Take a fresh look at your lifestyle.

عِـشْقٌ سَرْمَـدِيٌّ– هُـوَيْـدَا الـمـاحى-القناة والاضاءة يا جماعه خبرهن شنو.! قرصة أضان سيد شباب دولة سمو الهلال “العليقى”

عِـشْقٌ سَرْمَـدِيٌّ– هُـوَيْـدَا الـمـاحى

القناة والاضاءة يا جماعه خبرهن شنو.!

قرصة أضان سيد شباب دولة سمو الهلال “العليقى”

استراليا-ملبورن-عشق البلد

@يشد سمو الهلال الرحال الى عاصمة الحديد والنار لمنازلة الامل  العطبراوى العنيد ..وميزان خيارات البقاء او الاستغناء عن اللاعبين عدل حاضر ..و الثلاثي “عيسى فوفانا-و “سلمون بانغا”و“عبدول أجاجون فى كف عفريت الاداء وحده الحكم والفيصل ..حيث لا مؤامرات ولا خيار وفقوس..والميدان يا حميدان تلعب تبدع تقعد ..ما تبدع تشطب ويجى الاحسن منك لا محالة.. !..غايتو انا عن نفسى شايفه “الجنا” كالالا ” ما ليهو لزوم كفايه علينا الغربال ..والبحث عن مهاجم صريح..!..خلونا فى عطبره منتصرين باذن الله وهى سانحه لاختبار عناصر جديده ..ويا اللخو فلوران “خت فى بالك” جمهور عطبره صعب !  

@الاضاءة يا جماعه خبرها شنو ..؟تأخرت كثيرا..!

واللخو “خالد هداية” الله خبروا شنو لسه فى اسبانيا ولا صدا راجع ولا لساتو فوق ربوع اسبانيا قابع ..؟..عشان ننتهز الفرصه بعد ..نركبوا” الاضاءة “تكرموا” سمو “تزكى آل الشيخ” والدكتور “اشرف الكاردينال “فوووق الجوهرة المفخره.. و”نقولوا” كدى “نعزموا ” فريق “الميريا ” ..ومعاهم “بنزيما “الاسبانى ..ومعاهو “الهلال السعودى”ويمكن الزمالك”كيتا” فوق الاهلى المتواطئ “النحس” هسع الجاب سيرة المريخ منو ..؟

@ قناة سمو الهلال ..”القناة” يا مجلس دولة سمو الهلال “البعزه وبقدره وبوقره انا ..! قناة دولة سمو الهلال لسان حال الوطن لها فوائد جمه ..لا تألوا جهدا فى سبيلها وستعود على الوطن سمو الهلال بالخير الوفير .

@قرصة فوق “اضان سيد شباب دولة سمو الهلال “العليقى “:(اضانك وجعتك يعنى القرصه دى لسعتك وحمرت اضنينك ..ظ سمح خت فى بالك تصريحات وحوارات ولقاءات المنظومه الهلاليه جمعاء من ثروات سمو الوطن الهلال القوميه..علينا عدم التفريط فيها .. ومتل تصؤيح ” روفا : موتا حاربني.. وفلوران أنصفني.” دا ما وكته نوهائى نعم استقل اللاعب الفرصه التى اتيحت له لاثبات قدراته فى مباراتين قاريتين ولسسه المسافه بعيده  والرحله طويله طويله ..والتصريحات يجب ان تكون مسؤلة وفى المرتبه الاولى لا يتم السماح للاعبين باطلاق العنان لتصريحاتهم لكل مقال مقام ..واى اصداره او جهة اعلاميه يتوجب عليها مراعاة القيمه التسويقيه عايز تصريح او لقاء يتوجب عليك مخاطبة دولة سمو الهلال ولازم تدفع ان شاء الله 1000 دولار ولا قول الف جنيه ما فرقت ..فى الاول وفى الاخر استثمار يعود ريعه على الوطن الهلال !

@ملعب المريخ على طاولة والي الخرطوم.. يعنى ما كفاهم الدعم السريع..على والى الخرطوم ان يعى اى دعم للمريخ يجب ان يكون مناصفة مع دولة سمو الهلال .؟..وايوا يا “ايوا” حرر فندق “ايوا”..فندق ايوا اشتكى المريخ .! اقترح على المريخ تنظيم بطولة الشكاوى والكفاوى والبلاوى ..سيلعب فيها وحده وينتصر وحده شاكى ومشكى ويدخل موسوعة “قينيس” وحده.اى والله.!

@ الطيب عبدالرزاق فى “الزقاق “..نعلم جميعا أن الفتى الابنوسى الطيب وليد عبدالرزاق قد مكث حينا فى الكشف الازرق..اى ليس حديث عهد بسمو الهلال ..وقد اخفق مرات ومرات ومرات خلونا نقول لم يحالفه الحظ وحاجات تانيه كانت حامياهو..ليبزغ فجر تألقه فى ملحمة الشباب التنزاني ملحمة العبور الكبرى..فاستحق لقب رجل المباراة وتوجناهو ..واستحق الاشاده والمديح وجرينا فوقه الشكر..لنصمت عنه ونصبر لنرى ابداعاته وتألقه فى قادم المواعيد حتى لا يبطره المدح ..!

@مجلس إدارة نادي المريخ يرصد 850 ألف دولار لتسوية فسخ عقودات كوارث القنصل حازم .! سمح عرفنا العشر قام ليهو شوك النصيبه القوقو ديل نقول قام ليهم ريش ولا البنقو ودعم الحشيش..؟

@ الشماريخ يا الشماريخ نعمل ايه فيك يا الشماريخ ..؟

التوعيه ولا بديل للتوعيه الا التوعيه التثقيفيه ودا دور الجنرال “كركساوى” عبر تدشين ندوات ومحاضرات توعويه تثقيفيه بمحظورات “الكاف”..وايضاح متى تكون الشماريخ وبالا على دولة سمو الهلال ..وهل اطلاقها فى المدرجات بعيدا عن ارض الملعب حلال كما نظن اننا نعلم ..ام انه حرام ..؟ كما يتوجب على الموقع الرسمى وصحيفة السيد السوباط”الزرقاء” الاطلاع بامر نشر وايضاح محاذير الكاف ياخ استضيفوا ناس الكاف واسألوهن سؤال منكر ونكير ..غربلوهن يغربلن “الغربال “..عشان الطفل الرضيع من امة سمو الهلال وامه “شايلاهو” فى طرفها لو فكرت تطلق “شمروخ ” فى ارض الملعب “خطفت  يخطفه منها ويصد” الشمروخ”..هو  نان ما عالم ومثقف وملم بقوانيين وقواعد منافسات “جدو الكاف” ..الموضوع فى غاية البساطه ..بدل التوهان والعواسه والسواطه.

@زيها وزى مزمل ابوالقاسم بالضبط تدربت فى قناة سمو الهلال .”.فاطمة كباشي” تحكي اسباب تحولها من الهلال الي المريخ..الزوله “الغباشى “دى طفت على السطح زيها وزى اى طفح “دلقونى”..ولا علاقة لها البته بدولة سمو الهلال “نبرى ونستبرى” لكن عشان تظهر طلعت فى لايف هااااااايف ..الغريبه ناس قريعتى راحت عينوها طوالى فوق قطاع ناديهم ..بالله شوفوا الهمله والرخسه دى ..؟ بينما اقمنا الدنيا ولم نقعدها بسبب اختيار بعض الاسماء لقطاع المراة ليس تشكيكا فى ولائهن واستحاله يتم اختيار “نكرات” فى المنظومه “الحكومه” بدولة سمو الهلال ..وشتان ما بين الاوطان والحفر.!

@ الصحفى واستدعاء مشاهد الصراع والدم و الايقاع باللاعب بكرى المدينه.!..تصريحات اللاعب عن المدرب التونسى “الغرايرى” قادته الى مجلس المحاسبه ..وقع اللاعب ضحية اعلامى لا يخشى الله ولا يبتقى مصلحة المريخ البته ..مافى اعلامى عنده ضمير تسول له نفسه استنطاق لاعب فى هذا الظرف المريخى العكر الا لو كان مبيت النيه وعنده تار.. اما مع بكرى وعايز يلحقه “البرنس “ضحية حوار الرشيد على عمر..!_واما يكون عايز يزيد الطين بله فى المريخ ..وكلنا يعى ان بكرى المدينه “ارعن ..متهور ..اهوج”..نوعته المدرب بالدكتاتور ..قد يكون حقيقة اما محاربةالمدرب للاعب طيفور لا احسب ان بكرى المدينه قد جانبه الصواب المدرب استلم ومضوع طيفور على صفيح ساخن والتحانيس ما تديك الدرب و”تيفور” ساب البلد وقبع فى بلاد العم سام المدرب “يسويلوا شنو..؟..والمشكله اداريه بحته ..! بعدين المدرب سجلوا ليهو المحترفين “القوقو” ناس قدر ظروفك ..يعنى يا بكرى لو جاكم “جوزيه مورينيو..بيب غوارديولا ..زانشيلوتى” مجتمعين دى “الوكتى”.سيسقط بايديهم ..التونسى كتر خيره وافق يشيل “جنازة البحر ” ..اختم الجانى هو من استنطق اللاعب بكرى المدينه فى هذا التوقيت وبكرى المدينه ضحيه..!..لكن كيفنى جنس تكيف  كندشه ومنتشه عديل كدا “الهمبريب” والانبطاح فوق العنقريب ..وكت بكرى المدينه قال :(فى مباراة الأهلي الليبي المريخ لعب بعشوائيه والفريق لم يستطيع اللعب الجماعي بسبب خطة المدرب العقيمه)عليك الله يا بكرى المدينه واحد..قيمه بالشطه” من كلامك دا وصلحه وسوى” الزغطة و الحازوقة ” ياخ ابوالشهيق ” لى غايب الضمير “الرشيد المعويه عله يتقى الله فى نفسه ومريخه آآآى  مريخه ..!

@جنح بعض ضعاف النفوس الى تحوير وتدويل..وفذلكة موضوع الشماريخ

والالعاب الناريه للصيد في الماء العكر والوقيعه بين” الاولتراس” وحكومة دولة سمو الهلال من جهة وسلاطين العشاق من جهة اخرى ..“الاولتراس” مننا وفينا ومصدر فخرنا وعزنا .. !

@نبض العشق السرمدى ..نقرات عشق نمة ريد.. لى غرام الروح ..

ويبقى العشق ما بقى سموالهلال !”)

زرقـاء الـعشق

هُـوَيْـدَا اَلْـمَـاحِى

شاركها على
أكتب تعليقك هنا

لن يتم نشر عنوان بريدك الإلكتروني.