قادة السيادى فى بلدى يقتلون الشعب

عَبَقُ اَلْوَطَنِ – هُوَيْدَا اَلْمَاحِى

-قادة السيادى فى بلدى يقتلون الشعب

-حكم  سِفاح قرابينه الجماجم  والمُهْجَ  والارواح 

استراليا-عشق البلد

@قادة السيادى فى بلدى يعملون القنص ..ويسحلون الشعب..انتوا القوات المسلحة دى عدمت صافرات الانذار للاهالى ..الله يستر ما تعدم نفاخ النار ؟ ..ويحى ارواح السودانيين مهرا بخسا لكراسي الحُكمٍ  النجسه فى بلادى ..شلت الايادى ..من اشراط الساعة..عن  النبى محمد ﷺ :(يتقارب الزمان ويقبض العلم وتظهر الفتن ويلقى الشح ويكثر الهرج”القتل”) والله يا سيدنا النبى العلم دا “قبض” من زمااااان والدكتوراه بقت تمنح  لكل من هب ودب زى مناديل الورق”ما عليك انت بس تكح كحاية جامده تقوم” تترب “(توالى) يمنحوك شرف “ديكتوراه”. الدمار ودماء الشعب و جثث الابرياء  والاشلاء..و جماجم اطفالنا (وطفلة صغيرة تمددت قتيلة رصاصة ( شظية بقلبها ودانة تفجرت برأسها )..ولم تعش طويلا ..اجمل الاطفال قتلوا فى (قبايل العيد ..ويوم العيد عيد الموت)..على سيرة الموت فجع السودان برحيل الاسطورة “حامد بريمة فى ايام الفواجع هذى ..حامد بريمه لم تقتله الدانات ولا شظاياها ولكن قتلته الحرب عندما عجزت اسرته من اسعافه من نوبة السكرى التى اودت بروحه ..وكم من حامد بريمه قد مات وسيموت بسبب عدم توفر الاسعاف والمشافى والعلاج ..؟

@ .فرار بعض السجناء من سجن سوبا..وفرار المئات من سجناء كوبر بينهم محكوم عليهم بالاعدام..كان من البديهيات .. فيما اكدت السلطات التحفظ على سجناء النظام السابق فى مكان امن ..!! ..سجن كوبر وما ادراك ما سجن كوبر ..العتيق  البنوه الانجليز فى 1903..يقبع فى منظقة عسكرية ..راجت الانباء عن هجوم مسلح على السجن ولكنها كانت محض كذب وافتراء حتى اطل علينا الشاب “مصعب الشريف” عبر فيديو :هاتفا جئتكم من سجن كوبر بنبأ  عظيم ..ابان ان العطش والجوع داخل اسوار السجن ادى الى وفاة بعضهم ..وعندما اعيت السجانيين “العساكر” الحيله اطلقوا الاعيرة الناريه من الداخل ..والمساجين قاموا بثورة الجياع ..والعساكر قالوا للمساجين نحنا فزينا..انتوا كمان فزوا ففزوا .. اما كان حرى بكم يا البرهان نجدة السجون كافة  واهلها عبر تزويدهم بالطعام والشراب عبر  اسقاطه بالطائرات ..؟ حتى المستشفيات والاسر رهائن الدعم السريع يمكن اسعافهم عبر اسقاط المؤن الغذائية والماء جوا ..بعدين وكت انتوا حريصين قدر دا على امن وامان وسلامة عمر البشير وصحبه وقدرتوا تمرقوهم الى بر الامان من كوبر ..القدركم على “انقاذهم ” بمفردهم دونا عن بقية السجناء كان كفيل بمد السجن بالماء والغذاء والدواء معا ..عليك الله يا عيسى ابن مريم قرب تعاااااال ..عجل تعااااال ..عشان يسلموك حكم السودان لانهم من زمان قالوا ما بنسلم الحكم الا لما عيسى يظهر ..!!..وكما يشاع السودان  أرض الميعاد..هلا  عجلت بالظهور ” نبى الله عيسى “..فالمسيخ الدجال يعوس فى السودان فتكا قتلا وتقتيلا ..وكل صباح ستأتينا تباعا اخبار هروب المساجين وحتما بعدهم المجانيين مصحة كوبر ماها بعيده من السجن والتجانى الماحى بتمشى بالرجلين لا عن سجن امدرمان..تصور كيف يكون الحال لما المساجين يلاقوا المجانين ..؟ دراويش لاقوا مداح  

@مليشيات “الملص” .. اتهم الجيش مليشيات الدعم السريع بالتنكر فى زى القوات المسلحه وسياراتها..بسيطه  العربية” اللت” الجيش المنهوبة من الدعامة اكيد معروفة ولا ما عندهن نمر ..؟ دا دوركم..يا دياشه ..ولا المليشيات مسيطرة على مخازن عربات ودبابات” الديش”والذخيرة “متل ما قالت ..؟ يا النبى حجز ..الخلاء على الخرطوم  وقاطنيها ..لو استخدمتوا تطبيق (Find my آل حميدتى ) كان زمانكم لقطوهم “جت”

@ لو بلمحه حتى عابرة ظهر  “حميدتى”..لو بدبلجة حتى ظاهرة ظهر( حميدتى ) عقبال ظهور قايد “الديش” مليشيات الدعم السريع افلحت فى شوط  الفبركة الاعلامية..قيل ان لها قاعدة اعلامية مع( عيال زايد)..ولم يفتح الله على الجيش باستقلال حلفائه  فى العالم  لاستقلال التقنيات والبرمجيات  المتقدمة اعلاميا لهزيمة المليشيات اعلاميا

@ 720 الف لاجئ من جنوب السودان فى الخرطوم..!!

@ يا خاين ” الحلو مر ..السفير الأمريكي “جون غودفري” يهنئ السودانيين..بشهر رمضان..موظفو السفارة الاميركية “يعوسون” آبري رمضان..السفير الأمريكي يتناول إفطار رمضان في منزل فنانة سودانية..بالله شوف السفير الامريكى كب الزوغه وما راعى للملح والملاح ولا حتى “الابرى” العاسو بى رقبته ..وعاسنه” عوين السفارة “جت “

@ مدير جامعة النيلين استشهد بالامس مع زوجته واولاده فى شارع (الخرطوم القطينة)..وااا لهفى على وطنى وبنو وطنى بقت عليهم حكاية.. ملك الموت والرجل الذي كان عند سليمان عليه السلام.. عندما سأله ملك الموت: يا نبي الله إني دخلت عليك في الضحى وقد أمرني الله أن أقبض روحه بعد الظهر في الهند فعجبت أنه عندك، قال سليمان: فماذا فعلت؟ فقال ملك الموت: ذهبت إلى المكان الذي أمرني بقبض روحه فيه فوجدته ينتظرني فقبضت روحه..!!

@احزاب الخراب خسف الله بكم الارض .. لبدت الاحزاب السودانية وكأن الحرب فى (ميانمار)والموت لمسلمى “الروهينغا” ..ماسمعنا  عن دار من دور الاحزاب قدمت اى نوع من الخدمات البسيطه جدا للمواطن السودانى ولا حتى تفضلت بالدعم المعنوى النفسى  عبر السوشيال ميديا ..حتى اصحاب المنصات لبدو “جم”.

@ رَحيقُك يا وطن

الموت فى بلدى يحاصر الابرياء .. والناس فى بلدى فى عداد الاموات .. من لم يمت بالدبابات والرصاص قنصا مات جوعا وعطشا ..لك الله يا وطنى