Take a fresh look at your lifestyle.

الرأي المختصر/عبد المنعم إبراهيم/المابتلحقو جدعو

الرأي المختصر

عبد المنعم إبراهيم خضر

المابتلحقو جدعو

***********************

ما بنتلحق .. نحن الريادة والسيادة .. نحن القيادة..

نادي الحركة الوطنية .. نادي الهلال للتربية..

من كبار القارة السمراء .. تعرفنا أدغالها وصحاريها..

وتعرفنا حتى (الخيل والليل والبيداء والسيف والرمح والقرطاس والقلم)..

إنتو بس أبقوا لينا الضل .. وأبقو الوصيف..

ضل الهلال الوريف ..  ولا  ضل الضحى ..

قلنا ليكم الهلال مابتلحق يا اخوانا..

تلحقوهو كيف وعنده فلوران مدرب عالمي.

الهلال عنده مكابي ليليبو .. دبابة بشرية..

عنده (لامين جارجو وياسر مزمل ووليد الشعلة وجون مانو)..

الأربعة كل واحد منه خوف وبعمل رعب للمدافعين والحراس.. اللهم صل على النبي..

الهلال عنده محمد عبد الرحمن.. (فخامة الاسم تكفي)..

شفتو كيف؟ .. إنتو بس صلوا على النبي ..

الغربال ده كوم براهو.. الغربال نار الضلع ووجع العرضة جنوب..

المريخاب لمن يجيبو سيرة سوداكال بقولوا: منك لله ضيعت الغربال مننا..

هو الغربال ده كان حقكم ؟.. الغربال جاكم بالصدفة .. جاكم زعلة ساي..

نسيتو  قصة الولد الزجاجي؟.. ولا اذكركم بيها..

حكاية الولد الزجاجي دي هي الزعلتو وجابتو ليكم (ملح) يا حبايبنا الحمر.

كان إنتو ناسين .. نحن ما ناسين .. لأننا أجمل الحلوين..

(أجمل الحلوين عهودك وين)..

يا عالم اختشوا .. الإختشوا ما ماتوا . لكن عاشوا عزيزين..

الهلال عنده السوباط والعليقي .. يدفعوا بسخاء وكل حاجة وفروها..

سمحة المقدرة .. وملعبنا الجوهرة..

الهلال 11 مباراة متوالية منتصر .. الهلال ما بنقدر..

الهلال سيل الوادي المنحدر..

طيب الحل شنو يا أخوانا؟.. الحل في البل..

البل بره الملعب بس .. الهلال جوه الملعب ما في فريق بقدر يبله..

الحل في الجدع .. تجدعوه بس..

مش قالوا: المابتلحقو جدعه؟..

أها الهلال ده إلا تجدعوه بس..

إنتو قايلين الجدع ده إلا بالحجارة؟

يعني زي الهلال ده مثلا: لو ما عندك حجارة ممكن تجدعه بي حكم .. وعادي تجدعه بحكم راية كمان.

الجدع أنواع .. وأساليبه كتيرة.. كلها بره الملعب.

يا عالم عيب والله البحصل ده..

يا معتصم جعفر .. يا أسامة عطا المنان: عاجبكم الحاصل  ده؟..

بالطريقة دي الكرة السودانية ما بتتطور..

يا جماعة (التغيير) يبدو أنكم جيتو عشان تغيروا للأسوأ..

نادي الهلال يجتهد .. يأسس فريق قوي وملعب راقي .. بدل يشيدوا بيه .. يحاربوه، ويعطلوه بالتحكيم؟

جهاز التحكيم عنصر رئيسي في تطور اللعبة .. أي خلل فيه يسبب إحباط للأندية ..

الأندية تبذل الأموال لتجهيز فرقها .. واللاعبون يسكبون العرق في الميدان .. وكل ذلك يضيع بأخطاء تحكيمية حتى لو كانت غير مقصودة .. مصيبة والله وحرام عديل كده..

أقول ليكم حاجة: إنتو جدعو بس والهلال عوجة تب ما بتجيه..

نقطة أخيرة:

مجلس إدارة نادي الهلال يتكرم على المريخ ويسمح له باللعب على ملعبه ثلاث مباريات في دور المجموعات.. القرار ضد رغبة الغالبية العظمى من جماهير الهلال .. ولكنه أصبح نافذاً ..ومن هذا المنطلق سنتحدث عنه في مقالنا القادم.

إلى اللقاء .. في أمان الله.

 

 

 

 

 

شاركها على
أكتب تعليقك هنا

لن يتم نشر عنوان بريدك الإلكتروني.