دقلو الارهابى ما براهو “الحربوية والتغرير”معاهو

@  بورت سودان  ادروب اهل الكرم والجود ..الصلى على النبى..ما قصروا تب مع المهاجرين المهجرين قسرا من الخرطوم

@( ابن الوسخه مصرى واحد بس)..رفس النعمة واستبدلها بالنغمة والطرد من مكة المكرمة..شكرا الملك سلمان شكرا وزيرالداخلية  وشكرا الديوان الملكى ..رفس النعمة واستبدلها بالنغمة والطرد من مكة المكرمة ..مقيم وكمان مدير فندق سولت له نفسه طرد النزلاء السودانيين “جت” على حين غفلة بل اثناء اداء صلاة العيد البعيد شكله ما عنده كبي ر غرض بالصلاة “زقل” زرمى شنط السودانيين فى الشارع ..السودانيين ما كضبوا خبر نشروا فرد فيديو كان كفيلا بكنسه بقرار عاجل واجب النفاذ اصدره وزير الداخلية السعودى قضى بكنسه وترحيله فى الحال  وحرمانه من دخول اي دولة من دول مجلس التعاون لمدة ١٠ سنوات لا عمرة ولا حج ولا عمل لمخالفتة الاوامر الملكية وتم تسكين جميع النزلاء كضيوف للديوان الملكي

@آل دقلو اسقط فى ايديهم وبقوا يكوسوا للهدنة والجلوس للحوار كواسة..وقبال ميعادنا بى ساعتين ابيتو انا وابانى البيت اغالط نفسى فى اصرار واقول يمكن انا الماجيت ..اها قبال يومين صرح سعادتو ياسر العطا عن اصابة بالغة قد منى بها حميدتى ..واليوم تواترت الاخبار وافصحت عبر السوشيال ميديا عن نقل حميدتى من الفادنية الى مستشفى شرق النيل فى حالة حرجه ..طبعا كل الاحتمالات وارده خاصة مع صمت حميدتى وتسليم  زمام الكلام الى الناطق الرسمى للجنجويد..حميدتى متل ماكم عارفين ما بسكت عن النضمى الا للشديد القوى ..اها اكان الله شال روحه طبعا جماعتوا بلبدوا وبدسوا الخبر ..المفروض اول ما جلية الاخبار تصل للبرهان “تواااالى” يقول موافق على الهدنة والجلوس مع المرحوم حميدتى ..لسان حال حميدتى ..البرهان ابا وابا لى وابا وابا وابا وكرررر على ابا ابا لى..!!

@ احذروا مافيا الميناء البرى ..الميناء مكتظ سودانيين واجانب يحاولون الهروب من جحيم خرطوم .. ثمن التذكرة الى بورتسودان بين 180 الي 200 الف بعد جدال شديد وافق اصحاب الباصات على قبول 50% بنكك وال 50% الاخرى كاش (في الاول كانو مصرين ان المبلغ كل يكون كاش)ما اضطر البعض الى كسر بنكك مقابل الكاش ..عقب استلام الاموال من المسافرين اغلقت شركة البصات تلفوناتها تماما يعنى نهبوهم نهب عديل وعارفين مافى لا شرطة ولا قانون لمعاقبة شركة البصات نتمنى فضحها والاعلان عن اسم الشركة وارقام هواتفهم 

@بينى وبينكم الجيش ذاتو يستاهل لانهم ركعوا لقرار المخلوع منح “العنقالى” الهمباتى حميدتى وجرابيعه الرتب العسكرية ولاباس الجيش ..الجيش لا اتملم ولا اتمرد 

@تانى وين البسمة ديك وين تتلقى ..الأطفال يا فاطمة بغنو الأفراح لا بد من ترجع ..الاطفال الليله بيبكوا على اقرانهم السقطوا قتلى الخيانة والدانا والجبخانة..الاطفال مرعوبين من اصوات القصف ارض وجو..ستكون الاثار النفسية السالبة على الاطفال وبالا فى قادم المواعيد.

@ عايرة وادوها سوط ..قيادات الحركات المسلحة :قررنا تحريك( قوة عسكرية )مشتركة للفصل بين المتحاربين بالتعاون مع السلطات المحلية، منعا لتوسع دائرة الانفلات.