تحسبون ان ليس بالممتاز وحده يتم التجانس والتناغم والانصاره فى صفوف الفرقه الهلالية ..والسبيل الى خوض مباريات حبيه مع اندية قوية فتية فى ربوع القارة والوطن العربى هى السبيل الى هلال يسر الانظار .
@ بعد الاشاده بجمهورنا الهلالى الغالى المثالى اسدى الينا المدرب “النابى” نصيحه غاليه ..تمثلت فى لفت النظر لمعالجة الخلل فى دفاع سمو الهلال..عرفتوا لى” البروف فلوران” لم يغامر ..!
@ناس المريخ عايزين “يجروا” واطى..و” يتمرمقن ” فوق الواطى ..نظام يعتذروا للزعيم الهلال ..ح تعتزروا عن شنو ولا عن شنو ولا عن شنو؟..عن الثلاثى قيت؟ولا عن التواطؤ” الواطى” ولا عن شنو ولا عن شنو ..؟ عمايلكم النتنه “النجسه” دى لو كانت مناوشات واستعراض عضلات وسفاله وانحطاط وقلة ادب من “الجماهير “..لكنا التمسنا لهم الاعذار اشكال والوان كمان ..لكن من الاداريين بل من اعلى الهرم المريخى ..الرئيس ونائبه ..بعدين “حزومى” خلى “يمووووص” نصيحة “هيثم كابو” بعدم اللعب فى الجوهرة الزرقاء المناراة السامقه..وزى ما صرح واعلن بالفم المليان ما بنلعب فى الجوهرة حتى حنطلع من منافسة الابطال ..يا اخوى الطلوع ولا الرجوع والركوع..ولحس الكوع ..ولن يصلح الكومبارس “ابوجيبين”..ما افسدته عصبة الاشرار بخطاب اعتذار لن يغنى ولن يسمن من جوع ..امشوا تانى “ارشوا” الملعون “سيدات” خلوا يجيز ليكم ملعب شيكان ..ولا عن اعلان الحرب فى وضح النهار على دولة سمو الهلال؟ ولا عن جور التحكيم ولجان الاتحاد الراقده ليكم رز..مش عايزين تشتكونا فوق لاعبنا “الصينى) سمح امشوا اشتكوا..والله حاشانا نحنا ما نايمين على قفانا..بعد ضمنتوا التأهل للمجموعات بالطرق الملتويه بداية “بالدغمسه “و”اللغوسه”و”الجغمسه”واجازت ملعب الابيض “الكشا مشا”..لحدود رضوان الماجيد..ختيتوا عينكم على الجوهرة ..يسمكم.!..ختوا فى بالكم الجوهرة المفخره “تشيفى تخلى”..!
@ الخرطوم اللاوطنى يترنح من قولت تيت..!
@20 مليار سحبها “اسامه عطا المنان” المشكله وين ..؟ المشكله فى “الكنتين” زى ما بقول ليكم كدى قال ليك “بقيقيله” صغنونه اوى جدا يعنى “كنتين” اسامه قال ديونها لى فرد “معسكر” وعسكر فى المعسكر بلغت 20 مليار ..اى والله-(المال السايب”..”بجيب النصايب”وطه فكى “شاكل” اسامه قالته “الاجراس الصحيفه” والرهيفه تنقد!
@القوقو “البقوقو “”المره دى هنقوا ..وشنقوا واتشمطوا وشمروا عن سواعد الهروب بينى وبينكم اخير “ليهن” الهروب ولا العيش مع فريق تحدق به الكروب والخطوب من كل صوب .. طوالى “مرقن ” من الفندق..”براهن”..وتواااالى”- “لقن” مقصلة الشطب “مبارياهن”..شطبوهن “ججت” ما فضل غير المهاجم “ايرك كمبالى” عن “قوقو” التازى وحازم انا بكتبلكم..!قالتو “عزه برس” ما قلتو انا..! وهى ذاتها لطشتوا من كفر ووتر وظنيتها كفر ووتر ذاتها لطشتوا من اليوم التالى ..!
@ اجى يا حميدتى ..؟ هو ذاتو الليلل الجنجويد والمجلس السيادى المره دى فات بى قادى وجعل “الممكن مستحيل” اى والله متل ما بقول ليكم كدى ..ما قلتو انا ..والدليل “الووولووو”قالوا “الجاكومى ” وبالفيديو ..عن “اطرشق” ليكم نظرية المؤامرة دى ..غايتو معليش يا اللغه العربيه من العارف عزه مستريح ايه قرآنية لى حميدتى جعل الممكن مستحيل .”
@ شتان ..شتان ما بين من يزجون التهانى والتبريكات امثال ” البرازيلي ريكاردو مدرب الهلال الأسبق” وبين من يستفون الشكاوى امثال مدربهم الاسبق “كلارك “.
@ انتهجت حكومة دولة سمو الهلال سنة حميده ..جمل الشيل الشغيل ومحمد بشير بشه يلتحقان بكورس الرخصه B الآسيويه.
@تستطيع بالابره ان تحفر بئرا ..اخيرا فعلها الفرنسى المدريدى “بنزيما”. فاز بالكرة الذهبية حلم حياته لأول مرة في تاريخه..!
@لقيت لى بوست فوق حيطة “سيف عوض كرار “(التوانسة والمغاربة والمصربين يقومو ويقعدو والزمالك طلبها رسمي ونحن اولي يا العليقي تحرك وغطي قدحك)..اللخو” سيف كرار “
ات ماك نصيح ولا ماك نصيح ..اذا كانت الجماهير عاجزه عن تزاكر مباريات سمو الهلال وتشيل وتسوى الرووب وحى ووب ..شفت بى عينك شفت بضع من المدرجات خاويه على عروشها ..قدح شنو البغطى “العليقى” لى سيكافا ..؟ ولا عايز الدخول يكون بالمجانى كمان ..؟
@(العيب فى “ابوعشرين” ولا فى “ابوجيبين” ولا فى المدربين..؟)
الذكرى للحبان اجمل اشارةهي للقلوب مراة وللحب منارة..حفلت بداية عهد المدرب المصرى”مصطفى يونس” فى مرابط سمو الهلال “بالغبن” والاحتقان وتقليل الشأن من قبل المدرب تجاه الاعلام ..للدرجه التى دفعت به الى حرمان بعض الصحف من النشر على لسانه الى جانب حرمانها من اخبار الوطن الهلال ..ذات عشيه فى فترة الاستجمامه باحد التمارين توجهت صوب مدرب الحراس المصرى “السويركى” بدور اناضمه طوالى اتصدر لى “مصطفى يونس”..وانا كمان اعجبكم ..كلامى مع مدرب الحراس ما هو هيلك ..طبعا الشمار كتله وفى نفس الوكت عايز يثبت نظريته الناعته للعلام السودانى بالجهل الكروى..بعد سؤالين تلاته “مصطفى يونس ” ذاتو إنداح معاى ما لقانى “منقطاها “.! خلونا من الفشخره ذات الاسئلة اجدنى مضطرة على اجترارها اليوم ..تشخيصا لمستوى الحارس الامين ابوعشرين الذى لا ينقصه الولاء ولا الطموح ربما “الجموح”.. اخطاء الحارس لم نبارح مكانها البته التردد فى اتخاذ القرار ..توقيت الخروج غير سليم..السرحان ..يعنى ظنيته ابوعشرين ما بقرا الميدان من شان كدى “بتبرجل” فى اتخاذ القرار ..ولم نتلمس بصمات مدربى الحراس الذين تعاقبوا على سمو الهلال ..نتمنى من سيد شباب سمو الهلال العليقى بحث الامر مع الحارس ومدربه .!
@نبض العشق السرمدى ..نقرات عشق نمة ريد.. لى غرام الروح ..
ويبقى العشق ما بقى سموالهلال !”)
زرقـاء الـعشق
هُـوَيْـدَا اَلْـمَـاحِى
المزيد من المشاركات