معركة الشرف والكرامة الجزء الأول

معركة الشرف والكرامة الجزء الأول

 أبو رحيق اللحوى

 السودان/عشق البلد

 جيشنا العندو تكتيك في الحروب وجدارة شايفو الليلة مبدع فيها جواً ودارة

بِن دقلو البدور منصف رئاسة وإدارة قايل القصة سوق معزا ونعاج في عدارة

قواتنا البتملك في المعارك قُدرة فيها تلاته تكتيك حرب وخبرة  ونُدرة بالميج

البفرم الحية فرم الخُدرة طاحنة الجنجويد

طحن الدقيق والبُدرة فرساناً بتنصر كلَّ من مقصودة جابو سلاح وعربات

جنجويد محصودة حرقو الهمًّهن هسع بقى المعصودة بالكمية وأيّا ت

حركات مرصودة ناس كباشي واللسد الغزيرة أشنابو دمّرو كافة النهب السريع

وأذنابو يات من قال أنا الفارس المهاب وجنابو جدع الكاكي في الميس الرّبط

دكنابو الجثث المفحمة وإرتجاف القايد الإعلام قعد ما عندو غيرها جدايدو

الجيش المجبَّر وبالغنايم عايد أسقط حسمو تهديدات محمد زايد ناس دقلو القبل

بالدولة قالو بعصفو فقدو القوت ودايرين المعارك تصفو جيشنا الخالي من فعل

الفضايح وصفو شوف تدريبو وإبداعو ومهارة قصفو الخونة القبيل قالو الصُلُح مو طايب أشجعهم رجع من الخنادق تايب الرّفضو السلام والسلمي ماتو كتايب المأتنجَّض أصبح للحدية مطايب بلداً باقية ملجا ضعاف ومول وعيادة ليها حميدتي قال بِحتل مطار وقيادة هرمون التّهوُّر عندو جابلو زيادة ود حمدان دقس كان دارلو فيها سَيادة حسب الفاهمو من تصريحو داك وكلامو قايل القوّة بتحقق جميع أحلامو جيشنا المتفق بين كتلو وإستسلامو دكَّا منظمات دعمو وذباب إعلامو قايل الحربة وجبة مشبّعة ونشوية رفض الخملة مايراجع دفاترو شوية بالضرب المكثّف جولة العشوية غير الأسرى عشرات الجثث مشوية أنتهك البنود وأنحاز ولفّى ودوّر أحمق بس وفيهو بلادة مابتتصوّر إلا أبليسو غشّاهو ودقس وأتهوّر أمَرو يصادم الجيش السلاحو مطوّر الراعي البقول يا نحرر أو نستشهد أدبر جاري والعالم كذالك يشهد البلد العلي جنودها البواسل تشهد أستمتع مواطنها الكريم بالمشهد أمست قالو يوم جاها المغبّي يعاوس الكاتيوشا تلبع والضرب متخاوس البلد الجندوها أبطال وقادة وأشاوس العز عزها المو عاجبو خلو يداوس جيشنا المنو تكتسب الشعوب الخِبرة ماهراً عندو ميات الحلول والدِّبرة قول للقالو تاني بسونا في قد إبرة قواتنا المسلحة فيها ليكم عِبرة يوم عزفو السلاح الكوري والجيرمان خلّا ملابسو في الشقة وطفر عرمان حت عبد الرحيم المدمن الخرمان مكانو المعتقل تاني القصر حرمان دقلو المن زمان مطموس ورايح فِكرو غرّاهو الغرور وضع السلاح فوق حِكرو جهّز خُطّتو ونادا الجماعة وسِكرو غنّت ليهو حكَّامتو البتعرف شِكرو سرق الثروة والمال والشباب والعيش نزحو الناس وفقدو الزاد وسكنو الخيش قول للبنتهك عِنيَة وبقول معليش غُنا الحكَّامة مابقاوم سلاح الجيش مدعوم بالعتاد والفكرة حق وحقيقة من دولاً مجاورة ونعتبرها شقيقة دندن معزف الحرب السلوكو رقيقة عملية إنقلابو أتفشّلت في دقيقة وضعو أنهار وفيهو أحتار وجابلو برودة شاف قِدّامو وادي جهنّم الموْرودة زعزعو نومو فرسان عرضة أم زغرودة ساقو التاتشرات زي الكلاب مطرودة جا الخرطوم وقال لابدَ ما نحررها قول للراعي شوفلك عنز أمش صررها مرتزقاتو جيشنا الواعي مابمررها بعد الضاقو عقب السّاها مابكررها منزوع الرجولة المن عرض متجرِّد أمست دارو باباح والصحافة تغرِّد أفعالو القبيل كان مستفز ومشرِّد أنقلبت عليهو الخاين المتمرِّد وقع الليلة في الطامة البتقطع دابرو هو وحُلفاهو وأيّا مليشة جاية تكابرو جيشو الولَّى هارب والدرب مو خابرو مات محروق وبالشيوَلْ بِحفرو مقابرو قواتنا المناضلة وصادقة ماها مخالفة كم عتقت رهاين من ملايش سالفة قول للنفسو للتدمير وحبو موالفة طُز فيك إت وفي الدوَل المعاك متحالفة في الخرطوم دخل فرس التهوُّر سارجو قام متناطي عكس الموج وفكّا بوارجو بعد الهيمنة العظمى وحزامو الدّارجو فقد السيطرة وكايس طريقة تخارجو بعد الزول أكان راعي وكبير سبّابة دخل الكِنجة مسرع سرعة الهبّابة سالو مناوشات مابسوها غير حبّابة أظن قايل الديمقراطية بالدبّابة فوق عوج المعارك نفسو مابصبِّرها زي مابقولو ود حمدان بدا يكبِّرها ناوي بلدنا بعد اللُّحمة دي يهبِّرها عندو مخططات صهيوني مابدبّرها قصدو يدمر الشعب الظروفو مرازيَة عندو مليشة سافكة الدم وناهبة وغازيَة يات من سالو حركة نهب وقوّة موازيَة حقو تلقِّنو الدولة الدروس الجازيَة قواتنا البترفع عن وطنا بلِيْتو مابصادمها طاغي محرِّشاهو ولٍيْتو حرقت دقلو والأعتاد وباقي خلِيْتو دقّت فيهو مقلب وأحبطت عملِيْتو عندنا جيش قدر ما يقوم ويعلن حربو كان قدامو ذو القرنين وسدو بخربو يوم فرض الزعيم شغل الطواري وضربو ناس خالد سلك وأعوانو قالو يهربو ضربات المدافع وطفحت الكونية فرزت بين كلاب السلطة والوطنية قول للكان مِبيِّت بالخراب النية وين متخارج إلعن أبوك وأبو المدنية بلداً خيرو وافر وما وقف مُغرافو ربي أكفيهو شر ناراً تبق في أطرافو حسب الدين ودستور الوطن وأعرافو نحمي مؤسسات جيشنا ونساند أشرافو يالجيش البقيت من هؤلاء مألَّم الله معاك وليك راينا وزمامنا مسلَّم أهدافك محققة والحدث تتكلَّم أبدِع وأحترف خلّي الجيوش تتعلَّم

/ عثمان الطيب اللحوي/