عِـشْقٌ سَرْمَـدِيٌّ –هُـوَيْـدَا الـمـاحى-ما من الكاف من الأجلاف ..!-مجلس بلا خبرة كالمخيط بلا إبرة 

عِـشْقٌ سَرْمَـدِيٌّ –هُـوَيْـدَا الـمـاحى

-ما من الكاف من الأجلاف ..!

مجلس بلا خبرة كالمخيط بلا إبرة 

-اتحاد الرمم فرع  الدلاقين اصله تافه جذعه  شجرة “الزّقّوم”

استراليا-ملبورن /عشق البلد

 الله -الوطن الهلال -1898م..النصر بجدارة أو الهزيمة بشرف..!

-يا ذا الهلال  عشقا  ملكت حشاشتى.. اللهمَّ أنت عون الهلال حين تضّيق الحياة وأنت المُنتصر حين يغلبنا  الوجّع..ويغدر بنا اتحاد الرمم وعقول منحناها الثقة .!!

@ هل باعنا  دكتور حسن على عيسى الوهم ..ام صادنا مجلس الرمم..؟

قبل ميعادنا بى ساعتين.. قبل يومين تلاته كان ظهور دكتور حسن على عيسى طاغيا واثق الخطوة يمشى فى حياض استاد الهلال ..ومن ثم ملأ الدنيا فرحة : “ابشروا يا هلالاب الجوهرة جاهزة  للمجموعات..!! فحسبناه طواف الافاضة.. فهل كان طواف (التمويه و الخداع ).؟؟ولا عمايل اتحاد الضباع  افترى وباع ..؟

صدقونى اتحاد الرمم فرع الدلاقين  جذعه من الشجرة المحرمه “الزّقّوم”المرقت ابونا ادم وامنا حواء من الجنه ..والاتحاد مرق المنتخب من الجنه وسقطها وحرم  على امة الوطن الهلال من المؤازرة ..

مبادرة (معا من أجل العفن) لقتل الوطن ما الوطنية ماتت وشبعت موت من زمااان

@تواطؤ تاااااانى ..الاهلى تااااااااااانى  ..جرح تانى ..غدر تاااانى ..ومجلسنا ما ارعوى من الاولانى .!

-ديل حالفين يفرتقوا الهلال ..حالفين  يشوهوا الجمال ..فانبجست  فنتازيا..لم يفاجأنا الكاف  بل غرر وغدر  بنا ..أنْجَاسٌ مَنَاكِيدُ..مهد لهم الطريق مجلسنا الموقر ..!   حسب  قادته ان المال يجرى بين أيديهم  ويُنفِقُونَه على الوطن الهلال ..ما هو الا عصا موسى السحريه التى ستتحول الى افعى تلدغ الدلقان .. ويضربون بها ..ابالسة الاتحادين الدلقونى والكاف (حكام واداريين) ومتواطئين.. لتأتيهم السمراء تقلد فى غنج  ودلال تعال يا حبيب تعال تعال يا هلال تعال ..ولربما حسبوا المال قد  تمت طباعته “جبل ام على ” مسقط راس جدى الشيخ حامد اب عصاة سيف.. المال يا ادارة سمو الهلال معيته الخبره والدروس المستقاة والعبرة ..وقنطار شطارة.. ..وفهلوة ادارة وعيييك ..وفى الليله ديييك لا هان على ارضى واسامحك ولا هان على اعتب عليك لكن نصحتكم مجلس السوباط حتى كل متنى .. فلما كلّ متني..تانى نصحتكم وانتوا ماكم ناس نصيحه اسمعوها منى النصيحه ولا الفضيحه ..اى والله وتاالله.! ..المجلس دا عايز غربله والبقاء لمن يعملون والفراجه ودوهم  الشارع .

@سؤال محرقص لى :هل اقالة الجنرال لها تداعيات على قرار الكاف الكفوة ..يعنى الجنرال لو كان قاعد كان لحق القرار قبال يطلع ..؟

@مجلس السوباط صحى انتوا رجال اعمل  ناجعين  وناجحين فى البترول والبنزين ..ودهاليز كرة القدم ماكم خابرين وقودها الجهابذة لا السماسرة اصحاب الخبرات التراكميه والسيرة العطرة ..بوصيكم التحصن بقلاع عبقرية الارباب  صلاح ادريس الكرويه ..وما خاب من استشار وزى ما جاب رئيس فخرى عين مستشار ذاع صيته وترك بصمة بل خلق فريقا تهابة اندية القارة جمعاء  .. ولو لا توليه صوب كرسى الاتحاد العام ..مخلفا الزعيم الهلال ورائه لكانت السمراء تتلاصف والوطن الهلال عزا واباء هاهى السمراء ومن غيرنا ..هسسسع ما راحت حاجه متل ما استعنتوا  بعبدالمهيمن ..تواصلوا مع  ..الحكيم طه على البشير والارباب صلاح ادريس والدكتور اشرف الكاردينال للظفر بعصارت خبراتهم التراكمية 

@ قاتل الله الشائعات  مهلكة الاعصاب و الافئدة .. ما باله  السيد هشام السوباط  متين  الرجوع لارض الوطن بعد الاعلان عن فك تجميد امواله ..؟ بلاتينى  الهلال الكان زمان الصينى فكوا تجميده بعدك بى كتير ولب نداء الوطن الهلال .

@جاء في بعض الروايات أنَّ النبي  قد نهى عن لبس الأحمر،  إذا كان أحمر مفدّم –اى  شديد الحمرة- فيه معصفر..وعن عمر أنه كان إذا رأى على الرجل ثوبا معصفرا جذبه وقال : ” دعوا هذا للنساء..دا شعار اتحاد معتصم للمنتخب .

@ قسمت بى الله الزمالك من يوم مرتضى منصور قال للمريخ تعال عسكر عندنا تانى ما شمه عافيه ..توالت  عليهم الهزائم حتى فى المناشط تنزلت عليهم اقسى الهزائم فى سوبر كرة السله للسيدات بنتيجة (122-52)..ليطردهن ومرتضى منصور  ”يروحوا يتجوزوا”..وكانت ثلاثية الاهلى حراااااقه ..و المحله كملت الناقصه البارحه والزمالك اتهزم يا رجاله 2-1..

و المدرب” فيريرا” خلعوا ..و أسامة نبيه عينوا مدير فنى وبكره يفننووووا ..والزمالك شعلوا

@ شر البلية ما يضحك ..قال شنو قال استقالة جوز اللوز بعد ما غطسوا حجر المنتخب الغريبه النصيبه مازدا قاااااعد ..واتحاد الرمم اقال الجهازين الطبى والادارى للمنتخب ..الغريبه بل ثالثة الاثافى الاتحاد السجم الما عندوا دم لا استقال ولا الله قال ..!

@ شكرا اصيلا جماهير الجزائر على تشجيعكم الخرافى لمنتخب من الاساس مافى ..شكرا شجعتوا السودان ..مردودة فى الافراح .

@ ما زلت ارددها الالية الاعلاميه ما شبه الهلال ..بالامس وعقب قرار الكاف الكفوة ..لم يكلفوا انفسهم عناء استنطاق اى ادارى .. وكان خبر سفر سيد البلد منقوص فى وداعهم العليقى لا قالوا رئيس البعثة منو ..ولا وضحوا اسباب تخلف  السداسى عن رحلة تنزانيا ولا يحزنون..! لتقوم بواجبهم عنهم الصحف موضحة ان الجهاز الفني منحهم راحة بعد المشاركة في الشان..وسيلتحقون بالبعثة  الجمعة..ولم يأتوا على سيرة اسباب تخلف العليقى  عن تنزانيا البته.. وهو  فى انتظار تكملة ملف اضافات المحترفين كما نظن .!

@نبض العشق السرمدى ..يا غرام الروح..يابصمة الدم في العروق..هلالنا هيلو الشكرة هيلو العزة

هيلو الإمرة..ويبقى العشق ما بقى الهلال سموقا و سموا .!) 

زرقـاء الـعشق –هُـوَيْـدَا اَلْـمَـاحِى

الالاربعاء 3 رجب 1444

الموافق 25/1/2023