Take a fresh look at your lifestyle.

مجلس الهلال وVIP ظلمونا والكاف مترصد و قاسى

عِـشْقٌ سَرْمَـدِيٌّ –هُـوَيْـدَا الـمـاحى

مجلس الهلال وVIP ظلمونا والكاف مترصد و قاسى

-التصاميم  بطالة ..سود الله عيشتك يا هداية الله

-ساهم بقيمة تذكرة مباراة القطن بفئة مقعدك  وكأنك حاضر

-عوووك اناس القطن  هووى :الاهلى كضاب اسالوا منه المريخاب

استراليا /عشق البلد

@  الله -الوطن الهلال -1898م..لقاء القطن (7\3\2023) النصر بجدارة أو الهزيمة بشرف..!..محط آمالى الهلال..يابصمة الدم فى العروق اتجلى خلى” المحروق” يروق ..والكاف يفوق من غفلته ..هل يا هلال هل منتصر ..أَنَفَة وإِبَاء !.. الشعب نصرك عزته..ويبقى يقينا فى الله من غير جمهور هلالنا يولع نور. 

@ لو ما عندك نفوذ وحشود وجيوش جوووه الكاف ..من الحكمه انك تعمل حسابك وتخاف والخواف ربى عياله ..مجلس الهلال وVIP  وقلة قليلة من الجمهور  تسببوا فى  العقوبات والحرمان(حرمونا اقرب قراب ..ديل اذونا اقرب قراب ).. المفتونون بعشقك يا هلال حتما  (يُفْتَنُونَ )..ومن الحب ما “كتل” .. الحماقه والاندفاع والتهور سكة الضياع وسبب الفشل..”امشي عدل يحتار عدوك فيك”..علينا محاسبة انفسنا قبل محاسبة الكاف ..لقد ظَلَمْنَا أَنفُسَنَا  كما قسونا على عشقنا السرمدى الهلال  لا جدال ..قبل ان تظلمنا عصبة الكاف..العين الحمراء غابت وعمت الفوضى..المجاملات والمثالية “البغيضه” قصمت ظهر سمو الهلال ..وحرمت العشاق من اداء  واجبهم الوطنى المقدس فى سوح الوطن الهلال..لماذا حرمت الجماهير وفتحت الابواب لى( زولى انا يا زولى وانت وانا وبرانا برانا..وناس معزتنا ..وكيف تم الاشتباك مع لاعبى الاهلى فى المران ومجلسنا الهمام يغط فى سبات عميييق وهم يعلمون فى الحته دى الاهلى المصرى ما بفوتها غالبا كان او مغلوبا وعند الكاف تجتمع الخصوم والكاف مسير وما مخير ؟؟؟؟ وكيف  تحولت مقصورة الVIP..مسرحا للهتافات المعادية لمجلس اتحاد  السجم والرماد ..”الاتحاد المعادينا من يومه” ؟ اى شعب راقى ومجلسه ديمقراطى ودستوره مجاز كان حتما سيسلك الاحتجاجات السلميه منهاجا..مناهضة  ..الاتحاد الدلقونى تكون عبر الوقفات الاحتجاجية والشعارات المكتوبه على اللافتات والهتافات فى مباريات الممتاز ..اكيد الكاف المتسبب قال ليكم اذا كانت ال”VIP” كدا كيف ح تكون الفئات الشعبيه ..؟الراحل المقيم الطيب عبدالله قدوة ومثلا لو كان على قيد الحياة لاخرسهم “باشرة اصبعه السبابة ..دكتور الهلال الجعلى قال للاعلام  :(آآآى” دقيتهم” دفاعا عن نفسى ) ثمح خليت لى حاتم الملاكم شنو وانت بتشهد على نفسك ..؟ وما كان يجب ان ترد على الاعتداء بمثله والحكم الرابع حاضر كنت تشهدوا على الحاصل وحكم الساحه لو كنت قصرت يدك كان طردهم بالحمراء ..والقائمة تترى..وانتم تعلمون

ولمتين ح يفضل مجلس الهلال يدفع فى الغرامات الدولارية للكاف بسبب الجماهير ..؟ يعنى ال40 الف دولار دى ما كان اولى بيها اعمار الوطن الهلال المصيبه لم تكن الاولى وما ظنيتها الاخيرة لو المجلس ما غير سياسة المرونة الفايته حدها دى 

والمصيبة عند  الكاف الظالم كيف تجتمع الخصوم..؟

@العليقي  لقناة (beIN SPORTS):( الكاف عايزنا نهدم الاستاد ونبني غيروا )..فى الفجه دى المفروض صوت اتحاد معتصم يسمع الكاف وبالمنطق لسنا من الدول فاحشة الثراء ..والا لما قبعت المدينة الرياضية كالاطلال قرابة الثلاثين .. وبناء الاستادات يحتاج سنينا عددا ..واموالا طائلة لا طاقة للاندية السودانية ولا حتى الدولة بها ..يتوجب عليكم عدم التغليظ فى الاشتراطات .

@ اغلق الكاف مدارج المنعرجين الجنوبى والشمالى ..ومنع  30 ألف مشجع للترجي التونسي من حضور مباريات الفريق في دوري أبطال أفريقيا..الكلام دا السنه دى ( ) وسبب اغلاق المنعرجين عن الجماهير ..كان لعدم وجود كراسي في مدرجات الجماهير..يا سبحان الله فى الوقت الذى طالب فيه الكاف الوطن الهلال الالتزام بتكملة كراسى الجوهرة فل ما ينقص منها ولا كرسى فاستجاب سمو الهلال لمطلبه..؟ يا قلبى لا تحزن ..المهم احد اساطين العشاق.. تقدم بمقترح على الواتس ..مطالبا برفعه الى الكاف:(اغلاق  المدرج الشرقى باستاد سمو الهلال  كاملا اثناء المباريات الدولية..على ان يتم فى المستقبل بناء طابق ثاني للمدرجات الشمالية و الجنوبية في مستوى الشرقية لزيادة العدد الذي نفقده من جراء قفل هذا المدرج)

@ الزى الجديد من شركة “أمبرو”..!!..عليكم الله ما هذا فى ذمتك يا (خالد هداية الله )دى تصاميم ياخ كفايه خوزاق وعولاق  منك لله .. عولاق ورا عولاق ..  مجايبك..من بير السلم فى مصر لى ازقة  تركيا ..الخامة زبالة والتصاميم  بطالة ..بطالة ..سود الله عيشتك ياخ..حسبنا الله ونعم الوكيل فيك كرهتونا انت والمعاك الله لا جاب عقابكم.!

@اشباح القطن  فى الميدان ..ظلم الحكم باين للعيان..حقق  الأهلي المصرى فوزا سهلا  بثلاثية فى شباك  القطن الكاميروني البارحه..بعد الهزيمة التحكيمية الاهلاوية مدرب القطن (القطن الكاميرونى  قام ليهو شوووك) مخير الله راحت السكرة وجات الفكرة.. مدرب القطن الكاميرونى صرح وقال:(سنلعب كل المباريات المقبلة من أجل الفوز .. ابتداءاً بمواجهة هلال السودان) ..اهو تعويل على جور وفجور ظلم”رضوان سيئ  لاراش ” ام انها صكوك اهلاوية..؟اسمعوا هنى دا والله العظيم الاهلى المصرى دا كضاااااب واسالوا عنه المريخاب وعدهم يغلبنا ويفتح ليهم ويهديهم 2 من المحترفين قام غلبهم مرتين ووداهم التوج.

@ انتوا مسعولين من الخير :(عرفنا قرار الكاف بحرمان اساطين العشاق ..العشره ذاتهم كتار يا الكاف ..واحد نفر كفايه ولا شنو ..؟ شنينة ام قرينات) اها “المنتك ” سؤالى التيفو كيفو ..؟ يعنى حيث إن كون مثلا ..التيفو طلع لا محرم ولامجرم..«تيفو tifo voile»..هلموا “نتيفوا المدرجات” بالورق الملون والبالونات .. ألاعلام   واللافتات،  “تيفو tifo integrale”..لو اجلسنا او حتى فرشنا فوق كل كرسى من كراسى الجوهرة علم الهلال سترعبهم الاعلام حتما.

@(مبادرة هلالاب شركاء لا اجراء)..نادينا ينادينا ..حنبنيهو بايدينا هلال شامخ وطن عاتى.!..لازم نتبرع عشان نلعب فى استادنا ..عشان نشجع من جوه استادنا ..عزيزى الهلالابى ساهم بقيمة تذكرتك لمباراة القطن بنفس فئة مقعدك ، وكأنك حاضر المباراة من داخل الملعب ..سجل اسمك في دفتر حضور معركة العبور_على حساب_نادي_الهلال_للتربية-رقم الحساب 2656276..مقصورة : 10 الف ج.جانبية : 5 الف ج.شعب علوي : 2 الف ج.شعب أرضي : 1 ألف ج.. ادعم ناديك عبر المبادرة في حساب نادي الهلال ،إرساء للشفافية والمحاسبية نهاية كل عام من فترة المجلس .أرسل إشعار التحويل و اسمك الثلاثي ، إلى أحد الأرقام التالية:- (+96653602064+=61470298982=0123182317=0905777095=0123704756=0915064185=0122058151)نحنا الهلال بنريدو جد . .نهواه عشقو للأبد !!

@نبض العشق السرمدى ..يا غرام الروح..ويبقى العشق ما بقى الهلال  

زرقـاء الـعشق –هُـوَيْـدَا اَلْـمَـاحِى

الاحد 5/3/2023

شاركها على
أكتب تعليقك هنا

لن يتم نشر عنوان بريدك الإلكتروني.