عَبَقُ اَلْوَطَنِ – هُوَيْدَا اَلْمَاحِى-‏الموت بالجبخانة ولا الذل والمهانة 

استراليا-عشق البلد

@الفوضى الفوضى الخلاقة(الخرابة)..حميدتى (ادرع سروال الديمقراطية)وهو ابعد خلق الله عنها ..خلونا نقول هو مقصده اعتقال البرهان متل ما قال فما ذنب امة لا اله الا الله والبنية التحتية التى دمرتوها ..؟ النهب المسلح والسرقة والاستيلاء بقوة السلاح على ممتلكات ومنازل المواطنيين ما علاقة قائد الجيش ببيوت المواطنيين العزل . وترويع امنهم وامانهم .؟  سجل التاريخ حريق روما وخراب مالطا وها هو ذا يوثق  دَمَار الخرطوم ..رغم الترويع والقتل والتجوييع معظم سكان الخرطوم لم يبارحوها ولسان حالهم من خرج من داره قل مقداره ..‏القصف بالدانا ولا الذل والمهانة ..هذا يتعارض مع هدى النبى ..كانت الهجرة  إلى الحبشة ما وهاجر النبي محمد ﷺوأصحابه من مكة إلى (يثرب) المدينة المنورة فرارا من أذى وعذاب زعماء قريش ..ولكن حتما الموت ارحم من الاستعباد والذل والخصى والاغتصاب.-الخراب والدمار الشامل قضى على الأخضر واليابس..(اقتحام المستشفيات وترويع المرضى واخلاءهم منها ..واحتلالها وبالامس القريب تم احتلال مشفى الخرطوم  وتحويله الى ثكنة عسكرية للجنجويد ..حتى مستشفيات الاطفال لم ترحموا المرضى المقيمين بها تم قصفها وتدميرها بالكامل ..حرق الاسواق ونهبها)..وبالامس ارغموا قلة قليلة من الدهابة فى الخرطوم على مدحهم واجلالهم ..طبعا الخواف ربى عياله ..والدهابه شالوا الدهب من الدكاكين الى منازلهم وهنا مربط الفرس  كدا علموا عليهم واكيد تاقوهم من بعيد لبيعيد باكر يتم نهبهم من داخل منازلهم لو سلمت ارواحهم يكون مكسب عظيم .. أَيُّهَا السودانيين الهاربين من جحيم الحرب ..اسْمَعُوا وَعُوا..دَعونى أَصْدقكم القول  .. هَمسهُ فْي أذنُ المْحبّ خَيرُ منْ صَمتُ بِلا كَلام..واسمع كلام هويدا الماحى البتبكيك ولا تسمع كلام الدجال النصاب البخدعك بالتوطين والسفر ..لا لجؤ ولا توطين فى القريب العاجل ..ابواب اللجؤ والتوطين مؤصدة امامكم بالضبة والمفتاح والدليل هل استقبلت الامم المتحدة الفارين من بلادى فى مضارب  دولة جنوب السودان او ارض مصر ..؟ هل نصبت لكم الخيام كما نصبتها فى مدينة “السلوم” للفارين من القتال فى ليبيا ..؟..اذا انتم لستم لاجئين بارض مصر ولا حتى فى دولة جنوب السودان ..(بتقولي لا لقليب رهيف مااظن لالا بيحملها ) اعى واعلم ان كلماتى هذى لن تصادف هوى فى نفس احدكم بل انها كخنجر مسموم فى خاصرة امانيكم ..والحقيقة مره كما تعلمون ولكن الوقوع فى حبال الوعود الزائفة وعصابات السماسرة ما بين تماسيح نهب الاموال بزعم التوطين فى  اوربا او اخواتها  من القارات الخمس وما لا تعلمونه قد حف التوطين اللعين بالشهوات انهم يغازلون لهفتكم على التوطين بيحيكون شباك الاعيبهم حولكم برااااحه براااااحه وام الاكاذيبة “الحرب” انتوا هاربين من الحرب بوطنوكم طوالى “كضابين” (الصوماليين -العراقيين -السوريين -اليمنيين والسودانيين) انفسهم الفارين من حرب الجنوب زمااان والابادة فى دارفور على مر السنيين وجحيم عذابات امنجية الانقاذ ..مازلوا يعانون الامرين  منذ عشرات السنيين ليس فى  مصر وحدها بل فى كل البلدان التى توجد بها مكاتب ال(UN)..بصراحه اخير زماااان كنت اول ما تقدم لجؤ بحددوا ليك بضعة اسابيع عشان تستلم بطاقة اللاجئ الصفراء ..والتوطين والبطاقة الزرقاء ربما حال كنت من المحظوظين انتظار ساى قرابة العشره سنوات والا ستظل لاجئ لا تجد ما يسد رمقك ..بينما الآن تحديد الوضع فقط عشان تستلم الصفراء المواعيد عييك يموتوا ناس ويحيوا ناس ..!-حتى تتيقنوا اننى لا القى الكلام على عواهنه..ساروى لكم حكاية اختى من رحم  امى خير مثال ..قدمت لجؤ فى العام 2013 مع اطفالها وما  زالوا لاجئين بارض مصر الى يومنا هذا..الادهى والامر تم توطينها واطفالها فى العام 2017..لى يومى ويومكم الفيزا ما وصلتهم ..وكل سنة اعادة للكشف الطبى والسفر فى رحم الغيب لا يفوتكم عند توطينها مكتوب السفر(Immediately)..يعنى فورا..ولى يومى ويومكم دا لاسفر ولا يحزنون ..واطفالها بقوا رجال@ سنة  2021 انا  امضيتها فى القاهرة ..احقاقا للحق علاقاتنا كاسرة بالاسر المصرية فى مصر ممتدة على مر السنيين ..المصريين فيهم ناس يتوزنوا بالدهب والله ..وكمان فيهم احفاد ابولهب وما اكثرهم .. زميلة بت اختى ..المسكينة بتدرس وتساعد اسرتها اشتغلت مبيت مع اسره مصرية الراجل اتحرش بيها عديييل لما دفرته بعيد و”كوركت”النجدة تخيلوا زوجته جات مسحت بيها الواطه وطردتها فى انصاص الليالى .. بهدوم النوم .. ومنعتها تلبس ولا حتى تشيل ملابسها ..دا كلوا ما كفاها من( دقش الرحمن ) اتصلت على المكتب قالت ليهم انتوا جبتوا لى بت حراميه سرقت( الصيغه) بتاعتى لا وكمان فتحت فيها بلاغ فى الشرطه وبهدلوا البت بهدلة عدوكم والله ياها متل “سوات “المليشيات” المتمردة فى الخرتوم ..وشيل وخت وشيل وخت ربك رب الخير اتواصلت مع احد الاخوه الهلالاب ليهو مركز عالى هناك حتى شطبوا البلاغ وسابوا البت فى حالها وجاتها نفسيات من هول الموقف والبت فى مقتبل حياتها دمروها وحطموها وكسروا امها واخوانها الصغار. -السماسرة فى ارض مصر من بنى جلدتنا عليهم اللعنة احط واقذر البشر ..بدخلوا عليك بالحنجل والمنجل واخر طيبه ومساعدات وخدمات لامن تأمن بانهم خيرة ابناء السودان على وجه الارض..ومرات تقول جاتنا ليلة القدر وساعات تقول نبى الله الخضر ذاتو بى شحمه ولحمه البداية بتكون عبر السمسرة فى الايجارات والصرافات وتحويلات القروش ..فى الفجه دى ..ارعوا بى قيدكم..”سممممحه”_ القوقلة-“اتقوقلوا” فوق محرك( الشمارات قوقل) ..بحثا عن ..محلات الاكل والعيادات و البنوك والصرافات ..بعيدا عن (الزرافات )..ولما تطلع من صرافه او بنك لازم تعمل حسابك الف عشان ما يسحبوا البلف فى غمضة عين (في رمشه عين نشلوك  يا حنين)..وحذارى ثم حذارى من  امتطاء “التوكسات” التكاسى  والمواصلات ذاتن من “قدام” امام البنوك والصرافات وال (ويسترن يونيون)..وحذارى  تقول لى سواق التاكسى انا جديد وغشيم فى البلد دى .. واحفظوا الشوارع حفظ عشان ما “يدودوا ” بيكم ناس التكاسى ..ولازم” تفنقلوا ” عيونكم زى “ريال مدريد ” (الريال ابوعشره )..عشان ما تبقى عليكم حكاية( “فشلونا ” ونهبونا وسرقونا ومن الابطال جندلونا ودحرونا ونشلونا )..وانتوا هناك لا سر يمه لا سر يابا..ولامن تركبوا اى دابه ما تمرقوا رزم القروش نوهائى لازم قبال ما تركبوا تختوا قروش المواصلات على جنبة والسواق اكان اشتكى ليكم وقال ليكم عندى مريض الى نهاية القصيدة انتوا ابكوا ليهو وغنولوا يا حبيبى انا عيان ومعلم الله وغير اجرتك دى ما عندى ..و لو عندى  تعريفه يشيلوها ورا عنقريبى يعنى طمم بطنه-سماسرة الدكاترة (ما يدوك الدرب) ..عايز دكتور امشى احجز براك وفى عيادات اسلامية فى كل انحاء مصر مخفضة وفى كنائس بها عيادات ومستشفيات مخفضة.-تجارة الاعضاء سوقها حار ..تموت انت ويعيش ويلغف القروش غيرك ..واجاركم الله من اسواق البغاء واعملوا حسابكم من مكاتب بير السلم فى كافة انواع الخدمات وخاصة التوظيف بتك امك زوجتك حبوبتك عايزها تنزل تشتغل لازم تكون عارف كل صغيرة وكبيرة عن مكان عملها قبل ما هى تخطى خطوة -وشوية كدى انت محتاج لى محامى اووووعكم “المى حار ولا لعب قعونج “والمحامى عايز شى وشويات ..وهات وهات وهات وفى اخر المطاف حصادك الوجع والندم والآهات