عِـشْقٌ سَرْمَـدِيٌّ– هُـوَيْـدَا الـمـاحى -الهلال الكاسر لتأديب قاهر المريخ القاصِر -العليقى رئيس الهلال بالانابه وصحبه الميامين

عِـشْقٌ سَرْمَـدِيٌّ– هُـوَيْـدَا الـمـاحى
الهلال الكاسر لتأديب قاهر المريخ القاصِر 

العليقى رئيس الهلال بالانابه وصحبه الميامين

استراليا-ملبورن_عشق البلد

الله -الوطن الهلال 1898م..النصر بجدارة أو الهزيمة بشرف.!@اساطين العشاق سنخوض غمار رحى مواجهة اليوم بالجوهرة المفخره تحت شعار “مستر فلوران ” استمر فى التدوير ..ولا تفريط فى النقاط..التلاته بتاتا بتاتا. .احترامنا للرابطه كوستى لا يعنى التفريط ..وتصريحات مدرب الرابطه بان الزمن لم يسعفنى للاستعداد لمباراة سمو البلد لن تبطرنا ولن نضعها فى الحسبان سننازل الرابطه كوستى الدمر المريخ على انه خصم قوى ..كما يجب ان نضع فى الحسبان ان الهداف وخليفته لازم يكونوا من دولة سمو الهلال ..وما تهتموا للتحكيم سبب الاذيه..عذرا كفانا غدرا ..فقد اكتسبنا الحصانه اغدروا انتوا يا الحكام نضاعف نحنا للاهداف.والجمهور المثالى بره وجوه فى الممتاز والمحافل القاريه ماركة هلالية حصريه.
@ السوباط قال لينا راجع راجع وطنه تانى بعد ما كان فى البدايه متردد وخايف وقفة امة سمو الهلال قاطبه واركان حربه ..قسما قسما لن تضام يا سوباط واساطين العشاق متحولقون حولك يشدون من ازرك ..ابشر إِذَا قَوْمُكَ عنك يَصِدُّونَ
@:سيعقد”الليلى”دى  بسوح سمو الهلال مجلس “تَأْدِيب قاهر المريخ”..والما عندو كبير بينضرب من الرابطه كوستى ب”الكسمبر والباشرى” ..سيعقد الساعه 7م.. الجرم المسند إليه “عظيم” يصل حد التجريم ولا يطاله التحريم البته ….بعدين تار شنو وتار منو يا الحبان..؟

لا تار ولا الله قال ..الثأر هو أن يقوم أولياء الدم -أقارب القتيل بقتل القاتل نفسه أو قتل أحد أقاربه انتقاماً..ونحنا لا اهل “المريخ النطيح” ولا الله قال ..حتى حق الجيره ذاتو ..هم ما اهله ولا بستاهلوا..لكن نحنا مشمئزين من “الدموع من حازم لى حاتم-وفى الحالتين القاسم المشترك مزمل ابوالقاسم” ..ودموع الرجال عيب لو بقت مبهولة و”نقاطه ” تبقى مسخره وهباله وعباطه
-عشان كدى سنكتفى فى التأديب بالعقاب الإيجابى وسنجرعهم اى ناس الرابطه كوستى العذبوا المريخ ..مذاق الهزيمة ..عشان تانى يحرموا يقسو على ” المريخ “الفقير”..وبى فرد مسمار “موجوج” نار..وكتين يلاقوا الدور الجاى يا ام نزعوا مسمارهم وامانه النزع “مو” حار و”المى” حار ولا مسمار “باشرى”..اى والله

– ولا كمان طبقوا ليهن الحنه بى هدفين تلاته احن من المسمار ..اى “اغلبوهن” وما ترحموهن حتى لو كان الحكم ابوهن مزمز ذاتو ..!
طبعا محاضرة البروف فلوران مره “دسسسمه”..اصلو “جبار خواطر”قال دموع “حاتم” فى كوستى ” كوابس عديل” فلوران يا حنين.!
-اخوان الغربال شيالين التقيله ..اى فريق يحقر بيك يا المريخ انت استريح يا الجريح ونحنا بنلزمه ليك الجابره ..طبعا مع صافرة البداية “بنجضم” ليكم كسمبر فوووق جضومه ونقول ليهو  هووى ارعى بى قيدك ..و”بنمحط “الشباك محط زى “المحط”..لامن الحارس يأمن و”باشرى” دا بنقلبه “كشرى”بالدقه وبنبلعه مسامره بى ناره ..رايكم شنو يا الدلاقين الملاعين ..؟ ولا طعم “الزنقى” احلى يا عيال مزمز ..”كله محصل بعضه “ريع الشحده والمرمطه ..والكوتش”بابكر تبيدى”..بنلحسه كوووعه ..نحنا “خطرين” خاصة لما يتوسلوا لينا عيال مزمز.
@ناس لجنة الاستئناف بنادى المريخ حلوا لجنة  “أيمن أبو جيبين” -“مرتين اتنين ” يعنى بعدد “جيوبه”.. ما باقى ليهم تانى الا اكان يطعنوا فوق قانونية وشريعية “جيوبه الانفيه” يمكن تكون ما “اللته” ما حقته ..وما بعيد تكون جاته “طايره”..ومررها “مزمل” من ملعب الكوره “الطايره”

@ رئيس الزعيم الهلال بالانابه “العليقى”وصحبه الاماجد قاموا بالواجب الانسانى الهلالى المقدس بمعاودة الاسطوره “جكسا”..والفارس “عادل العونى” عوفى المجد اذا تعافيا.