Take a fresh look at your lifestyle.

عِـشْقٌ سَرْمَـدِيٌّ– هُـوَيْـدَا الـمـاحى- تصفية السوباط شر البليه أم تُرَّهَة نرجسيه ..؟-ﺿﺮﻏﺎﻡ  الهلال الطاهر يونس فى الحوبة ما بتنفات -هداية الله فارق لا تلم قربك فيهو سم

عِـشْقٌ سَرْمَـدِيٌّ– هُـوَيْـدَا الـمـاحى

تصفية السوباط  شر البليه أم تُرَّهَة نرجسيه ..؟

 ﺿﺮﻏﺎﻡ  الهلال الطاهر يونس فى الحوبة ما بتنفات

هداية الله فارق لا تلم قربك فيهو سم

استراليا-ملبورن_عشق البلد

الله -الوطن الهلال 1898م..النصر بجدارة أو الهزيمة بشرف.!

@ ﺿﺮﻏﺎﻡ  الهلال  الفارس الجحجاح ويا أب قلباً حديد في الحوبة ما بتنفات..صدرك للصعاب دايماً بعرف العوم..بابك ما انقفل نارك تجيب اللم ما بتعزم تقول غير استريح حرٌّم ..و(ملف الاضاءة من غيرك ما بنتم )..عودة “الطاهر يونس” لادارة ملف الاضاءة مطلب شعبى.. لابديل للطاهر يونس الا الطاهر يونس.. خالد هداية الله.. إطله بالله واطلع بره اطلع يعنى امشى امشى يعنى ارحل ..براك ضيعت الملفات الفى ايدك  فارق لا تلم وقربك فيهو سم..فشلت فشل ذريع فى تصميم الشعار الما سر البال نوهائى والاضاءة لحقتها امات طه ! ومن فوق عيمودى دا اسمح لى اشتكيك للجنه القانونيه ..أنا (هويدا محمد الماحى وقيع الله رقم العضويه”اللتى”..”11323″ ابدور اشكيلكم خالد هداية الله سبب العله ..يا ناس اللجنه خالد ما بناضمنا “بتاتا” وعدنا زماااان بى الفضفضه عبر مؤتمر صحفى جامع قبال الانتخابات قامت الانتخابات وانتهت التسجيلات وتأهل سمو الهلال للمجموعات والمؤتمر الصحفى لا قام ولا الله قال ولا هداية الله اعتذر لينا سااااكت اها بصفتى عضو فى الجمعيه العموميه شكوتى دى صالحه ولا مالحه ابلها و”اكرطع” مويتها ..“بليز  بالقنقليز”ردوا على ضرورى و”ميستعجل” كمان هووى ها اقيفوا بدور اضيف للشكوى والسعالات سعال ديكى انتوا عندكم حراسه متل ازالة التمكين ..؟ سمح  المتهمين بتختوهن يعنى بتتحفظوا عليهم وين ..؟ اكان شحدت لى حبة جاز من ناس السوباط والعليقى ما بدونى فتيل ..من شان لو بندور نفلع ولا يمكن نولع 

فتيل شنو ان شاء الله شمومه ومعاها “جغمه” بنزين والله العظيم ما ببلعها نوهائى انا ما “بلاعه” لكن ((ولالالالاعه)) ؟

اى والله وتالله وماكم طالبينى حليفه ولا هو دافعلى ثمن القذيفه..

اسمعوا هنى دا انا ما بينى وهداية الله غير مصلحه الوطن سمو الهلال العليا ..اكان خت الرحمن فى قلبه وعدل دربه “بشكرو” واكان استمر فى خرمجته وصمته” بشترو”..

@ أساطين العشاق قالوا كلمتهم وناصروا قائد المسيرة فماذا بشأن اتحاد “العمل” لا رفعوا رايات مسانده ولا نظموا وقفات احتجاجيه اوليس هشام السوباط رئيسهم هم كمان  ام ان مجرد الاستنكار يعد كافيا بوجهة نظرهم ..؟ طالعت اليوم شيئا عجبا التهديد والوعيد بالتصفيه الجسديه هذا ما لم يفصح عنه المستهدف نفسه لا بل اعلن عبر إصدارته الالكترونيه عن اقتراب اوان عودته للسودان وكشف اسماء اعدائه..السؤال هل أمن السوباط  شر التصفيه الجسديه ام انها فرية صورها خيال البعض ..؟ وهل تدخل اتحاد الفيفا هذه المره كما اورد احد كتاب الاعمده..؟ سمح الفيفا كانت وين عندما تم تجميد اموال السوباط “ججت” والزج به فى الحراسات مرات ومرات ..؟

هل هنالك مخالب تسعى لتحوير وتدويل مشكلة السوباط لامر فى نفس يعقوب..؟ بل السؤال هل السيد هشام السوباط نفسه وراء هذه التسريبات الخطيرة المثيرة ..؟ اذا لماذا لم يصرح ويجاهر بامر التهديد بالتصفيه الجسدية من قبل والروح اهم من كنوز الدنيا ..هل يسعى البعض الى تصوير السوباط بطلا خارقا  رجل المستحيل ..سوبرمان .. بات مان ..مثلا ..لتسليط الاضواء عليه وسحب البساط من سيد شباب الزعيم العليقى يعنى نظام نرجسيه وكدا ..؟

@ ايموروا “نقاطه” منتخب غانا قال ليهو تعال العب فى المونديال لتنعش خزينة الزعيم سمو الهلال ..والعجب الشعار بسم الله ماشاء الله شعار دولة سمو الهلال سترفعه غانا فى المونديال الهلال وطن والشعار علم ..السمو والعلو والقمم لينا والدمار لى الرمم اعادينا.!

@ هل يفلح منتخب الشباب فى انتزاع نقاط مباراته اليوم فى بطولة سيكافا من منتخب بورندى

@ فرحنا بانطلاقة الممتاز كان مرده الى كونه سانحه ممتازه فى اطار برنامج سمو الهلال الاعدادى للاستحقاق الافريقى ..ولكن نقول شنو مع البدعه “سيكافا” والتأجيل غير المبرر والفراغ بين اداء المباريات ما حبابه ليت سمو الهلال سعى سعيا حثيثا لاداء مباراة حبيه قبيل مواجهة الشنداويه الخميس المقبل

@ عول الاهلى الشنداوى كثيرا على سحل المريخ تحت اقدام باشرى والرابطه كوستى ..ونسى او ربما تناسى “مريخ التحكيم ” او تحكيم المريخ ..ما فرقت كل الطرق تؤدى الى نحر الخصوم بالصافره التحكيميه الفاجره الكافره ..كما نسيت النمور ان من مفاتيح جندلت الخصم “احترامه” ..المضحك المبكى “هجم صلاح نمر” جووووه عرين النمور ..عطل وشنكل  وضرب “امدلدوم”وكفت “صبجك” ورمى وغض عنها الطرف “الحكما” -اى والله..اياك اعنى يا الحكم المساعد حامل الرايه ..عشان كدى (ال” var ” ال “var”) يا اتحاد اللقيمات .. الفار “الدلقون” غدار..للعباد..!
@من اقوالهم الارباب صلاح ادريس :”التلفزيون مابشتغل بدون رسيفر وهيثم رسيفر لكل مهاجم التحق بالهلال”..وانا بقول لو ان الامين البرير لم يرتكب اثما سوى شطب هيثم لكفته  للاقامه فوق جحيم وسعير القيامه..سؤال شاغل بالى ياربى بنلقى سمو الهلال قدامنا فى  الجنه برحمة الله ..بصراحه ما قادره اتخيل الجنه من غير هلال ؟

@نبض العشق السرمدى ..نقرات عشق نمة ريد.. غرام الروح ..ويبقى العشق ما بقى سموالهلال !”)

زرقـاء الـعشق

هُـوَيْـدَا اَلْـمَـاحِى

السبت 5/11/2022

 

شاركها على
أكتب تعليقك هنا

لن يتم نشر عنوان بريدك الإلكتروني.