Take a fresh look at your lifestyle.

عِـشْقٌ سَرْمَـدِيٌّ– هُـوَيْـدَا الـمـاحى- كرستيانو  فى الهلال سموك ورفعت شانك ميسى من حيرانك-كليمى كريمى حليمى ولا شركه خالد هداية الله العقيمى

عِـشْقٌ سَرْمَـدِيٌّ– هُـوَيْـدَا الـمـاحى

 كرستيانو  فى الهلال سموك ورفعت شانك ميسى من حيرانك

كليمى كريمى حليمى ولا شركه خالد هداية الله العقيمى

إحذروا الرياح الهوجاء والمطره الحدها النخره..والملاعين المخربين 

استراليا-ملبورن_عشق البلد

الله -الوطن الهلال 1898م..النصر بجدارة أو الهزيمة بشرف.!

@ من الاعماق بهواك ” هلالى” من الاعماق عاشقاك يا ” يا الغالى  “.. يا ساكن قلبى يا شاغل بالى..ومن الاعماق شرع سمو الهلال فى سبر  “اعماق” قواعد استاد سمو الهلال الخرسانية لتركيب الاضاءة ..خطوه عديله ..بوصيكم على “التأنى” والوقوف طويلا جدا قبل  الشروع فى التركيب و إستصحاب “مأساة سقوط اللافته الاعلانية باستاد الخرطوم “فى يونيو 2014 على عشاق سمو الهلال اثناء مجريات مباراة سمو الزعيم وفيتا كلوب الكنغولى ..كان الثمن فادحا للمصابين من امة سمو الهلال وما زالوا الى يومنا هذا يتجرعون الالم الجسدى ولم  تلتئم  جراح بعض الذين اصيبوا بعاهات مستديمه بعد ..يا سبحان الله تواصل معى احدهم فى غضون الاسبوع الماضى..ليحكى بمرارة عن الاهمال وتداعيات الحادثة على مسيرته المهنية وتضور اسرته على مر السنيين وهو عاجز عن سداد رسوم مدارس اطفاله بلا حول ولا حيلة ولا قوة له وقد اضحى “قعيدا “..وفى ذات الخصوص جمعتنى صدفة و”اتسابيه” محضه خلال الشهرين المنصرمين  مع اخر من عشاق سمو الهلالواحد  مصابى اللافته ..وهو مازال يدفع الثمن غاليا من صحته موجوعا من الجحود والنكران واستغلال البعض لمصابهم الجلل ونهب اموال خصصت لعلاجهم من قبل الوزارة ودولة سمو الهلال ..وهو عاتب على (البرنس هيثم مصطفى ) عتاب خاص لانه كان من ذوى صلته قبل سقوط اللافته وبعد السقوط نال الجحود من البرنس ..ولم يسأل عنه الى يومنا هذا ..”اصحى يا برنس  اللوم بجى بالغفلات واغلب ظنى انك ما كنت عارف انه من مصابى اللافته ..ولا انا غلطانه ..؟؟؟؟؟؟؟؟؟

نعود الى الاعمده ..يجب سبر الاعماق قبل تركيب الاضاءة ومراعاة الظروف البيئية  ” الرياح الهوجاء -والمطره الحدها النخره..والملاعين المخربين”

@التقط  “مجلس التحدى” القفاز لسداد مبلغ بـ « 140» ألف دولار..غرامة “المحترف الكونغولى”وقطع الطريق امام تهديدات الفيفا بالحرمان من التسجيلات ..ياها المحريه فى مجلس السوباط واركان حربه 

@لم اكن شغوفة بمشاهدة فعاليات مونديال “قطر” ربما فارق التوقيت 9ساعات..ومنتخب استرليا ذاتو ما عندو اى طموحات لانه كرة القدم ما اللعبه الشعبيه الاولى فى استراليا .. وحاجات تانيه “حاميانى”..بصراحه لانه “المونديال “كان عامل زى الدورى السودانى الممتاز رتابه وملل زى الملل بالامس فقط ارتفعت وتيرة الشغف والحماس ..من هنا “ورايح” المتعه حاضره وانا ذاتى حاضره يا مونديال قطر..ولائى للقاره السمراء قبل العرب .

@ هل تم تحجيمه ام  اقتصر دور “السفير “عبدالعزيز حسن صالح” بمجلس سمو  الهلال ..فى زيارة البعثات الولائية ..؟ سمح وين الدبلوماسيه المنشوده التى حسبتها ستتجلى فى ابهى صورها ..؟

@” كرستيانو “الفريد فى عصرك الزمان زمانك وميسى من “حيرانك” ..مناهو يوصل “شأنك “يا الفريد فى عصرك ..836 هدف ..وميسى يا دابو 812 هدف..ما قلنا ليكم “الدون” لاعب ماهو عادى ..؟ اول التبادى خامس لاعب يشارك في 5 نسخ من بطولة كأس العالم..تانى حاجى رصيده فى المونديال  11هدف..وتانى لاعب حر طليق ما مسجل مع فريق يتقلد شارة الكابتنيه فى المونديال بعد الكندي “بروس ويلسون”فى مونديال 1986…”كرستيانو رونالدو”أول لاعب أوروبي في التاريخ يشارك في 10 بطولات مجمعة كبرى “5 بطولات يورو و5 بطولات كأس عالم)، لينفرد برقم مهم سيكون تحقيقه  من ضروب المستحيل

&-وبديت أحلم ..ولن يدركنى الصباح والحلم مشروع ومباح ..اى وعزة وجلال الله ..اسمعوا هنا ربنا سبحانه وتعالى قال 🙁 إِنِ ٱسْتَطَعْتُمْ أَن تَنفُذُواْ مِنْ أَقْطَارِ ٱلسَّمَٰوَٰتِ وَٱلْأَرْضِ فَٱنفُذُواْ ۚ لَا تَنفُذُونَ إِلَّا بِسُلْطَٰنٍۢ):(دحين يا سيد شباب الوطن الهلال “محمد العليقى ” كرستيانو دا ما “بتباصر “..؟ من باب الرفق بالتاريخ بدل ما يحوص ويلوص ويرجع الملكى الريال تانى من تانى نحنا اولى بيهو ..وبدل اضاءة واحده نكون ركبنا اضاءتين اتنين ..ولو رونالدو جاء على الطلاق بالسبعة من الحبيبين الملك الهلال والملكى الريال ..ميسى “بجينا ماشى برا “..هو الحلم كان حرام ولا بقروش ..؟)

@ اسدل  محترف سمو الزعيم الهلال “جون مانو” الستار على ملف   ملف وكيل اللاعبين السودانى ”مجدي صديق“ الذى لوح متوعدا باللجؤ الى محكمة كاس للحصول على نصيبه من صفقة انضمام المحترف للهلال ..استلم الوكيل استحقاقاته وانتهت العلاقه بينه ومحترف دولة سمو الهلال ..انتوا ما ملاحظين استهداف الزعيم فى اليومين ديل بالتحديد دا اشتكى وداك بكى والزعيم مقبل على معمة صرف مالى ما يعلم بيهو الا الله   لصيانة الجوهرة المفخره “الدمرتها “وقربت تجيب اجلها الآفه سيكافا ..وتركيب الاضاءة وتكملة الملعب الرديف وعييييك ..الحمد لله الوطن الهلال رجاله اسود وبدفعوا ..وخير الشهادة ما شهد به الاعداء.

@ الله ..الله.. الله :(ادينا عرض اكتافك يا خالد هداية الله ..اخيرا انعتاق دولة سمو الهلال من شركة هداية الله ..ولكن لماذا لماذا يكون الوسيط للتعاقد مع الشركه الجديده “( Out of the box) او شركة ” ايريا” هو هداية الله ذاتو بى ذاتو ..؟

والله وتاالله ما فرقت لو بقت شركة “كليمى-KELME” “-او شركة “كريمى” ان شاء الله شركة  “حليمى” والله اخير من “الشركه البهيمى الجذيمى ” منتجاتها كانت من “بير السلم  عديل والله ما من العتبه عتبة شنو ..؟”..تبا ياخ شوهت جمال شعار الوطن الهلال ..اخيرا تنفسنا الصعداء ..بلى وانجلى ..حمد الله الف على السلامة.

@نبض العشق السرمدى ..يا غرام الروح..نقرات عشق نمة ريد.. ..ويبقى العشق ما بقى سمو الهلال .!)

زرقـاء الـعشق

هُـوَيْـدَا اَلْـمَـاحِى

الاحد 27/11/2022

شاركها على
أكتب تعليقك هنا

لن يتم نشر عنوان بريدك الإلكتروني.