Take a fresh look at your lifestyle.

عِـشْقٌ سَرْمَـدِيٌّ– هُـوَيْـدَا الـمـاحى -هداية الله “العواميد”بصبوهن صببان ولا بزرعوهن الاسبان ؟ -أَتِيهُ بِكمْ  فخراً  “هلالاب الملتقى التحليلى “

عِـشْقٌ سَرْمَـدِيٌّ– هُـوَيْـدَا الـمـاحى 

هداية الله “العواميد”بصبوهن صببان ولا بزرعوهن الاسبان ؟

أَتِيهُ بِكمْ  فخراً  “هلالاب الملتقى التحليلى “

استراليا-ملبورن_عشق البلد

الله -الوطن الهلال 1898م..النصر بجدارة أو الهزيمة بشرف.!

@ حباب الرابطه كوستى حللتم اهلا الجوهرة موعدنا ..اكان جبتوا معاكم طاقم التحكيم “كووووولوا “..حاشانا ما بنهضرب ولا بنجقلب ولا بننسحب.

@البارحه اثلجت صدورنا مخرجات اجتماع حكومة دولة سمو الهلال وتحريك ملف الاضاءة لكن النصيحه لى الله فى كلام( ما ياهو ياهو )..اى والله.. يا هداية الله يهديك الله ككيف يعنى تلت الاضاءة ما وصل من اسبانيا ..؟ وانت الزمن دا “كووووله” كنت بترعى بى غنم ابليس ..؟ لابد وساكت لا شنى ..؟ يعنى لو المجلس لم يقدر له ان يجتمع لما سمع ولا سمعنا ..سمح انت ماسك الملف عشان “تـلـفـبـو”.. يعنى  (لا بتهش ولا بتنش ) ولا بتعرف تناضم الاسبان ..ولا بتعرف تقول للمجلس هاؤم اقرءوا كتاب ملف الاضاءة ؟

اكيد هم الناقص بتموا ..!  يا اللخو “هداية”الله الناقصه “العواميد” هل عقد “سمو ابوناصر “مع الاسبان تضمن الاعمدة ولا الاعمده ديل بصبوهن “صببان” داخل الجوهرة يا مان ..بصراحه صمتك غريب وكمان عجيب .! لماذا تسعى الى جرجرتنا  الى زبانية التخوين.عليك الله ما تشيلنا ذنوب نحنا فى غنى عنها وخليك واضح وشفاااااف.

@ منتخبنا الأولمبي ينهى أحلام منتخببنين بهدف “الجزولى” القاتل ويتأهل ..هل مردود منتخبنا سيشفع له لاعتلاء منصات التتويج ..؟

@مزمز يا أيُّها “المُتملَّق ” الاشر..فقد سلطت عليكم مؤامراتكم الاقذر بهزيمة نكراء بالكسمبر والباشرى ..والضحيه “الغرايرى ” البمسك فريقك فى المجموعات منو ..؟..عشنا وشفنا عجايب الدنيا قال شنو قال “مضروب كوستى بالكسمبر والباشرى” بكى واشتكى فوووق الحكم قالوا للاتحاد “شن قدرك” تعين الحكم من كوستى ..؟ طبعا اتحاد “الدلاقين” السجم وشركة الرعايه الوهم…قالن “يخربن” خراب الترب-المقابر” ما لاقيات قريشات تزكرة يسافر بيها اى حكم ..من شان كدى قامن ..مرقنبو -قربنبو..” وحكمنبو”من كوستى ..والدلاقين شربوا البنقو و”اتنفخنبو”..يعنى لما الحكم يكون من اللاعب رقم” 12″من الخرطوم لو ما “ابوشنب ابو ضنب “على الدلاقين حلال ولامن يكون من كوستى على الرابطه الجلدت المريخ ب”الباشرى” حرام والله حراااام ..؟المهم الدلاقين الشكوى عادتن ولا بشتروها ..؟ قامن بكن واشتكن وطالبن باعادة المباراة واللائحة عفيت منها ..قالت ليهن لالا والف لالا ..!

@من شابه اخاه “الغربال” فما ظلم .. “أيمن عبد الرحمن” شقيق الغربال احرز “هاتريك “فريقه الاهلى العاصمى فى شباك الأهلي مروي.

@قال تعالى فى محكم تنزيله:( وَلَقَدْ كَرَّمْنَا بَنِىٓ ءَادَمَ وَحَمَلْنَٰهُمْ فِى ٱلْبَرِّ وَٱلْبَحْرِ وَرَزَقْنَٰهُم مِّنَ ٱلطَّيِّبَٰتِ وَفَضَّلْنَٰهُمْ عَلَىٰ كَثِيرٍۢ مِّمَّنْ خَلَقْنَا تَفْضِيلًا)..يعنى الكرمك رفع من قدرك و”عزاك” عز جد وما خلى ليك حاجه تب .. نثَمُن إِحْتِفَاء وحَفَاوَة”قروب ((هلالاب الملتقى التحليلى)) على الواتس.بنَفَر من أساطين العشاق يرونهم اهلا للتكريم وهم :(الجنرال حسن محمد صالح طه-الاستاذ الشازلى عبد المجيد نور-الاستاذ خالد احمد النقر – الاعلامية والصحفية والقيادية الادارية الاستاذة هويدا محمد الماحى-الاعلامى والصحفى الاستاذ رمضان احمد السيد-خبير التحكيم فيصل ميرغنى ( سيحة )-الاستاذ ازهرى الطيب ” ابوالزهور”- الصحفى والاعلامى الاستاذ محمد الجزولى محمد-الاعلامى والصحفى الاستاذ عبد العليم مخاوى عبيد- لاعب الهلال السابق الكابتن والكوتش اسامة ادريس فرج الله “اسامة الثغر”- الادارى السابق بالهلال الاستاذ محى الدين مكى محمد- الاعلامى والصحفى الاستاذ عز الدين أحمد سعيد “حسن الخاتمة”-الاستاذ محمد النمير الشوالى -الصحفى والاعلامى نصر الدين على عبد الله” المحسى”ا-لصحفى والاعلامى الاستاذ محمد حسن شوربجى-الاعلامى والصحفى الاستاذ احمد يوسف ” الفنجرى “-الاستاذ / خالد عبد الرحمن العوض- الاستاذ نميرى محمد جبارة) .ا اول التبادى “شلته لى ” درابه ” قدر دا ..انا متعوده اكون فى وسط “اخوانى “ومن شان القروب ما يتقلب الحجر حاضر ..صالة عن نفسى وانابة عن المحتفى بهم “ججت”نخص بالشكر الجميل الاستاذ “حيدر ود القبائل” دينمو المجموعه وصوتها الصداح ..واسرة قروب ((هلالاب الملتقى التحليلى))نفر ..نفر..شكرا لكم حبا لكم فخرا بكم فقد وسعتم امة سمو الهلال بالاخلاق الكريمه طوبى لكم.

@ سؤال برئ هل من سلبيات ستعود على مستوى اداء سمو الزعيم الهلال فى قادم الاستحقاقات بالممتاز جراء تحويل وتغيير مسار التمارين الى الفتره الصباحيه لافساح معقل الوطن الهلال لبطولة سيكافا..؟

@ عزيزتى رابطة اهل سمو الهلال المركزيه ..صح النوم ..الاعداد والتحضير للتشجيع المثالى بالمجموعات للمجموعات قد ازف ..اقترح البعض من اساطين العشاق تخصيص مدرج كامل للاولتراس ..هل ستبحثون الامر ..؟ وماذا فى جعبتكم ..؟

@ نجحت حقيبة المرأة فى اخراج “يوم اكتوبر الوردى ” للتوعية بسرطان الثدى الذى نظم بمعقل سمو الهل الجوهرة بصورة مرضيه ..عاد الرسول يا دكتوره نوال اكان ما نظمتوا لينا يوم  اكتوبر (البمبى) بالباشرى والكسمبر .فوق شهر  نوفمبر. !

@نبض العشق السرمدى ..نقرات عشق نمة ريد.. غرام الروح ..ويبقى العشق ما بقى سموالهلال !)

زرقـاء الـعشق

هُـوَيْـدَا اَلْـمَـاحِى

الاحد 31/10/2022

شاركها على
أكتب تعليقك هنا

لن يتم نشر عنوان بريدك الإلكتروني.