عِـشْقٌ سَرْمَـدِيٌّ– هُـوَيْـدَا الـمـاحى-حِيدوب بِكُرَةِ حَيدوب ويتفضح  الْمَعْطُوبَ-هلالاب  الحارس ما بدوروا ولا بغيروا ولا ببدلوا-هل سيبتدع اتحاد السجم  سجن لبطجية المريخ وما اكثرهم 

 

عِـشْقٌ سَرْمَـدِيٌّ– هُـوَيْـدَا الـمـاحى

حِيدوب بِكُرَةِ حَيدوب  ويتفضح  الْمَعْطُوبَ

هلالاب  الحارس ما بدوروا ولا بغيروا ولا ببدلوا

هل سيبتدع اتحاد السجم  سجن لبطجية المريخ وما اكثرهم 

الله -الوطن الهلال 1898م..النصر بجدارة أو الهزيمة بشرف.!

@ الكوره باكر عصر فى الجوهرة المفخرة “فال النصر ” ياهلالنا..!!

اضرب اضرب فى المليان .. ورينا فنونك يا فلوران ..” حَصافَتك وفنونك يا فلوران ..لا تفريط فى

الهداف ..نمنى النفس ان ينحصر سباق هداف الممتاز بين رماة سمو الهلال.

@  حيدوب ..لا يغرنّكم هوان  الهالكين ..فنحن الملوك وهم الدلاقين ..وقع ليكم ..؟

@سياسة البروف فلوران عدم التفريط فى النقاط ماضية فى كل الاندية باذن الله..ما شغلتنا بسياسات الجهاز الفنى التدوير واخوانه ..ولكن حقنا المشروع المطالبه بالمزيد من الاهداف..والتهديف فى شباك الخصوم والمحافظة على نظافة الشباك ما امكن .. احترام لالخصوم ديدننا ..لن نستهين بالخصم حتى لو سقط فى المركز ال11..وانعشوا بالدفره للمركز الرابع ..على قول المثل الشامى 🙁 بكرة يذوب الثلج.. ويبان المرج)..بكره يدوب حيدوب ويتفضح المريخ المعطوب ابوالكروب.  -ظلم التحكيم لن يثنينا والبطاقات الملونه لن تفنينا..المستقبل كشاف… والفلك دوار.

 -لم يستهوينى بتاتا تصريح رئيس نادى حنتوب عن التبارى امام سيد البلد واصفا الامر سيان بمنازلة بقية الاندية .. لا احسب ان محصلة خبراته  “قدر”يعنى ذات حداثه فريقه بالممتاز..السنه الفاتت عندما تحدث المستقيل “موتا” بذات حديثك هذا عن مواجهة المريخ صرخت بعلو صوتى: سجمنا المريخ هزمنا ..(ناس البيت كوووولهم اتخلعوا وجروا لحقونى فى الصاله والله لا وراكم كم كانت حالتى “بطاله”..بقوا يسوا لى :(قولى بسم الله ) وانا بسويلهم :بسم الله مع “موتا” دا ..بسم الله بعد كتلنا بالتصريح دا..؟ سمح استهدى بالله وهاكى غسلى وشك دا بى مويه بارده ..قلت ليهم يا اخوانا انا مؤمنه وموحده..وعارفه الغضب من الشيطان لكن المره دى الشيطان برئ.. الا تجيبوا لى المدرب دا اكشحه بالتلج عديل ..والمريخ فعلا غلبنا  ما شطاره ولا جداره ..لكن عوارة عقلية  المدرب اصابتنا فى مقتل .لن نستهين بالخصم لو سقط فى المركز11..وانعشوا بالدفره للمركز4

 @مدرب الأرجنتين لا يستبعد فوز المغرب بكأس العالم..يعنى نقنع من خيرا فى الارجنتين..؟ وهل ان لنا فى القارة السوداء والوطن العربى ان نمنى النفس بالتتويج غايتو ما ظنيت فى ظل تحكيم المونديال الهوان دا .

@ لجنة المسابقات تحول ثنائي المريخ “صلاح نمر” و “حاتم محمد أحمد” إلى لجنة الانضباط..طبعا ما بعيد لجنة الانضباط ومين عارف ما تطلع علينا ببدعة عدم الاختصاص بعد شهووووور عددا ..؟ ويقوموا تانى من تانى يكونوا ليهم جسم جديد عشان يحولوا ليهوا البلطجيه ديل ولا ياربى يمكن اتحاد السجم يقرر بناء حراسات ومحكمه وسجن لزوم المحاكمه عشان الحكم عيب كبير يفتح بلاغات فى بلطجية المريخ وهم كثروا بالاضافه للملاكم حاتم والبلطجى نمر فى اررررربعه من اللعيبه احتجزوا الحكم وحالوا دون مغادرته الملعب اكيد بكونوا سووا فوقه  البدع والهوايل حتى ادركته الشرطه وانقذته من شرور اعمالهم اذا الشكاوى بالكوم والسجون اللت البلد  مليانه تب سمح يسجنوهم وييين الا يبنى سجن جديد فى الالفيه الجايه ديييييك .

 @حملت الاخبار ان : غيني وغاني وكنجولي في طريقهم للهلال..وفقا للمعطيات الترشيح تم عبر المدرب فلوران اذا المدرب حدد خياراته فى الاحلال والابدال والمشاطيب عليهم يسهل وعلينا يمهل محترفين كانوا او محليين حتما لن نسمع صريخ حال كان اول المشاطيب” العائد من بعيد” وقد استنفد كل الفرص ولا جديد .

@ يسألونك :هو مالو فلوران ..ما بدور ابوعشرين ..؟ احبتى ارحكاكم ..نطوف ونشوف كل دوريات العالم شفتوا ليكم حارس مرمى بدوروا..؟ اى فريق بنعرف حارسه فلان حتى يخيل لنا الا حارس بعده فى الاحتياطى والحارس ما بغيروا ولا ببدلوا الا لو فى لاعب” عوقه وعوره”..ويمكن الملعب يكون سبب الاصابه .

@نبض العشق السرمدى ..يا غرام الروح..نقرات عشق نمة ريد.. ..ويبقى العشق ما بقى سمو الهلال .!)

زرقـاء الـعشق

هُـوَيْـدَا اَلْـمَـاحِى

الجمعه 9/12/2022