Take a fresh look at your lifestyle.

عِـشْقٌ سَرْمَـدِيٌّ– هُـوَيْـدَا الـمـاحى-سمو الهلال عالمى إذا حضر ..يجبّ مونديال قطر-اتحاد السجم “الأعْشى” اتعشى مع عراب الدلاقين فتَجَشَّأَ 

عِـشْقٌ سَرْمَـدِيٌّ– هُـوَيْـدَا الـمـاحى

سمو الهلال عالمى إذا حضر .. يجبّ مونديال قطر

اتحاد السجم “الأعْشى” اتعشى مع عراب الدلاقين فتَجَشَّأَ 

استراليا-ملبورن_عشق البلد

الله -الوطن الهلال 1898م..النصر بجدارة أو الهزيمة بشرف.!

@ سمو الهلال “عالمى” متى حضر ..يجب مونديال قطر -اى-والله وتاالله_ “..إذا لعب سمو الهلال فخبرونى فكل مباهج الدون هباء لا مونديال ولا الله قال سيقعدنا عن مساندة ومؤازرة عشقنا السرمدى سمو الهلال ..هولندا و الإكوادور قد نتحين السوانح لمعرفة النتيجه فقط لا غير كما انها تحتمل التأخير ويمكن  مشاهدتها فى الاعادة ..متل (ملاح القرع ” البايت ” بالكسره..حلو حلا ) .. !

(السابعه ) تحتضنها الجوهرة المفخرة الما مسخره ..هلالان فى سماء امدرمان ..عند الساعة : 6:30 مساء..هلالنا وزلالالنا محط امالنا “سمو الزعيم  الهلال ” الكبير اوووى ..الما هو ساهل ..ولا متساهل يستضيف هلال الساحل ..لمواصلة اقتناص النقاط كاملة غير منقوصه كما نأمل فى زيادة مردود الاهداف..بعض الفرق لعبت  امامنابخط دفاع متأخر..بينما واجهتنا اخرى بالدفاع المتكتل  بإغلاق العمق تماما..يجب  اختراقهم عبر الاطراف على ان تكون الاطراف خفيفه ورشيقه وسريعه وباصاتها خاطفه والحرفنه والتفنن فى التعامل مع اسقاط والتقاط الكرات الساقطة ..والارتكاز لازم يكون لاعب “دسيس”.. الركلات الحرة ليها ناسها تخصص عديل كدا ..والمهاجمين لازم  يتمتعوا بالفراسه وما يستنوا تحضير الاهداف  لازم يشاركوا  ويتغلقلوا ويصنعوا الفرص لكن ما يتوغلوا فى النص عديل يشتغلوا بس خلخلة فى الاطراف لانها نقطة ضعف الفريق المتكتل دفاعيا ..باذن الله منتصرين وال18 يبقن 21.

@ اتحاد السجمالأعْشى”..الظاهر  البارح اتعشى مع عراب الدلاقين” فتَجَشَّأَ “..( بيض بيض)..عفااااانه نفوس وسخانه وذمم سجمانه ورمدانه..هو نان كان زاره الرسول ..؟ ما زاره عديم الاخلاق والاصول ابو سروال “منصول”..وبدل اللقيمات طبخوا الفسيخ المعفن واصدروا القرار بتأجيل مباراة القمة “(واااى وااااى ) فزوا جروا 

@ الفى العصر “شررررر..شررررر”..( شرشرة الاسهال)…سبحان الله ربك رب الخير ..مباراة المونديال  بين قطر و السنغال الساعه 3 عصر ..مشاهدة مممممممممتعه و بى مزااااااج ..بعدها بى ربع ساعه الما فى زول شغال بيها شغله .. الساعة 3:15 عصرا.. اللهم انصر الشرطه القضارف نصرا مبينا..واخذى الدلاقينا واتحادهم وحكامهم المرتشينا  المعفنينا .

@أقلامنا مَغْلُولَةٌ ۚسمو الهلال..ومحكمة “كأس” تلوح مهددة’  بالحرمان من التسجيلات القادمة والسبب قضية المحترف الكنغولي-“ادريسا امبوبو” .. مجلس السوباط ورثتم القضية باثر رجعى لا ناقة لكم ولا بعير فيها ..هى من اثار مخالفات مجلس الدكتور “اشرف الكاردينال “وقد منينا بها وتلويحات محكمة الكاس فى هذا الوقت العصيب واستاد دولة سمو الهلال بامس الحاجه الى صيانة شامله والملعب الرديف فى انتظار السياج وبعض المتطلبات لماذا لا يعلن “الدكتور الكاردينال “عن تحمله تبعات القضيه وسداد الغرامه الماليه حتى لا يضام سمو الزعيم الهلال ..؟

@ولما كانت المصائب لا تأتى فرادى فهاهى ذى قد اتت تتهادى”يعنى جايه “تقدل” ..ومربط الفرس  هو  المام الادارة بتفاصيل الوضع و الظروف المحيطه بالمحترف الكنغولى “ ليليبو  مكابى “

قبل توقيع عقد الاحترف ..من البداية وحتى “الرعايه “اى الشركات والمؤسسات الراعيه للاعب حال وجدت ..هل احيط سمو الهلال بها علما من اللاعب او ناديه السابق او وكيل اعماله..؟ ستظل اقلامنا مغلولة سيدى سمو الهلال و”الرك” على مدى ادراك والمام مجلس الاداره بتفاصيل العقودات “ججت” ندعو الله الا تكون مطالبة الشركتان الراعيتان للمحترف قد  اتت على غفلة من مجلس السوباط .

كتر الملامة عليا..من يوم ما اتناولت “انبشاق” وإندلاق إفادات المدير العام لنادى سمو الهلال “الاستاذ محمود السر “والاتصالات ما تديك الدرب منهم من كال الهجوم ضفارى ومنهم من استبسل فى الزود عن حياض المدير العام واخرون نفوا نفيا قاطعا ان يكون هو من سرب التحقيقات وبحمد الله كووولهم مجتمعين بى سلامتهم وحتى الفرحانيين الشمتانيين كنت اردهم الى جادة “عيمودى” لالقاء نظرة عليه ..انا تناولت الامر بعيدا عن الشخصنة وحق الرد والنفى محفوظ ..واخر تواصل تم اليوم من الاستاذ (خالد الصورامى) نافيا نفيا قاطعا ان تكون اللجنة العدليه هى مصدر تسريب المحضر باى حال من الاحوال وانهم يعملون بمهنية عاليه ..سمح السربوا منو ..؟ واللجنه التزمت الصمت لا شنى ..مش المفروض انها تتخلع وتنزعج وتنبعج من التسريبات بى رمتها وطوالى تبرئ ساحتها وذمتها ..؟ وكمان تبحث وراء المسربين ..؟ عن نفسى لن يهدأ لى بال كلما  برزت تداعيات لحادثة التسريبات العار ..والخوه بى دربها بنعزها ونصونها .. والحق ابلج .

@ منتخب “الألبيسيليستي”الجريح  بقيادة ميسى فى مواجهة  منتخب المكسيك ابونقطه السبت المقبل، في بطولة كأس العالم.بقطر هل يضمد رفاق ميسى جرح الاخضر السعودى الغائر ام ستعمق المكسيك الجراح والارجنتين فى الباى باى  ..؟

@ قالوا الما بدور “الدون” بحمرلى ويستخسر عليهو ضربة الجزاء الحلال للبرتغال امام غانا ..اى والله- سمح يا الزعلانيين رايكم شنو تقنية الفار ما بتتدخل براها ..اى والله- الا الحكم يقول ليها تعالى تعالى تقنية الفارى ..وقع ليكم والحكم ما هببوا ليها لانه واثق من صحة الضربه وهى فى الحاله دى متروكه لى تقدير الحكم الله ورقبته قلتوا لى ميسى مالو ..؟

@ والله العظيم وكتابه الكريم المغسه كاتلانى من دخول العدو الجاكومى وبرطعته فى الجوهرة المفخره حتى غرف اللعيبه دنسها وحتما لديه اغراض شتى من الزيارة ..ما معروف يكون سوالو ..كشحه ولا غزالو عمل فى اى فتحه ..والعياذ بالله ..والتاريخ حاضر عندما دفنوا صقرا داخل محراب سمو الهلال ما خلوا اسماء اللعيبه والاداريين والجهاز الفنى وعيييييك الحجاب السفلى النجس “قدر دا” طوووووويل طول نهر النيل الله لا كسب الجاكومى ولا اذرعه واعوانه فى حياض دولة سمو الهلال .

@ فى زول قال :(مشيت حكيت للشيخ مشاكلى ومواضيعى الخاصة..سمعته فى خطبة الجمعه يحكي فيها ويقول: (حدثنى أحد السفهاء)🤔😭😂😂

@نبض العشق السرمدى ..يا غرام الروح..نقرات عشق نمة ريد.. ..ويبقى العشق ما بقى سمو الهلال .!)

زرقـاء الـعشق

هُـوَيْـدَا اَلْـمَـاحِى

الجمعه 25/11/2022

شاركها على
أكتب تعليقك هنا

لن يتم نشر عنوان بريدك الإلكتروني.