Take a fresh look at your lifestyle.

عِـشْقٌ سَرْمَـدِيٌّ– هُـوَيْـدَا الـمـاحى-الكاس كاسنا شيلوا الوطنيين نجيكم بالمحترفين.! -نا تَطَيَّرْنَا بالموديل آية وبقت النهاية المحزنه-دولارات السودان الهلكان بعزقها البرهان ولهطها الاتحاد السجمان

عِـشْقٌ سَرْمَـدِيٌّ– هُـوَيْـدَا الـمـاحى

  الكاس كاسنا شيلوا الوطنيين نجيكم بالمحترفين.! 

إنا تَطَيَّرْنَا بالموديل آية وبقت النهاية المحزنه

دولارات السودان الهلكان بعزقها البرهان ولهطها الاتحاد السجمان

استراليا-ملبورن_عشق البلد
الله -الوطن الهلال 1898م..النصر بجدارة أو الهزيمة بشرف.!

@ عشقى السرمدى الهلال يامنى الروح يا أنا ..تبقى سيرتك هى الكلام..وتبقى صورتك هي الرؤى..ويبقى إسمك هو الغنا..يا قمر مدور ..فضل ليك شويه ..شويه وتنور ..! قفز سمو الزعيم الهلال فى التصنيف القارى من المركز 17 الى المركز 14 والقادم احلى هلالنا يسمو  ويعلو مع ال10 الاوائل باذن الله.!

@طبعا من اللاعيب اتحاد عصبة الاشرار اقامة نهائى كاس السودان الليللى دى بالتحديد ..والتهديد المستتر” قامتبوا”..”ست النفر “”برهان تيه” فى الحفر بتجريد سمو الزعيم الهلال من عناصره الوطنيه المتألقه “ججت” للمنتخب ..وقال كدى الثعلب المكار البروف فلوران قالهن :(قشه ما تعتر” ليكن شيلن” كووول اللعيبه الوطنيين ..بجيكم بالمحترفين.. عاد لكن تقبلوا وييين ..وكيفن رطن باللهجة اللت الشوايقه ؟قالوا فطموه عليها الحكم فى بربره ..!

@ الدولارات “اللت “شعب السودانى المسكين “بعزقها” البرهان فى بدعة بطولة سيكافا ..الغريب والمريب البرهان “القاعد” فووق راسنا وحاكمنا بالجزره والعصا.. وكاتلنا بالعطش والجوع والمغسه..ما بعرف الاصول فى التعامل باموال الشعب المغلوب على امره..حصل شفتوا ليكم رئيس انتخابى او انقلابى بسلم اموال الشعب “تسليم أهالى” .. لا وكمان “انبهالى” ..؟اكان 200 ولا 400الف دولا مانى خابره..والمبلغ فص ملح وداااااب لا دخل خزينة الاتحاد ولا صرفوا على سيكافا “عار الاتحاد” ولا الله قال ..!

الله يسألك يا البرهان جيش السودان ما كان اولى بيها ..؟ انسان المدن والقرى منكوبة  السيول والفيضانات ما كانوا اولى بيها ..سمح ديل “خلهن” انسان السودان الجعان ما كان اولى بيها يعنى تدعم بيها الرغيف وتوقف النزيف ..الجاز والكهرباء والغاز كلهن عايزات انقاذ ..والمستشفيات يا “ظريف” معلمه الله لا محاليل لا دربات لا سرنجات..والادويه المنقذه للحياة لحقت الجماعه الهجوا سابوا البلد وفاتوا  ..فاتوا “ناس انحنا ديل” ..! الاطفال المشردين والشحادين ما كانوا اولى بيها ..ياخ بطولات اتحاد السجم دا ذاتها “المنتاز -وكاس السودان ” ما كانت اولى بيها ..المدينه الرياضيه ما اولى بيها ..؟

@ من معتقداتنا ليس فى السودان فحسب .. ما تطفوا نورة العريس..”وما تطفن وتطغن على نورة العروس” ..ياربى  القيامه القامت فى الاسابيع “الفاتن ” كان غرضهم  منها  ان يطفوا نورة سيد شباب الهلال العليقى ..؟..اها يا اللخو العليقى الطفا النور منو ..؟ ولا لسه ما طفوا والاضواء عنك ما سحبوا ..؟

@ كان النبى “ص” يحب الفأل ويكره” الطيرة-التطير”..ولكنا” تَطَيَّرْنَا” بالموديل” ايه” وبقت النهاية المحزنه..التقطت الصور مع شفع منتخبنا فانقلبنا ودحرنا ..واول البارحه اتصورت مع منتخب جنوب السودان طوااااالى قلنا ليهم انتوا طايرين والكاس تشمو قدحه فطاروا ومن منصات التتويج غاروا 

@ صلاح عادل الولد دا المثالك نادر الولد دا ..ثبات ونشاط وتألق فى جل المشاركات هنيئا لسمو الهلال بك فارس مغوار لا يشق له غبار .

@المتنبى قال:( جَميعُ فَوائِدِ الدُنيا غُرورُ..وَلا يَبقى لِمَسرورٍ سُرورُ..فَإِنَّ نَوائِبَ الدُنيا تَدورُ) ودور بينا البلد دا.

 @عقبال طرح عطاء تركيب الاضاءة..طرحت دولة سمو الهلال عطاء لإنشاء منصة إعلامية “مشفرة “مدفوعة القيمة على الشركات المتخصصة تقديم عروضها وفى ذلك فاليتنافس المتنافسون..سمح..التشفير لا شنى ..؟

“مشفرة “يعنى مقفله يعنى بى قروش ..!

@ عاشق سمو الهلال “مامون عبدالرحمن”:(مازال قطار الأزرق يمضي كما نشتهي ويتمنى كل هايم ولهان دهس القطار اهلي شندي والباقي ينتظر الدور مازال عيال الوصيف يتباكون على نزيف النقاط ويرمون بفشلهم على اتحاد الجسم الذي َمنحهم بطولات وهميه لايستحقونها كم انتي معذباهم ومجنناهم بكل مايخطه يراعك من كلمات صادقه سيري وعين الله ترعاك

@ الفشلوناب ماسكاهم ام فريحانه عشان اختاروا منهم 16للمنتخب ..سمح يا الطروش هل اتاكم نبأ ال13 من  محترفى الملكى الريال الذين لبوا نداء  الى منتخباتهم الوطنية..؟ اما بلغكم نبأ الفيفا وانها ستدفع للفريق 130 الف باوند عن كل لاعب يومياً طوال مدة مشاركته فى كأس العالم ..؟

@ “ناس نيو كابتال”..بلو الاتحاد  جنس بل ….رسلوا جواب بطول نهر النيل ونازلين فوقه بالتقيل وبوبا على التقيل ..”قالولم”يا عصبة الاشرار..

تعصبكم وانحيازكم للمريخ وتهريبه من حى العرب بالصوره السافره دى ماهو مهضوم..فالتتقوا ربكم فى الزعيم الهلال الديمه معاكم مظلوم وحقه مهضوم وما تنسوا عند الله ستجتمع الخصوم ..و تفصيل كاس السودان على الاهلى الخرطوم  عار يا “جهال” و خرق واضح لبنود العقد بيننا ..نظموا كاس السودان فى اوكات الراحه “اللت” كاس العالم وما اكثرها ..غايتو الاتحاد عصرهم جنس عصره ..!

ونحنا علينا “المصرررر – الشطف متل شطف الهدوم” بنمصرهم ونشرهم فى الصقيعه .. مباراتين مع رواندا..!! يا الما بتخافوا من الله يعنى عايزين تجهزوا المنتخب بيهن فى شهر 11 عشان يلعب فى منتصف  يناير المقبل ..؟ 

@نبض العشق السرمدى ..يا غرام الروح..نقرات عشق نمة ريد..  ..ويبقى العشق ما بقى سموالهلال !”)
زرقـاء الـعشق
هُـوَيْـدَا اَلْـمَـاحِى
السبت 12/11/2022

شاركها على
أكتب تعليقك هنا

لن يتم نشر عنوان بريدك الإلكتروني.