عِـشْقٌ سَرْمَـدِيٌّ –هُـوَيْـدَا الـمـاحى-إلاضاءة يكتنفها غُمُوض مريب !!

@ يا خبر ابيض ..الاهلى المصرى اعتذر عن البطولة العربيه المقامة بالسعودية..(خلصانة بشياكه)

لامن قالوا خبارك قالهم ..احيا ضربنى  الهلال بى فرد مسمار وسبب لى اذيه ..الشناوى عمى ايا ايا ايييا ..والنقاط سجمها اصبحنا كل يوم مانشيتات الصحف وعناوين القنوات الاهلى المصرى قد هزمه بالعافيه بنجيب التعادل فى الدورى المحلى سبحان الله بعد مسمار الزعيم الهلال كل الاندية بقت “رخمه”..طبعا الاهلى فقد البوصله وبقى يهضرب ويقابض “عاد نان مسمار الهلال ما حااااار زى النار ..شنو حرب الشائعات ما نفع ..استعانوا بغتيت “مدثر خير” طلعت تصريحاته خارم بارم ..”اصبح وش اعلام الاهلى وارم ) وقفاهم يقمر عيش ..قاموا قبلوا على القطن الكاميرونى عايزين يرهبوا ..عفيت منه القطن ما هببوا ليهم ..طبعا سمهم فاير ..” توااااالى ” قبلوا على صن داونز الغرقان بتعلق بقشه والاهلاوى بتعلق باكذوبة بخسة عفشه..قالوا صنداونز لازم يرجع لينا تلاته نقاط كاملات غير منقوصات عشان ثبوت فحص المخدرات على لاعبهم ..وقال كدى (راموند هاك )نائب رئيس لجنة الانضباط فى الكاف ..ردمهم ردم الجن وقال ليهم ما شغلتنا بفحص المنشطات فى الدورى الجنوب افريقى اهلاوية جنيتوا ولا شنو ..انتوا الله ما ليكم ..؟ علاقة الكاف شنو بدورى جنوب افريقيا يا (بجم) والاهلى إنصدم وكضم..اكيد النهار دا حيطلعوا لينا “بافتكاسه” جديده لنج(غرد سعودى :قولو لهم الهلال السوداني ليس مشارك في البطولة تعالوا)..الاعلامي المصري احمد صالح: الهلال السوداني دمر استقرار الأهلي وأصبح الأهلي من سوء الي سوء.)..وسووو يا سوووو الاهلى عفشوا

@ حملت الانباء خبرا مفاده استغناء سمو الهلال عن اللاعبين (عيسي رمضان الامريكي.. وضاح ابراهيم)..شكرا لهما 

@ انشيلوتى جبان يا جدعان..!

@حادثة الاعتداء المسلح التى رافقها تهديد لونيل ميسى بالقتل اخرجت  رئيس الارجنتين عن صمته

@هاي كورة_يدرس الفيفا بجدية قاعدة ساعة المباراة الجديدة في كرة القدم حيث تتوقف الساعة عندما تخرج الكرة من الملعب  لوضع حد لإهدار الوقت لتتحول كرة القدم إلى نظام أقرب لكرة السلة وربما حينها سيتم تقليص وقت المباراة من 90 دقيقة إلى 60 دقيقة ..!

@ وبديت احلم واخير نحلم بدل ما نموت..الساعه الشفت ليك فوق المنام شعاع شعاع رويدا طلع كوكب درى زى ما بقول كدى ..اها ليلى بقه وضو نوور اريته حال الهنا والسرور..الجوهرة اكتملت والاضاءة علقوها والجماهير تتهادى زى الموج ..!