Take a fresh look at your lifestyle.

عِـشْقٌ سَرْمَـدِيٌّ– هُـوَيْـدَا الـمـاحى-رباعيه مُسْكِره متبله ومبهرة ومغربله-الهلال هَبَّاش والمونديال قِصَاصُ-حازم للمراريخ المفاضيح :الهلال فيهو رجال بدفعوا يعنى انتوا ..!

عِـشْقٌ سَرْمَـدِيٌّ– هُـوَيْـدَا الـمـاحى

رباعيه مُسْكِره متبله مبهرة ومغربله

الهلال هَبَّاش والمونديال قِصَاصُ

حازم للمراريخ المفاضيح الهلال فيهو رجال بدفعوا يعنى انتوا ..!

 الزومه الخرطوم  والشرطة القضارف بين النحر والذبح والعقر

استراليا-ملبورن_عشق البلد

الله -الوطن الهلال 1898م..النصر بجدارة أو الهزيمة بشرف.!

الزومه مظلومه والشرطة القضارف ضبحوها ضبح

@ أساطين العشاق ازيكم ..ومين زينا ..مافى تب ..هلالنا صعب دايما وابدا مفرحنا ..الله يديم الفرحه ونفوسنا المنشرحه ..اى نتيجه لمباراة الامس شحيحة الاهداف لم تكن لتبعث بالطمأنينة الى قلبى ..اى والله..المعطيات تفرض انفراد سمو الزعيم بالصداره والتحليق بيعيد ..بعيد..بعييييد..عن الاندية مجتمعه “جججت” لانه البون شاسع والفرق واسع والمقارنة معدومه تب.

@ يا قضارف الخير جاييك مليكنا المفدى سمو هلال السعد و الخير ..لا بشترى الحكام ..لا بساند الظلام ..عنده 3 نقاط جاى يحصدن من مطامير الشرطه وينثر الابداع درر.

@ خليك من رجال ديل ما بنى ادميين..ما بشر اصلا..يا ((الباشا” الغشيم” قول لجدادك كر))..

عن “هيروشيما ” “حازم مصطفى” وقد اصابة المريخاب فى مقتل ..اى والله- “قالهن ما كن رجال ” اجششش-اضانى طرشها ..!!

وما” تغشن روحكن ساهى ..انتوا ما شبه سمو الزعيم الهلال “دى حقيقه”..تب.نقفل عليها بالضبه والمفتاح .!!!!

((عايزين تقارنو نفسكم بالهلال..الهلال فيهو رجال(….)-يا الرسول يا النبى .!! “انتك” يا حازم النصيحه تقول :و(كمان رجال سيدالبلد سمو الهلال  بدفعوا ..لكن انا بدفع برااااي) يعنى هو الراجل وحده والبقيه ما بدفعن ولا مليم ..؟ عيب عليكم يا المراريخ المفاضيح ..لما رئيسكم وقنصل كمان يعنى دبلوماسى .. يطلعكم “كهن” ومحن الزمن تانى الفاضل “ليكن ” شنى..؟ ما فضل لينا الا نقول ليكم :ادونا”المسدسات و الشواكيش ” وهاكم “رحاطتنا”..رحم الله قنصلا عرف قدر فريقه ..والعارف عزو “جمال الوالى “

@ التحكيم السقيم يسئ استخدام الصافرة ..ويحيلها الى “شفرة” فاجرة قاتلة .. امس الزومه مظلومه .نحروها نحر ..حيث .شهد لقاء الزومه الخرطوم وحى العرب بورتسودان ظلم وتحامل التحكيم السافر بحق الزومه الديمه من حكام اتحاد الدلاقين مظلومه وحقوقها مهذومه بين البرمجه المخرمجه والتحكيم سبب الاذى  ..ولم تشذ مباراة الشرطه القضارف عن قاعدة ظلم التحكيم ..”الضبح” الشرطه ضبح عديل فى الدقيقة 84 ضربة جزاء وااااضحه لكن صفارة الحكم الفاضحه غيرت قراراها بى همسه واشارة والغت ضربة الجزاء المحتسبه للشرطه القضارف ..ولو لا شرطة”بوليس” القضارف لما قدر للمريخ النجاة من غضبة اهل القضارف” ججت”والله كانوا طمروا المريخاب طمر .

وهلال الساحل “سوحوا”..وسيحوا بالصفاره الغداره

@ كاميل كاميل “كملا” ..مداقع بولندا قال الاخضر السعودى كان محظوظ قدام ناس مسى ولو المواجهة “السعوديه والارجنتين” تكررت 10مرات ستخسر السعوديه 9 مرات ..والليله دى بنغلبكم بنغلبكم شر هزيمة وهى ذاتها ما كورة عبارة عن تمرين بالنسبه لينا ..اها يا الكوتش “هيرفي رونار” تولع نار ونقلهم الميدان يا حميدان ولا النظام شنو ..؟

-خلونا مع مباريات اليوم السبت الساعه الواحده م ( تونس ✘ أستراليا )-بولندا ✘ السعودية-الساعه 4:00 مساءاً – (فرنسا ✘ الدنمارك -7:00 مساءاً)-( الأرجنتين✘ المكسيك 10:00 مساءاً )..المباريات مجتمعه على صفيح ساخن ,, تطلعات وامال المسلمين والعرب ..معلقة بنواصى

الاخضر السعودى  وتونس الخضراء ..اللهم اجعلها امسية عربيه خضراء على الامه جمعاء

@ اسمعوا ده وبطلوا ده

بعد فشل تجربته مع نادي الرجاء الرياضي المغربي “الغابوني أكسيل مايي” يعود و يفتح الخط مع إدارة الهلال من أجل الانضمام للنادي السوداني في يناير القادم !..النار التبق فوق صنقورك وكتين فشلت مع الوداد نحنا مالنا ومال الفشله..؟

@ رغم الانتصار وحصد النقاط كاملة غير منقوصه ..نواقص الزعيم سمو الهلال داخل الملعب كتيره جدا نعم العافيه درجات لكن بالطريقه دى (ما بناكل عيش فى المجموعات )..الفريق بحاجه الى تجارب اعداديه قوية فتية مع اندية من العيار الثقيل ان شاء الله من مصر القريبه دى والله فى اندية لا يشق لها غبار بعيدا عن الزمالك والاهلى ..سمو الهلال بحاجه الى احتكاك حقيقى والممتاز دا لا بقدم ولا بأخر ولا الله قال 

@ صنقعت ودنقرت وعاينت وبحلقت ..لكني لم ابصر أبداً شعارا “خوزقوا ” زى شعارك سمو الوطن  الهلال ..اى والله -وتاالله- ياخ امس شعار هلال الساحل يقول يا بهجتى ومسرتى وشعار سمو الهلال”ينوح وآآآ اسفاى” ..غيروا الشعار الما بشبه سمو الهلال دا وحريقه فى الشركه واعلاناتها المبهدلة ..ياخ دى مسخره والشعار عنوان الفريق.

@نبض العشق السرمدى ..يا غرام الروح..نقرات عشق نمة ريد.. ..ويبقى العشق ما بقى سمو الهلال .!)

زرقـاء الـعشق

هُـوَيْـدَا اَلْـمَـاحِى

السبت 26/11/2022

شاركها على
أكتب تعليقك هنا

لن يتم نشر عنوان بريدك الإلكتروني.