Take a fresh look at your lifestyle.

عِـشْقٌ سَرْمَـدِيٌّ– هُـوَيْـدَا الـمـاحى-هلالنا عظيم هلالنا جحيم طز فى  التحكيم-مجلس الهلال ادب الذئابا لقن الانجاس كوره ما حرابا

عِـشْقٌ سَرْمَـدِيٌّ– هُـوَيْـدَا الـمـاحى

هلالنا عظيم هلالنا جحيم طز فى  التحكيم
مجلس الهلال ادب الذئابا لقن الانجاس كوره ما حرابا
افسد “هاتريك جون مانو اللعنة على الحكم واعوانه

استراليا-ملبورن_عشق البلد

الله -الوطن الهلال 1898م..النصر بجدارة أو الهزيمة بشرف.!

@ هلالاب أساطين العشاق مبروك النقاط التلاته والانجاز غير المسبوق وهاهو ذا سمو الهلال ينافس نفسه عبر التاريخ..سبعه انتصارات متتاليه ..سمو الهلال صداره بجداره ..الدلاقين باقى نارها..

 -الحكم السجم نفذ مخطط الجماعه الأثم  بالسيسى والملى..والزعيم سمو الهلال ازداد بريقه تجلى

نقض هدفين و”حرم جون مانو “من هاتريك ..واحتسب هدف للخصم فوقه شبهة تسلل ..اوضح من قرنى الشمس..

@خسئت يا حكم القضارف يا “النجس” اضفت للاندال “حمار”..برافو افلحت فى افساد اهداف الصياد “جون مانو” وحرمته من التوقيع على هاتريك .

@ “بوخة قعدت ” مطعم الدوحه فاحت شمومتها البارح فى القضارف ..كانت استهلالية المخطط الاثم ..غايتو “مانى خابره “..فى دوحة العرب..منو العازم ..ومنو المعزوم ..”الاتنين خموم”  ..مزمل ولا الاتحاد “المقمل” لكن الطبخه معلومه..المحيرنى الطرفين “الاتنين”-“بتاعين قبض” يكون القبضهم منو ..؟ 

@ مجلس السوباط افيقوا..وهبوا لنجدة “عشق البلد -سيد البلد” من جبروت عصبة الاشرار .. وتنمر الحكام ..اما كفانا ..التبارى فى الملاعب الهلكانه السجمانه ..؟ بتوجيه خطاب اللهجه لاتحاد السجم ولجانه “الرمم”.. علموهم وفهموهم انها كرة قدم وليست معارك وحروب وتصفية حسابات 

@ تقنية ” الحمار والكارو ” فى ملعب القضارف ..كديسه “قطه” عادى تدخل الملعب “كلب” “ديكى” برضو  ماشى ..عطفا على جداد العرضه جنوب.. لكن “كااااارو والحمار جارو” ..دى جديده لنج ..هل يا ترى تكون دى عربية التلفزه ..؟

ولا يمكن تكون النقاله “اللت” الاسعاف ..؟

سمح فالنفترض “الحمار ” دا حكمت وركبت فى راسه “البردبه” وقال كدى وقام “فنجط” فوووق ارض الملعب بتدوا كرت احمر ولا بتهدوا وتجيبوا ليهو العلف و”البنبر”..؟

– خلاصة القول ما حدث بالامس فووق استاد القضارف لا برضى الله ولا رسوله ..مخطط مفضوح لعرقلة انتصارات سيد البلد ..وحرمانه من اميز اللعيبه فى كورتنا يوم 7 الجاى مع الكان (((وصيفنا زمان))) حتما هنالك اعتراضات وشكاوى قد تم رفعها للحكم الرابع ولا شنو  يا عبدالمهيمن ..؟ نرجو ان تكون مشفوعه بخطاب نارى من مجلس الهلال للاتحاد كى يرعوى وحكامه الذين يفسدون الدورى الممسوخ ومشوه خلقه .

@ اصابات اقمار سيد البلد ..” صالاويه”ام “كحلاويه ” ولا “عاديه”..وارضية ملاعب المنتاز سبب الاذيه..؟

تعددت لاصابات بين خفيفة وطفيفه الى متوسطه ثم مقعده  بضعة  اسابيع وشهور ..عزى البعض السبب الى صالة الجيم بينما وصم اخر مردود المدرب “كحلاوى ” واخرين يرونها اكثر من عاديه بينما يراها البعض نتاج التبارى فى ملاعب الدورى “المعطوبه”.

@طالبت فئة من اساطين العشاق الاعتصام امام مبانى اتحاد السجم ..لا احسبها فكرة صائبة فى هذا التوقيت ..وهذا لا يمنع من ةايصال صوت العشاق عبر المنابر الاعلاميه كافة ..ودور الرابطه المركزيه يجب ان يكون قويا فتيا ..برفع لافتات فى التمارين والمباريات  مناهضة لفسوق وجور وعهر التحكيم ..واستهداف سيد البلد بشكل سافر

@ اسمعوا منى الوصيه ..مافى داعى لتكرار ما تم من تعطيل رحلة الزعيم الهلال من امدرمان الى القضارف ..الممتاز فى بدايته ..هنالك ضوابط يجب الالتزام بها ..كرم الضيافه والتوقف فى الطريق حتما سيكون خصما على راحة اللاعبين الذهنية والبدنية .

@نبض العشق السرمدى ..يا غرام الروح..نقرات عشق نمة ريد.. ..ويبقى العشق ما بقى سمو الهلال .!)

زرقـاء الـعشق

هُـوَيْـدَا اَلْـمَـاحِى

الخميس 1/12/2022

شاركها على
أكتب تعليقك هنا

لن يتم نشر عنوان بريدك الإلكتروني.