Take a fresh look at your lifestyle.

عِـشْقٌ سَرْمَـدِيٌّ– هُـوَيْـدَا الـمـاحى-لا بُدَّ من تحكيم أجنبى للقاء القمه والرمه -إِينَاس العليقى رهن الوطن مو حقيقى- التسوى فى الصينى تلقى فى النطحنجى نمر 

عِـشْقٌ سَرْمَـدِيٌّ– هُـوَيْـدَا الـمـاحى

لا بُدَّ من تحكيم أجنبى للقاء القمه والرمه 

إِينَاس العليقى رهن الوطن مو حقيقى 

التسوى فى الصينى تلقى فى النطحنجى نمر 

الله -الوطن الهلال 1898م..النصر بجدارة أو الهزيمة بشرف.!

@ هلالاب أساطين العشاق ازيكم ارقدوا قفا وخلوا للدلاقين مشى الحفا..البارح ناضمت سيد شباب سمو الهلال “محمد العليقى” بخصوص الاطمئنان على الوطن سمو الهلال ..من كارثة الرهن الافاده التى امدنا بها عمنا مهدى المحامى الامدرمانى الهلالابى القح ..انا الفهمته من رد العليقى المقتضب انه مافى مخلوق قدم ليهم شهادة رهن ..والعندو شهادة رهن يمرقها ..طبعا  “العليقى” ما صد سائل نوهائى ..انت وكت ما تناضمه بتلقى جبار للخواطر ..صحى بينى وبينكم مرات كدى برد من طرف مناخيره ..قلتوا لى كيف ..؟ سمح هاكم البينه “بتحسها حسسان” و”تشمها شممان ” فوق الرد المقتضب المكتوب بتشوفه مارق من مناخيره ..لكن ما تكلموا زول ..!

والله كتر خيرو رغم “مشغولياته” الكتيييره بتلقاهو ..عطر السريره..وكمان فوقه من شيم النبلاء لو السؤال خارج دائرة اختصاصه بوجهك للشخص المسؤل ويمكن يدق ليهو ويسألوا ويرجع ليك “بالاكيده”..

اها ما سألتونى من (إِينَاس العليقى) دى بته ولا ستو ..ولا السكرتيره..ولا “الموديل ” ..برى ولا واحده فيهن ان شاء الله ام وليداته تكون من جماعه التكفير  البقولوا الكوره حرام وما “قرايه” للبنكتبوا ..هاكم حقيقة (إِينَاس العليقى)

🙁إِينَاس بمعنى يقين يعنى عند العليقى الخبر اليقين ) احبطكم صح..؟

والعندو معلومه عن رهن الاستاد(( يرسل  شهادة بحث مرهونة))..عطفا على عمنا الاستاذ المحامى الهلالابى اب قلبا حامى “مهدى خلف الله” ..احسب ان الرهن الذى رأته عيناه ربما كان واقعا ماثلا حينها وانتهى بانتهاء اجله يعنى الرهنوا سددوا وفكوا الرهن والرهن لا يتم الا عبر الاجماع الهلالى “جمعيه عموميه” زمكتب الوالى الله يرحم المغدور” قصى مكتب الوالى ” كان جاب لينا الزيت من جووووه البيت .

@ يا النبى حجز السويتوها فى اللاعب الصينى اتردت ليكم فى الملاكم ” النطحنجى ” نمر ..شتم الحكم ونطحوا نطح ..واتهموا بالمرتشى كمان الكلام دا كووووله مضمن فى يوميات التحرى ..قصدى فى تقرير الحكم “صبرى ” يعنى الايقاف الطووووويل منتظر قائد البلطجيه “نمر” ..واربعه من اللعيبه حالوا دون خروج الحكم من ارض الملعب بلطجه ولا ما بلطجه ..؟

@رئاسة كتلة الممتاز عادت الى موقعها الطبيعى ..على السيد “رامى كمال” يقع عبء .. قيادة دفة كتلة الممتاز للخروج بالبطوله الى بر الامان ..ام المصائب “ظلم الحكام ..الذى تكتوى به كل الانديه عند مواجهة فاقد الوصافه المريخ ولم تسلم منه الانديه المقبله على التبارى مع المريخ..الى 

جانب الشركه الراعيه والتلفزه ..وهنالك اندية تجأر بالشكوى من المسغبه . 

@ “الحلاوى” مرشح مجلس اداره  المريخ فتح النار على لجنة الانتخابات اختصار وصفها كما هو الحال فى مريخهم بلطجه  لتعطيل الانتخابات وتصفية بعض المرشحين وحااالف “يدق الصفايح ويطلع الفضايح” عبر مؤتمر صحفى 

@  المغرب حققت انجاز تأريخى و  “الحارس ياسين بونو”اسد النزال ..اسود المغرب  أول منتخب عربى فى التاريخ يبلغ دور الثمانية بكأس العالم.. ورابع منتخب أفريقى حيث سبقته منتخابات الكاميرون -السنغال وغانا في  1990 و2002 و2010 ..المنطق يحالف البرتقال والمستديره لا تستجيب لصوت العقل فهى حبلى بالمفاجأت 

@إقالة ” البروف محمود السر ” بصرف النظر عن نظرية المؤامره..ممارسه عاديه جدا لو كتب الخلود لغيره لما قدر لهو الجلوس على الكرسى ..تمنياتنا له بحياة رغدة هنية ..فيما يتعلق بعزمه فتح النار فلا انصحه القيام به حتى لا يحرق تاريخه ..كما ان ذات الاسباب التى دفعته للصمت “استقرار سمو الهلال” وفقا للمقربين منه ستكون ماثلة بعد الاقالة.. ولكن ارى ان يضع كل ملاحظاته بما فيها فضح المتأمرين بالادلة والاسانيد فى مكتوب الى الامانه العامه..وفى الحسبان 🙁دولة الظلم ساعة ودولة الحق إلى قيام الساعة) ستدور عليهم الدوائر حال وجدوا..!

@ الحكام الاجانب مطلب عادل لادارة مباراة ديربى الخرطوم الذى بات حرام ان نطلق عليه “القمه”والتبارى سيكون مع فريق بعيد حتى عن مركز الوصيف و”القمه” تطلق عند تبارى القمم اللهم الا حال اطلقنا عليه لقاء “القمه والرمه “..ومانا دايرين حكام من مصر نوهائى مع احترامنا ليهم ولكن تظل حادثة التواطؤ مع الاهلى المصرى ماثلة امامنا 

@نبض العشق السرمدى ..يا غرام الروح..نقرات عشق نمة ريد.. ..ويبقى العشق ما بقى سمو الهلال .!)

زرقـاء الـعشق

هُـوَيْـدَا اَلْـمَـاحِى

الاربعاء 7/12/2022

شاركها على
أكتب تعليقك هنا

لن يتم نشر عنوان بريدك الإلكتروني.