صحفى مريخى:حشدنا الاناطين لاقصاء الهلال من الابطال 

عِـشْقٌ سَرْمَـدِيٌّ -اهُـوَيْـدَا الـمـاحى

– صحفى مريخى حشدنا الاناطين لاقصاء الهلال من الابطال

-سَنُرِيهِمْ آيَاتِنَا فِى الجوهرة هلالاب اسياد بلد

-الهلال ينازل الطيور الزرقاء فى القلعة الزرقاء

–اللهم أرنا عجائب قدرتك فى المريخاب فانهم لا يعجزونك

استراليا /عشق البلد

– الله -الوطن الهلال -1898م..النصر بجدارة أو الهزيمة بشرف..!

@ اساطين العشاق ..بوصيكم على الوطن الهلال صونوا ..الالعاب الناريه والشماريخ الوبال ما تفكوها ما تخونو ..! .

@ قمة عربية بنكهة الجماهير الهلالية الابية.. الهلال الملك المبجل يستضيف الطيور الزرقاء “المنامة”بطل البحرين ..فى القلعة الزرقاء ..البث المباشر على  (قناة تاسيتي انغام الملاعب) والنكهة عربيه خالصة  ..(قهوة نشامى وهيل..والسيف حنّا السيف والضيف للصيوان..للحق رجال يوم الحق ينادينا..تطلب خيّال ألف يقولو لك جينا)..انحنا جينا وجينا جينا ..الكورة كورتنا ..امة الوطن الهلال ..الجمهور فى الميدان واللعيبة فراجه ..لتلقين الكاف والاهلى الهجاص الدروس والعبر ..سَنُرِيهِمْ آيَاتِنَا فِي المدرجات وَسنلقنهم درسا عن مثالية جماهير الملك الهلال..جمهورنا مثالى رغم “انف” الكاف و”شلاليف” الاهلى الهجاص..هلالاب اسياد بلد ..نحن في الشدة بأس يتجلى..هلالاب نحنا الفخار نحنا الشرف بين الافارقة والعرب ..هلالاب لى اى زول ..هلالاب نحنا الصمود ..هلالاب نحنا الجلد .! هلالاب نحنا التميز ةالتفرد نحنا الطرب ..نتجلى نار ..لما العداء فى حق الملك سيد البلد يقلوا الادب ..هلالاب لى اى زول نحنا التفرد والتميز..والحضور ..جمهورنا نور ادهش العالم جميع  ودفع التزاكر رغم جور الكاف وحرمانه الدخول ..هلالاب تاريخنا ياما ..هلالاب وخاتين الملامة ..الكاف يوم جار ظلم ..أوصلت صوتنا اليمامة .. على المدرجات قمريَّةٌ سجعت..ثم صمتت ..وفى صمتها حَدَّثتُهمْ عن  صمود واباء وكبرياء جماهير الوطن الهلال ..

@ اللخو فلوران ..اسمع هنى دى :(كورة الصن جواز المرور لدورى الثمانية لا فنيات ولا هندسات خوضها بشعار (اخنق فطس)..وقول للصن على الطلاق بالسبعه شباك سمو الهلال ما بتصلها ..بصراحه الناس ديل” بعاعيت”عديل بموووتوا ويقوموا الف مره ..يجيبوا القون ويخلولك الدرون تجيب الدرون يجيب القون ..وهكذا مرتين اتنين وبعدها يفرموك فرم ..عشان كدا قلهم دا الهلال ما عيال عيوطه الاهلاوية) .

@ونضم الفاضل التوم : (التهاون امام صنداونز ..وسنقاتل حتى الرمق االاخير امام الاهلى ) .. ماذا تركت لكتيبة فلوران وفلوران نفسه والعليقى قائدهم ..؟

عليك الله قاتل حتى الرمق الاخير فى ” مجالك “لتنفيذ متطلبات ( الكاف-

الكفوة) فى ملعب الجوهرة الذى تصديت له ..يلا موووت ..ووورينا المووووت عديل وخلى ربوع الجوهرة بنضارة النجيلة ..لو اى زول شاف شغله  بنهزم صنداونز ..والاهلى بنردمه والكاف ذاتو بنرجمه.

@ الاهلي والقطن يوم الجمعه.. الهلال والصن يوم السبت..طبعا الاهلى بكى وشكى (للكافِ)..والكاف لاول مره قال ليهو  مافى طريقه  عشان تلعب مباراة القطن سوا سوا مع الملك الهلال يوم السبت ..خلى قيامتك تقوم يوم الجمعه ..غايتو القطن لو سواها الخطيب بغيب عن الحياة والاهلى المسخرة وسجل سجل يا تاريخ (ايخخخخخخخخخخخ)

@ اسر (الشناوى) ابو ثمانية الى احد المقربين اليه انه يعانى فوبيا هلالابية مكابية ..ودع يده فى واطة الله ..بص ياعم   حكاية العمى اللحظى فى ملعب سى الهلال دى كانت اونطة ..دا أنا “اتشلّيت وانعميت”..دا انا غلبان..وعندى فوبيا ” ليليبو مكابى ” الهلالابى ..ياخ انا بقيت اى مهاجم بشوفه مكابى مكابى .وا شقاى انا واعذابى.

@للهلال رب يحميه ..دعوات عشاقه الصالحات ستقيه شرور كهنوت المريخاب اللهم اجعل كيدهم فى نحورهم وسلط عليهم شرورهم .. اللهم أرنا فيهم عجائب قدرتك وعظيم عدلك وغضب انتقامك وشدة عذابك فإنهم لا يعجزونك..اللهم امين ..@ @@الكاتب مبارك البلال :(والله العظيم صحفى مريخى شهير قال لي قعدنا كل الفقرا والشيوخ من اجل ان لايتاهل الهلال الناس دي ناسية رب العالمين بيده كل شي حتي لوطرنا راضين بحكمه) انتهى بوست ود البلال الممهور بالقسم الغليظ ..عن نفسى سبق وان كتبت لكم عن حادثة دجال مشجع المريخ الحاج اب سوط الذى اتى به من ادغال القارة وعندما قال له ربما يعود عمل الضرر للهلال على احد اولادك فاجابه اعمل السحر للهلال عشان توقف المتواليات بمرض فوزى او هلالكه ولعيبته ..ما كان منى الا ان طلبت منه الحضور الى مبانى نجوم الرياضة حيث اكد على حديثه معى فالتقطت له صورة نشرت مع الخبر والارشيف موجود ..ليت هذا الصحفى الضار ..هدى نفسه وعشيرته الى تسخير (اناطينهم والسحرة المشعوذين لعمل سفلى يرفع  المريخ  من طيش مجموعته الى دور الثمانية)..فقدنا غوالى

درر  و لآلئ“..مات يوهانس شهيدنا الاول وما اتراجعنا ومات الوالى  شهيدنا التانى موته صرعنا   حشانا جنانا حرقنا كبدنا وجعنا .. بكينا بكينا ..وتوبنا رجعنا ..ويبقى هلالنا الوطن الشامخ ..بالروح نفديه ما بنسامح ..لا بنضر ولا بنعرف الضر ..(يا دبايب ويا عقارب).. الله غالب وعندالله تجتمع الخصوم.

@ مبادرة جماهير الهلال ” هلالاب شركاء لا اجراء “..بحمد الله وفضل تبرعاتكم بلغت سقف “المليار التانى “..ومكملين خطواتنا غير المسبوقه هلموا عشاق الهلال لدفع قيمة تزاكر ملحمة صنداونز ..سجل حضورك فى دفاتر معركة العبور ..على حساب_نادي_الهلال_للتربية-بنك الخرطوم ..رقم الحساب (2656276)..مقصورة : 10 الف ج.جانبية : 5 الف ج.شعب علوي : 2 الف ج.شعب أرضي : 1 ألف ج..على حساب نادي الهلال ،إرساء للشفافية والمحاسبية نهاية كل عام من فترة المجلس .أرسل إشعار التحويل و اسمك إلى أحد الأرقام التالية:- (00966536020640=61470298982=0123182317=0905777095=0123704756=0915064185=0122058151).

@نبض العشق السرمدى ..يا غرام الروح..ويبقى العشق ما بقى الهلال  

زرقـاء الـعشق –هُـوَيْـدَا اَلْـمَـاحِى

الاثنين 13/3/2023