عِـشْقٌ سَرْمَـدِيٌّ– هُـوَيْـدَا الـمـاحى- كأَنَّ الهِلالَ إِذا ما بَدَا وَأَيْدى المِحاقِ بِهِ تَمْحَقُ- كابيتال الخديعه النيلين الوضيعه والاتحاد قطيعه-خالد هداية الله ..”إنزَقَمَ ” بين الورى وكبرها

عِـشْقٌ سَرْمَـدِيٌّ– هُـوَيْـدَا الـمـاحى

كأَنَّ الهِلالَ إِذا ما بَدَا ..وَأَيْدى المِحاقِ بِهِ تَمْحَقُ

 كابيتال الخديعه النيلين الوضيعه والاتحاد قطيعه

خالد هداية الله ..”إنزَقَمَ ” بين الورى وكبرها

استراليا-ملبورن_عشق البلد -الثلاثاء 25/10/2022

@ الله الوطن سمو الهلال..1898م ..” قال الشاعر:(كأَنَّ الهِلالَ إِذا ما بَدَا ..وَأَيْدي المِحاقِ بِهِ تَمْحَقُ) ..اى مِحاقِ يعقبه تهلل واشراق ودى حكمة الله فى مراحل الهلال..فإن لم يكن القمر قد وصل مرحلة “المحاق” فلا جدوى إذا من البحث عن الهلال..!

@ نفس الزول الكاتل ولدك..حاكم بلدك..وتسلّحنا بأكتوبر لن نرجع شبرا..

 لا يعنى كنت قاصده وما قاصده الناس الوقفت الف احمر..ولم تكن ترى فى المدرب المستقيل “براهو” (جواو موتا) شيئا جميلا وظلت تطالب بترحيله ..البارحه غنوا :حليل موتا يا حليل موتا..الشفقه تطير لا موتا ولا فلوران ولا حتى “الجان” نفسه بقادر على القفز بالزانه لبلوغ بالفريق مرحلة فريق الاحلام بمنأى عن التجريب والاحلال والابدال والمداورة ..و لكل مدرب فى الانام سفره وكتابه ..والحكم على اللاعب ليس وليد مباراة واحده هنالك اساطير فى انديتهم عندما انتقلوا منها اصبحوا نمور من ورق ودونكم ..تراجع مستوى البرغوث “ميسى”  مع مع منتخب بلاده ..والتدهور المريع   فى مستوى ميسى مع “باريس سان جيرمان” الذى خسر  السوبر المحلي أمام ليل وخرج من كأس فرنسا بركلات الترجيح كما خسر بنتيجة ثقيلة أمام موناكو إضافة إلى خروجه المبكر من دوري الأبطال وميسى حاضر..ببساطه ميسي لم يتأقلم بعد مع البطولة الفرنسية ولا المجتمع هناك..علينا ان نضع نصب اعيننا عوامل كثيرة قبل الشروع فى تقييم لاعب بعينه او فرقة مكتمله هنالك عوامل جمه حتى المناخ “والكسره والملاح”واختلاف الثقافات تلعب فيها دورا عظيما  ذكرت لكم فو عيمود سابق حكاية “داريو كان” الذى وصم بالمتمرد ومقصلة الشطب علقت فوق حلقومه وعندما اتصلت عليه وسبرت اغوار مشكلته ايقنت انه ليس بالمتمارض ولا المتمرد كل الحكايه معدته اتعودت على “اللبن”..وبارك الله فى الجنرال عبدالرحمن ابومرين الذى وفر له كراتين الحليب وشهد بعدها سمو الهلال “داريو كان الرهيب العجيب” فى تكات بسيطه قد تكون حجر عثرة بحاجه الى خبير نفسى ونطاس اجتماعى بارع لسبر اغوارها ..واندية الولايات حكايات وروايات زمان كانت اندية بورتسودان زى الشوكه فى الحلقوم لاندية الخرطوم والقمه على رأيسها واذا عرف السبب ابطل مفعوله “اتاريهم كانوا بحقنوا الفواكه بمادة “الخمول”-اى والله- ما حدا بدولة سمو الهلال ان تصطحب وجباتها يعنى اكلها وشرابها وفواكها معاها .

@ “فخامة السوباط “..الهلالاب اساطين العشاق  البعزوك ..وديلاك بغزو حصونك عشان يقعدوك ..وانت بتعرف صليحك من عدوك ..عتب على بعض من امة سمو الهلال على تحاشى الاعراب عن الجهات المعاديه المحاربه للزعيم الهلال عبر الإِْجْهَازُ عليك ..ويقين ان الافصاح عن اعدائك منوط بك وحدك ..واجبنا المقدس الزود عن حياض رئيس دولة سمو الهلال .

@ ناس فريق الفلاح استغفروا..غفروا وصبروا وجبروا والدلاقين فرفروا ..وفجروا وكفروا ..!

 @ تأجلت مباراة المريخ وحي الوادي نيالا ياربى يكون لدواعى امنية ولا يمكن لعدالة المنافسه ولا آآآآآ لزوم جيب الكومبارس التانى بدور لو رقعه ..

انتوا اجلوا وفصلوا للدلقان نجيكم بالهلال “رويان “.!

@ عبدالرؤف قالوا الشكروا رقد رز .. ياسر مزمل دا نسمى شنو سؤ طالع ولا شفقه..عيد مقدم البارحه لا بقيت لينا “الوقفه “..ولا صباح العيد..عيسي الرسول انت امريكى ولا “شيكيبكى” الله يستر ما تكون توم موسيس..؟

@شركة ” كابيتال “الرزيئة” شغلها “بتااااال”عدييل كدا .. النيلين “المَرْزِئَةِ”..والاتحاد سبب لى اذيه ..شنو الفذلكة وراء اختيار الشركه “المصريه ” مجهولة الهوية لرعاية كبرى البطولات السودانيه “المنتاز”..؟ وشنو الفوائد والعوائد على انديتنا والمشجع الولهان الغلبان ..؟ ووين دور ما يسمى “كتلة المنتاز” فى المهزلة والصاقعه الجاتنا بردلب من مصر واقعه ..والنيلين والتقطيع  الفظيع المريع الشنيع ..؟

@شكرا”عطبره”.. شكرا ” الامل تربيع” ..شكرا الفلاح “تكعيب” فريق الفلاح كشف “عوار” المنظومة الدفاعية “بجلاء” تام ..والثغرات التى يتسلل منها الغزو الهجومى .. ليت كل الانديه افلحت فى التبارى بذات المردود حتى ينتعش الدورى “المنتاز الفطيس” الى مصاف الدوريات القويه التى تزود انديتها بوقود التنافس عبر المحافل القاريه.

 @ يحدثونك عن اخفاقات محترف وعائد من الاحتراف بالمنطق لا يعقل ان يغير سمو الهلال جلده بالكامل “متل” الافعى اى والله ..التمرحل مهم والاضافات النوعيه كانت حاضره وشيل دا من دا يرتاح دا عن دا ..ومن بدرى تم رصد البدلاء فى خانات محدده ..بالنسبه لى اطهر الطاهر “الجنا” دا وقف كتيير شدييد عن اللعب التنافسى فى مصر..لامن نسى اللعب ذاتو ..فهو ..وعندما عاد الى حضن الوطن سمو الهلال ما لقى الفريق الخلاهو ذاته ولا الجهاز الفنى يبقى محتاج الى بعض الوقت وكمان محتاج لى من السيد “عبدالمهيمن ” يقول ليهو حبا ارعى بى قيدك بعد دا مصيرك بقى فى ايدك يا غرق يا جيت “حازمها ” اصبروا اصبروا جنكم لفحى حازمها دى ما ليها علاقه بى “حزومى البكاى”-اى والله ارتحتوا..؟ واللخو “بانقا” دا”ودع هريرة” ذاتها بى ذاتها.. ذكرنى لما سمو الهلال قرر الاستغناء عن اللاعب الساده ..كان فوزى المرضى اثناء التمارين وانا جلوس حول الملعب مع بعض الاعلاميين بمر علينا بين الفينة والاخرى وهو يردد :(ودع هريرة ان الركب مرتحل ..طبعا مافى زول منهم ناقش فوزى المرضى كان يأكد لى انه اللاعب الساده لونه” بمبى ” قصدى مشطوب مشطوب مشطووووب.”يا بانغا ” .!)

@ مررت على (الاضاءة المخزنه )وهى تبكى فقلت علام تنتحب “الاضاءة “..؟ ((بتصرف شكرا “الشاعر العراقى عبدالمهدى الأعرجى”)) فقالت:(البخلينى ما ابكى شنو ..شوفى “هملتى “دى ؟ قمت  مررت على “قناة الزعيم الهلال” البقت اطلال لقيت حالتها تحنن “الجاكومى”..وهى  تجأر بالشكوى “وتجوعر” ..قمت تانى مريت على الاضاءة لقيتها تبكى وتلطم وتتمخط قلت ليها :”بـسسس) عليكى حقوا يسموكى ( “نواحه السباحه النواحه إخيت “نـوح) ألساعه”القالت لى البخلينى ما انوح شنو ..حمرت لى “بنظرات طوال جمر بس طوالى احترمت نفسى وكبرت اللفه..لكن وجع عدم تركيب الاضاءة  وصمت القناة صمت المقابر “بتاور” والله لا وراكم نتحى “متاورة “الوجع..قمت تانى مشيت على المخازن ولقيت الكراتين ذاتن “بتخجن” من البكى ..وانا ما بتوب قمت تانى سلتها ..بتبكى مالك يا الكراتين..؟فقالت الطناش كتلنى  ..وفوق مخازن  الجوهرة “أهملني مجلس السوباط “..فطفت على القبور عسى ألاقى (يعنى يمكن القى لى رد شافى وكافى يا كافى البلاء لقيت المقابر خلاء..وخالد هداية الله ..”انزغم ” بين الورى وكبرا )