عِـشْقٌ سَرْمَـدِيٌّ -هُـوَيْـدَا الـمـاحى-فلوران سيد الرصه و الهلال ملك المنصه 

عِـشْقٌ سَرْمَـدِيٌّ -هُـوَيْـدَا الـمـاحى

-فلوران سيد الرصه و الهلال ملك المنصه 

-طيارة للولتراس ..تزاكر الكترونية ..دبلوماسية تِقْنيَّة وقراصه حلزونية

استراليا /عشق البلد

– الله -الوطن الهلال -1898م..النصر بجدارة أو الهزيمة بشرف.

سمو الهلال ..فى الماضى القريب سواها واليوم لن تكن عصية فهو قادر على تكرارها وبالكربون 🙁لا تبتعد يا هلال .. لا تبتعد أيها الهلال..لا تبتعد عن ال(semifinal ).يا هلال..الشوالى قال:الثاني جاااي جااااي جاااااي..سجلها الهلال دونها الهلال كتبها الهلال حسمها الهلال..-هلالاب  تُقنا لنصر فرّ من يدنا ..فهل يعود لنا ماضٍ نناجيهِ يا هلال ..؟سيعود حتما لا محال .

@ السادة حكومة الوطن الهلال عاد الرسول النبى فيكم لو بهمسة ..همسة حتى عابره ..لو بالايميل او بفالكس بلغوا الكاف :(لن يحكم كورتنا امام الاهلى الاثيوبى “تسما”..الحكم  “باملاك تيسيما ” ظلم صنداونز لحساب الاهلى ولم يهتز له رمش

@اللخو فلوران لو كنت ناسى افكرك يوم مباراة الصن السبت الفات دا ما قلت ليك الهدوء لكن الرواشه والطرطشه كانت سمة ميزت الاداء فى شوط اللعب الاول الذى اهدرت فيه سوانح كانت كفيلة بجلوس حارس الصن الى جوار الشناوى ابوسبعه..الفرص المهدرة دى “جت” قسمت بى الله”  كان زمانك (سيد الرصه والهلال ملك المنصه والاهلى جرى واندس)..هى جات على الركله المهدرة براها ..سمح الضيعوا واهدروا الفرص ديل  دمهم ما حلال بحق سمو الهلال ..؟ ..بصراحه بينى وبينك “شميناك وكجناك من قلوبنا”-اى والله- ..استنى خصمتك بالرسول دحين انا ما قلت ليك غلطة الشاطر بى الف ..؟ بعدين تعال هنا “الصينى” دا خبارك داسيهو  ..انت قايلو “صحن الضلع”..؟  ياخ دا الصينى اللعاب..سبب العذاااااب ..العذب المريخاب ..(انت بس  لعبو- قدام الاهلى ..وشوفى يا فرقة سمو الهلال كان تنقدرى ..!)..نهايتو خت عقلك فى راسك والصينى فى التشكيلة والهلال فى ربع النهائى  ..الكورة فى ملعبك وبيدك لا بيد “مارسيل كولر ” انك تتربع على صدارة المجموعه بفارق نقطتين من الصن و(تفنن) الاهلى المصرى (فنن) .

@ عقب التعادل امام الصن شاع وذاع خبر عزم اداراة مجلس الهلال “جت” عن بكرة ابيهم على مناصرة الفريق فى القاهرة ..وهل تصدى (محمود  الخطيب ورهطه ) للسباعية عن شباك الشناوى من على مقصورة ملعب  لوفتوس فيرسفيلد..؟-ياخ  بدل تسافروا اقعدوا انتوا قبلكم  هنا ..وجيبوا طيارة للاولتراس ينوموا ويقوموا فوقها ومن الطيارة لى ملعب المباراة ومن الملعب يزفوا الهلال متصدر ومتأهل للطياره ..باذن الله.

–مباراة القاهرة سياسية دبلوماسية فى المقام الاول ..واى “شحموطة” تقرص هلالابى فوووق رقابكم يا السوباط ..اول التبادى هل تواضع السيد هشام السوباط ونزل عن برجه العاجى ليخبر اللاعبين ان لديهم رئيس يعنى ما هاملين ساكت ..؟

انت قايد يا هشام والقيادة تحتم عليك اثبات وجودك وفرض شخصيتك الرئاسية..القائد المميز لا يولَد بقدرات استثنائية، بل يصقل مهاراته ويطور نفسه ويستغل الظروف انطلاقا من الطموح الشخصي والرغبة في النجاح..قائد يعنى طموح ومتعاطف ومصدر الهام ..قائد يعنى محفز وشاحذ للهمم..عامل اللعيبه على اساس  انهم “جنياتك” وليداتك ..والاجتماعات عبر تقنية الفيديو جعلت المستحيل ممكننا وقصرت بل طوت المسافات طى ..كلمه منك حلوه الفريق بل الجميع  مستنيها..!

-كما لابد من الجلوس “القرفصاء ” ..مع وزير الخارجية السودانى .وسفارتنا .

وعلى رجالات المجلس المطالبة بنقل ملعب المباراة الى خارج مصر..و الانتشار فى الارض ..الامين العام خلو للكلام والتصريحات والخطابات يجب ان تتم مخاطبة الكاف لوضع المحاذير من مغبة تهديدات الجماهير الاهلاوية وبعض رجال القبيلة الاعلامية الاهلاوية وجمهور الاهلى سوابق “وما مجزرةبورسعيد ..التى راح ضحيتها  74 واصابة 200 من جماهير الاهلي والمصري..ببعيدة عن الاذهان..حال لم يحرك المجلس ساكنا لنقل المباراة الى خارج مصر على مجلس الهلال ان يتقى الله فى جماهيره ..واحسب ان الحل فى البل وال( e-ticket )..وما تنسوا نظام الحنجل والمنجل (والبكش) ياخ الطلس ..عوسوا قراصة بى مساحة محيط الجوهرة الزرقاء  المفخرة ..وزينوها بالسيسى رئيسى كيتا فى الاهلاوية ..وشيلوها  وختوها لى “هناى داك ” وقولوا احتفالا ب”النية” اللت  الحيكومه المصرية تشييد مبانيها الجديده للكاف فى العاصمة الادارية..ويلا  تعالوا نقطع القراصه ..شاحده الله يقرصكم الدبيب “الدابى”..دابى شنو يقرصكم السيسى يا اهلاوية يا غلاوية ..كما يجب ان تألوا على انفسكم  ادارة سمو الهلال بان الصمت فضيلة عشان الاعلام المصرى ما يختكم فى فتيلا ..واى محاوراتى  مصراوى صدوا باللتى هى احسن وقولوا صايمين حتى عن النقة ..يعنى صايمين وباذن الله صاعدين باطهر الطاهر وابوعشرين .

@مبادرة جماهير الهلال -هلالاب شركاء لا اجراء ..حساب_نادي_الهلال_للتربية-بنك الخرطوم ..رقم الحساب (2656276)..التحويل و اسمك إلى احد الأرقام التالية(00966536020640=61470298982=0123182317=0905777095=

0123704756=0915064185=0122058151=249 92 083 4347)

@نبض العشق السرمدى ..يا غرام الروح..قالو لي انسيهو وامسحى  من خيالك ذكرياتو..قلت ليهم :(حد يقدر ينسى نفسو )..؟ السنين العشت فيها معاك هنايا..اقوى من قول العوازل واسمى من كلمة وشاية..و”التعادل” عمرو..ما اوهن قوايا  ..ولا الهزيمة القاسية  يوم اضحت جريمه وكتبت نهاية.. انا يا العشاق  هوايا”سرمدى” لابداية ولا نهاية ..ويبقى العشق ما بقى الهلال  

زرقـاء الـعشق –هُـوَيْـدَا اَلْـمَـاحِى

الثلاثاء 21/3/2023