Take a fresh look at your lifestyle.

عِـشْقٌ سَرْمَـدِيٌّ– هُـوَيْـدَا الـمـاحى- الزعامه هلال والإمَامَة هلال

عِـشْقٌ سَرْمَـدِيٌّ– هُـوَيْـدَا الـمـاحى

الزعامه هلال والإمَامَة هلال

استراليا-ملبورن_عشق البلد

الله -الوطن الهلال 1898م..النصر بجدارة أو الهزيمة بشرف.!

@ الزعيم سمو الهلال لا يضاهيه اى فريق داخل السودان .. يتوجب على سمو فرض اسلوبه على الانديه جمعاء ..اى 11 لاعب هم اهل لتمثيل دولة سمو الهلال .. راجيين الابداع والمتعه والاثارة مستر فلوران ..سمو الهلال سبق  الانديه بسنوات ضوئية .

@ تأجيل القمه  حال تم  ..جريمه مكتملة الاركان.. بكل المقاييس و المعايير..مع سبق الإصرار والترصد تم اختيار يوم لقاء “القمه” يوما لعمومية المريخ..حتى يتنفس فريقهم الصعداء مجعجا ومناديا :”عدالة المنافسه ” تسنوجب تأجيل القمه ..لا والف لا للتأجيل.

@ شاحده الله :(شنينه ام قرينات) دى كفاوى شنو دى ياخ ..؟

ما صدقنا خلصنا من(الآفه سيكافا)..جايين يقولوا لينا بطولة الشان للمحليين فى الفترة من ما بين 13 يناير – 4 فبراير 2023 بالجزائر…. لى متين يا الكاف ..؟ لعيبتنا لسه ما انسجموا ومدربنا لسه ما وصل للتشكيله المثاليه..وطبعا بدون أدنى شك شلة المنتخب ح تتوصى باقمار الزعيم الهلال وما ح يفضلوا لنا من الوطنيين ولا لاعب..نعسكر ليكم كيف ما فرقت معسكر خارجى ام داخلى ..؟

ارى ان تجلس حكومة دولة سمو الهلال الى “اتحاد السجم ” للخروج بصيغة مثلى تراعى التزامن مع استحقاقات الوطن الهلال القاريه ..واكان جيتوا لى راى الشخصى انا بشوف “حقو ” السودان يشارك بالمحليين من اندية المنتاز “ججت” ما عدا سمو الزعيم الهلال ويمكن كمان ندعمكم بى لعيبة الرديف … سمح وكت كلها “راير” فى “راير”..لحدود الجزائر ..(فووووكها) شنو اكان غلبتوها “للحرائر” وريحتوا الضراير ..؟

@ الجهلولى يسكلب ويعوعى .!

اكان شالو ما بتشال واكان سفهو للاسهال ..عرفتوا طبعا “الجاكومى “..بدل ما مايستحي على وجهه ..شغال اسقاطات لم يسلم منها احد ..قال المريخ ما نفذ قرار المحكمه بسداد غرامة المحترفين ..ترانا عارفين ..ولا هببوا لدولة سمو الهلال بسداد الغرامه الماليه ولا الله قال ..الغريبه انت كنت راس الحيه “الافعى” فى مجلس القنصل تلدغ وتنفس سمومك محل ما تقبل وما حصل سمعنا بيك دفعت فرد مليم ياخ وكت المجلس ما دفع او كما قال “حازم” الهلال فوقه رجااااال بدفعوا ولد دا ..خبارك ما دقيت صدرك ودفعت الغرامه ..؟ وقولك :(ابوجيبين معلم الله قدييييييمه ) بى جنجويدها وحميدتى سيدها وبيت قصيده بكره بمرق قدح” العصيده ” بنصيدها وبنصيدها وبتبقى عليك شديده.!!!!!

@ عايره وادوها “شلوت”

توقف بعض خدمات شركة زين للاتصالات بسبب عطل فنى ..هى الشركه من غير عطل سايقه العبط والهطل .

@ اليوم مباريات المتعه والاثارة والاعصاب وكضاب البقول اعصابه فى تلاجه ..الكاميرون وصربيا..هل سيفلح منتخب صامويل ايتو..؟ اتمنى ذلك.

اما مباراة غانا تعد الاصعب بكل المقاييس أمام كوريا الجنوبية..اعشق كورة منتخبات امريكا الجنوبيه حد الثماله ..البرازيل وسويسرا..ستكون ملتهبه.. واخيرا المتعه بين البرتغال وأوروجواى.

@ لا عجب فى مريخ العجب ..قالولك “الميدرب” ريكاردو ماسكاهو ام فريحانه بعودة اللاعب “العقرب” اجى يا الفريق “الاجرب”..؟ ما علينا ودا نذير فشل ذريع سرييييييع

@ قاعدين فى صمة خشومنا الساعه النلقى ليك الدنيا ججت عن بكرة ابيها عارفه ونحنا “يخربنا” خراب الترب “المقابر”..”أنتوني ألبانيز” الواحد دا قال حيغرقنا بالقروش من شان منتخب استراليا فاز البارح …ياربى هو رئيس الوزراء“أنتوني ألبانيز”  دا كلف نفسه بالسهر عشان كورة المنتخب ..؟ لا خلاص صدقناكم ..غايتو الفيكم اتعرفت ..حذارى باكر لما منتخب استراليا يغادر المونديال تطلعوا علينا بصدور احكام اعدام ابادة حماعيه على الشعب الاسترالى “جتت”

@ منتخب المغرب سوى البدع واطاح بالوصيف.. ونثر الفرح فى القارة السمراء جمعاء ليس الوطن العربى فحسب ..مباراة اسبانيا والمانيا كانت دسمه جدا ..اشبه بمباريات نصف النهائى او ربما النهائى ذاتو بى حلاتو

@ تابعت جزءا يسيرا من فيديو لرجال احد المناطق بالسودان تناول المتحدث حديثه عطفا على كلام احد الاشخاص الذى اشار عليهم بالاستنجاد بسمو الهلال لتكملة اعمار المسجد بسبب ان على المأذنة هلال ..( وكأنما مآذن المساجد لم تعرف بعد)!!  ليناشد المتحدث “جمال الوالى “على اساس انه رئيس دولة سمو الهلال ..ليتم تصحيحه ..عن نفسى ارى الاسلوب بخسا ..واناشد ابناء المنطقه من المغتربين والاثرياء بنفرة تكملة المسجد ..حقا سمو الهلال زعامة وامامة ولكن المساجد هنالك مؤسسات حكوميه تطلع بامرها يتوجب عليها دعم انشاء المساجد.

@ مسعولين من الخير ما يسمى (((بكتلة المنتاز )))..تم تكوينها لا شنى ..وما شفنا ليها اى حراك رغم العراك والاعتراك “فى الممتاز”..لا هشت ولا نشت ..ولا ناصرت ولا أزرت الفرق المهدرة حقوقها من التحكيم ..ولا طالبة بتحسين ظروف الانديه ولا ناهضت العبث والخرمجه فى البرمجه ..؟

@نبض العشق السرمدى ..يا غرام الروح..نقرات عشق نمة ريد.. ..ويبقى العشق ما بقى سمو الهلال .!)

زرقـاء الـعشق

هُـوَيْـدَا اَلْـمَـاحِى

الاثنين  28/11/2022

شاركها على
أكتب تعليقك هنا

لن يتم نشر عنوان بريدك الإلكتروني.