-فلوران الملامة من الاهلى المصرى للمنامة 

-فلوران الملامة من الاهلى المصرى للمنامة 

-الاهلى المصرى البدخل البطون ما بغسلو الصابون فَأَنَّى تُؤْفَكُونَ

-فى المريخ  حميدتى قروشه حلوه ورئاسته الفخرية بلوى..؟

استراليا /عشق البلد

– الله -الوطن الهلال ..النصر بجدارة أو الهزيمة بشرف 

@ خلونا نتكلم كورة سمو الحبيب  الهلال امس بان متل الشمس فى 30 دقيقة من عمر الشوط الاول ..الذى احرز فيه الهدف( اليتيم ) الذى اثبت نجاعة سمو الهلال فى الكرات الثابته بمختلف انواعها (مباشرة ..غير مباشرة ..ثابته  حايرة طايعه طايرة راكه)..ومن ثم تراجع مستوى الاداء ..الفاتحه على الوسط وعثمان ديوف لا راح ولا جاء ..مارس ليليبو التوهان والضياع..عماد الصينى محتاج الى الثبات الانفعالى وعدم اتاحة الفرصه للخصم لجره الى رزيلة ارتكاب ضربات الجزاء ..الحارس عيسى فوفانا ظنيته  كان “متعسم” والتعسم خصم على الحارس الذى يجب ان يمتاز بالمرونة ..على الرغم من صده لعدد من هجمات المنامة ..غايتو لو ما كنا انتصرنا فى مباراة الجوهرة..” قسمت بى الله” كنا ح نشرب من( البحرين) وما نروى ..!!

@ متل ماكم عارفين ..حميدتى كفيل المريخ ..قال ليك المريخاب (ابو  كلامه دودت)..يسمعوا كلامه بالنسبة للرئيس الفخرى “الحفترى” يعنى قروشه حلوه ورئاسته الفخرية بلوى..؟ برى قبلكم وحدكم ..الله يستر ما يسلط جنجويده علي استاده البناهو من حر ماله ان شاء الله يعملوا عسكر فى المعسكر وسكر سكر )

@ سمو الهلال امامه شهرا ثقيلا جدا.. واللعب الضاغط فى سوح الهلال 14مباراة فى غضون فرد شهر وقومه وقعده وسفر بين ولايات السودان و بعض المباريات القاب بينها يومان ووثلاثة ايام من ولاية لاخرى.

@ مستر فلوران :”هوووى ترا”..تراجع المستوى “دايرلو” دواء ..لعيبة الهلال مكتفين ومربطين وتقال شديد بالحيل ..وبلاش بلاش توسيع المساحات الحيشان والفسحات الكبار البتخلى الخصوم يتوسعوا ويتجدعوا ويبرطعوا ويهددوا شباكنا ويهدفوا.. والوسط التيه الحيران عايز وقفة جبارة ..والدفاع دايرلو دفاع ..!

@ هل تدرى يا الاهلى المصرى :- البدخل البطون ما بغسلو الصابون فَأَنَّى تُؤْفَكُونَ..

جرح النفوس غالى..جرح السلاح يندمل وجرح الكلام “بتاور” لا بندمل ..لا ببرى يوم..لا بتمحى لا  بتنسى.لالا ..!!

@ اثلج صدورنا موقف اللجنة الأولمبية الابية..عبر خطاب الى  نظيرتها الاولمبية المصرية..شجبت وادانة واستنكرت الهتافات العنصرية وزادت عن ذلك بمطالبة الاولمبية المصرية نقل شجبها وإدانتها للنادي الأهلي المصري) شكرا الاولمبية السودانية الضكرانة ..”ان تأتي متأخرا خير من ان لا تاتي ابدا”..( الماها  متل ..وزارة فلانة السجمانه الرمدانه ولا شبه اتحاد الدلاقين السلخانه العفنانة الوسخانه الجبانة )

@ (الافارقة والعرب )بعضهم  اولياء بعض  ولكن فقط فى مجال “ترزية” كرة القدم وتفصيلها على اندية بعينها واحكام سوستة البطولات والكؤوس عليها  بالضبه والمفتاح وبقية الدول المشاركة مجرد كومبارس يعنى تمامة عدد ..زى تمومة الجرتق..  الغضب الهلالي  العارم البارحة..على ضربة الجزاءال مشكوك في صحتها وهدف المنامة الثانى فى اخر الثوانى من عمر الشوط الاول من تسلل واااضح وفاضح .. طاقم التحكيم والتلفزة المنحازة فى البحرين

@ اقبال ضعيف على تذاكر وتشرين السورى والمريخ ..بينما حجت البارحه جماهير سمو الهلال من كل حدب وصوب و فج عميق ومن دول الجوار  لمؤازرة سيد البلد الهلال فى البحرين .

@ لمن كنت صغيرة بلعب فى( التوراب) كنا  بنلعب لعبة بنقول فيها :(العندو قرش يركب باص برش والعندو قرشين يركب باص حسين والعندو تلاته) …يركب باص فلاته .. بالنسبة للمغنية ندى القلعه ..وسيارة طيارة المطار التى اثارت ضجة على مواقع التواصل 🙁 الامر عادى جدا ..لانها من الخدمات مدفوعة الاجر ..بعدين “ينكن”ما كان فى “كبيرة” غيرها فى صالة كبار الزوار ..ومافى داعى اكيد للبزار ..ويجيبوا ليها “باظ” كامل عشان يوصلها سلم الطيارة ..لكن الغبيانة قدمت الجواز للشخص الغلط انتى بعد وصلتى سلم الطيارة جوازك دا تانى ما بتمرقى الا فى مدخل الطيارة وليس اسفل السلم ..ويا سلام سلم )

@التحدى الماثل الآن امام الادارة هو 🙁 2مليار دولار لاعمار وتطوير  استاد الوطن الهلال  ..فسحة ارررربعة شهور من هنا لى اغسطس لانجاز كافة متطلبات الفيفا والكاف معا ..ما بين الشركات السعودية لتركيب الاضاءة..والشركات الايطالية..والمداخل والمخارج والمنافع المرافق الداخلية ..  للمدرجات ومقاعد اجالس اللاعبين)