(حميدتى ولا الجمتى)..والجمع بين راجلين حرام

(حميدتى ولا الجمتى) ..والجمع بين راجلين حرام

استراليا/عشق البلد

-يا الدايرين تقولوا ايه عايزين تقولوا فيا وفى عمودى ..؟قولوا وقولوا قالوا ومهما تقولوا قالوا انا دى  قلبا وقالبا مع جيش السودان  حتى الرمق الاخير (بلا مُزَايَدَات)..!..كسرت ليكم الدش ولا ما كسرتو..؟سمح اللخو البرهان العمى ان حصل ما بتنفع النظارة و السمك الكبار ما بتقبضو السنارة..النصيحه لى الله انا “موغوشة” شوية اى والله الفيديو الظهر فوقه البرهان فى اجتماع من داخل القيادة العامه جهجت  لى باكاتى عديل الكاميرا تلف وتدور وتجيب وشوش المجتمعين “جت”..عدا البرهان شاتتوا فرد متين من بعيييييد .. انا ما بفسروا وانتوا ما بتقصروا ..وصاحب العقل يميز

-بعيد يا اخوانا بتذكر..بعد سودانا ضاق المر.. والخرتوم حريق روما وخراب مالطا ..زمان سنة 2018 “كووووولكم” بى سلامتكم(أَتَّخِذُتمونى  هُزْءًا)..علما باننى لم اكن  عابثة..و اليوم اجد نفسى  مضطرة لاعادة نشر مقالى القديم هذا  طبعا .. زماااان  قلت ليكم وكتبت ليكم تحت “العلوان” اعلاه (حميدتى ولا الجمتى) ..الجمع بين راجلين حرام)مقال طويل وعريض 🙁 ارعوا بى قيدكم حميدتى بدور يبقى ملك على السودان )..بتاريخ 13/10/2018..يعنى قبال  اندلاع شرارة  ثورة 19 ديسمبر 2018 .. بى  شهرين  ويوم واحد فقط ..مافيكم زول “استعبرنى” ولا هببوا لى لامن وقعت الفاس فى الراس..اليكم نص المقال الذى دونه يراعى بتاريخ13/10/2018:(حياكم الحى الذى لا يموت..إن في السماء لخبرا وإن في الأرض لعبراقالوا لى البسى تاج رديت (حميدتاويه) ما بحتاج قيل :النمتى معروف اما الجمتي يطرشنا ما سمعنا بيهو

-انا هــويــدا مــحــمــد الــمــاحــى وقــيــع الله..شديده ولديده ونصيحه ومانى مطوفشه ولا نى مجنونه.. بيدى لا بيد عمرو اخلع عنى الجنسيه السودانيه ..بلا هويه سودانيه بلا وهم ولسان حالى وما أنا منهم بالعيش فيهم ولكن معدن “الذهب” الرغام..ولن ابالى ..وأيقنت أني لا محالة حيث حكم حميدتى طائعة مختاره

-مولاى المفدى جلالة سلطان العصر و( العصِر )..جئت إليك و في راحتي جراح السنين..و أحزان عمر.. وطيف اغتراب..وبين الليالي.. بقايا أماني(جويده)و عبدا بسيده ولا حرا مجهجه..يا حميدتى انا انا يا حميدتى الجنيه الحميدتى عليه صورة مولانا المفدى .. والعاصمه الخرطوم خرطومها (انقده ) …حضارات سادة ثم بادة عاصمة المملكه الحميدتيه تحمل اسم الملك والعلم ذاته في السلك صورة حميدتى بس ..ونشيد (الألم ) مطلعه..يا حميدتى من الحمد اسمك ومن النار سهمك يا سيف السودان (المسلوب)..أمتك (النطيعه) بت الماحى الحميدتيه الحميدتاويه الفقريه وهارون هديه للمحكمه الدوليه..حاملة اول جنسيه من الدولة الحميدتيه هويدا الماحى الفقريه وحميدتى سبب الاذيه

@ الجمع بين راجلين حرام:(قال ليك هنايه ديك (الخريتيم) اتخوذقت واتعولقت اتاريها في ذمة راجلين الأول اللمبى والتانى اللابس البمبى ..واللمبى لا يومى ويومكم دا حلف اكان يرمى عليها يمين الطلاق.. ومكنكش كنكشة بشه قال ليك سيطره تامه على الولايه والغريبه المره دى بالهيمنه والكنكشه ما بالنظر ..قالوا بالنظر بعمى البصر !!)..وقال ليك مكتبه التنفيذي اتاريهم السبعه ججججت من القوات المسلحه وتامنهم هسع القال كلبهم منو (بس)عليكم الشفقه تطير وتقع في البير يا عالم ثامنهم دا الملك سيطره والنفوذ ذاته وعبدالرحيم جايبه من الشرطه بالنظر وعربية الوالى سايقه الوالى القديم عبدالرحيم بى حراستها ..اما الوالى الجديد حاله حال البيت الوقف قال ليك هاشم عثمان مصنقر..في (مكيتب صغنون ) جووه امانة (الحيكومه )المسكين ما عنده سكرتاريه ولا مكتب تنفيذى وهو ذاته مع وقف التنفيذ مخير الله وتاااانى مخير الله و المضحك قالوا من يوم عينه البشير عقد اجتماع و(حيد ومشيحيد) مع ناس النضافه (النظافه) وعبدالرحيم مكنكش في الكنافه ما قلته انا قالته الصحفيه هبه عبد الرحيم يا عبدالرحيم…ويا خرطووووووووووم ..!!

@ من الأرشيف:(الهندى العمبلوق فقد اوتيتها من دَبَرَ ..!!واتياها حمدوك بالعفة والمثابرة..ولا عجب أذا النساء ترجلت ولكن تأنيث الرجال معيب وشوف الخنثك يا الهندى زفت الطين..عندما تتحدث العاهرة عن الشرف ..!!عجى آنى للمتشبه بالرجال النيل من البروف “العلاَّمة” “عبد الله حمدوك”صاحب الرؤيـة الثاقبـة ..تبا لهذا الزمان القبيح زمان ينضح بالقيح وصل انحطاطه ان يتطاول خريج (بالوعة) “حاتم عباسيه” على القمم السوامق والرجال الشوامخ يسألونك عن علامات الساعه و وأشراطها فقل الرويبضى الهندى..تطاول على البروف عبد الله حمدوك الحاصل على بكالوريوس (مع مرتبة الشرف) من جامعة الخرطوم، السودان، وعلى ماجستير و دكتوراه في الاقتصاد من كلية الدراسات الاقتصادية، بجامعة مانشستر، المملكة المتحدة..أيها الهندى :لا غرو أن: “لكل امرئ من اسمه نصيب” الارنب الهِنْديّ تُجرى عليه تجارب طبّيّة كما أجريت عليك التجارب إياها .. يا (عاهه ) اسمك الهندى يعنى منسوب اليها يا زكى شان عصرك اما كان حرى بك يا عار الوطن ان تنتسب اسما الى السودان قبل تجريد اهل السودان من وطنيتهم ؟ لا يعنينى لماذا سميت بهذا الاسم اما كان حرى بك سودنته من (خرم) الديمقراطيه ؟)

@ فرفش اخرها كوم تراب..(زوجة قبل ما تسافر أوصت زوجها يهتم بكديستها ..وبعد أسبوع اتصلت عليه تسلم وتسأله عن الكديسة ..قال ليها :والله الكديسة ماتت ..قامت تكورك و تبگي وتقول ليه حرام عليگ .. وليه قلت لي الخبر مرة واحدة وعارفني ما بتحمل .. گان تقول لي اليوم إنها بتلعب فوق الحيطة .. وبكره تقول لي إنها وقعت من الحيطة وإترضخت .. وبعدا بيوم تقول لي إنها ماتت .. على العموم الله يسامحك ..أها المهم أبوي كيف؟ قال ليها:أبوك بلعب فوق الحيطة !!)

@ نبض العشق السرمدى

مبروووك الممتاز ..غايتو الله يكضب الشينه

يبقى العشق ما بقى الهلال