الدامعة العربية تشرعن وفولكـر يفرعِن

عَبَقُ اَلْوَطَنِ – هُوَيْدَا اَلْمَاحِى

-الدامعة العربية تشرعن الديش وفولكـر يفرعِن

-خمسة عشر رجلا ماتوا من اجل الصندوق و35 اسدا قتلوا من البرهان 

استراليا-عشق البلد

– جيش السودان حبى ليك ولاء ..  اصلو ما بتحول ..ومناى فى الكون  تبقى الجيش الاول ..يا قايد الجيش دى حقيقة بقولها بحى الجيش حتى لو “دبورة”..(جيش بلدك  اكان ضعضعو-و اضعفو -وخربو ..اوعك تلاوى..بعد الحرب تضع اوزارها  غربلو وداوى)

-من ملبورن سلام ..عدد كبير من القراء ظلوا  يسألون ويتساءلون عن احتجاب “عيمودى”..سالت عليكم العافية والله ما منى كل الحصل مامنى لكن الشدشد القوى  انا على فراش المشفى الملكى فى ملبورن”The Royal Melbourne Hospital” لى اسبوعين ونيف..اجاركم الله مبادئى فشل كلوى ..غايتوا قالوا ما بقدروا يعالجوا التلف الحصل حصل لكن ساعيين لتحجيمه يعنى عايزين يلزموا حدوده عشان ما نبقى فى الغسيل الكلوى .

-دردقى بشيش ..(الجامعة العربية  بلا خجل قالت منحت جيش السودان الشرعية ..اجى يا “الدامعة” العربية  من متين بقيتى تخصص شرعنة  فى جيوش العالم ..؟ وانتى فى نفسك الشرعنك ظلمك وشن طعمك غير النوح والعويل والشجب والكضب).. وقالوا القصار طالوا..(فولكر متفسح ومتجدع فى الشرق ..(ودالما مننا)..ولع النار فى الخرطوم ..وجرى يولعها فى الشرق..وبكره فى الغرب وبعدو فى الشمال ثم الوسط )

– سبحان الله حميدتى ومليشياته يشتمون جيش السودان وينعتون البرهان بالانقلابى ..انتوا ذاتكم ما شركاء فى انقلاب البرهان..سمح خباركم كنتوا ساكتين هاك التماهى دا “متماهيين”مع ابرهة الانقلابى ..هسع يادابو بقى ليكم انقلابى وعفن..!!.. الغريبه الانقلاب ما جديد ..وانت النائب وهو الرئيس لو كنت شجبت وادنت الانقلاب ومن السيادى اعلنت الانسحاب  كان زمانك حظيت باحترامنا والاحترام لا يعنى تنصيبك ملكا علينا لانك (لاك ملك ولاك ود ملوك)..يا (السننوك) قريبات دى وما “طعموك” تاريخ التسنين (1/1/1974)

-جيش البرهان رفس النعمة بى كراعه – اى والله _” النعمة بت وراق حليلك”.. و يا ها ذاتها بى ذاتها البقت على قيادات البرهان  :(رسلوها تجيب الداية جات يوم السماية)..المثالية الزايده عن حدها بتتغلب لى ضدها وتصبح “بغيضه”..دا المرجعكم لى ورا..حميدتى اعتقل اسر الابرياء من العسكر والمدنيين رهائن  ودرعوا بشرية ..وروع امن السودان واهله ..شنو البخليكم يا قادة الجيش تأمروا الاستخبارات عقب احتجاز و(الدة حميدتى) ابان هروبها من الفولة الى افريقيا الوسطى على اطلاق سراحها ..؟ هل والدة حميدتى مع كامل احترامنا لكل امهات العالم..اغلى من الرهائن فى محيط  المطار والقيادة ..ولا اغلى من الارواح التى ازهقت والنساء اللائى شردن من منازلهن بملابسهن التى على اجسادهن واحداهن تناشد خلونى انستر ولم يرحموهن ..فى الحرب يابخت من وقع على اسير للمقايضه به ..بدل ما تطلقوا سراح ام “الكفوات” عيال حميدتى كان تتحفظوا عليها اسيرة مقابل تسليم عيالها جت انفسهم للجيش..لو دى كانت امك يا البرهان كان زمانهم الجنجويد “اغتصبوها” وسحلوها سحل .. .. بمنتهى الهدوء ..قولوا :(حميدتى امكم معانا ارضا سلاح سلم نفسك ووقف الجبخانة)..لكن تعملوا فيها ملائكة وتطلقوا سراح (اعظم واغلى )..رهينة دى ما بعملها حميدتى والا لما كان احتجز الاسر رهائن و دروع بشرية ..لو  اطلق سراح النساء والاطفال جميعا وخلى معركتوا مع( الرجال)..كان قلنا رديتوا لو الجميل فوق امه..تفتكروا لو قدر ل”فولوديمير زيلينسكي” القبض على ام “فلاديمير بوتين” كان عتقها ..؟ لا وربى كان استخدمها الورقة الرابحه لاملاء شروطه على الرئيس الروسى ..قسمت بى الله ضربة جزاء جات فى (الاكسترا تايم) فسددها برعونة واهداها لحارس الخصم على طبق من ذهب 

-وسخان القلب م بنضفو الصابون..و إذا كانَ الطّباع طباع سوءٍ فلا أدبٌ يفيد ولاحليب..وجدت أعرابيةً في البادية “جرو ذئب”ولد للتو، فحنّت عليه وأخذته وربته .. كانت تطعمه من حليب شاةٍ عندها ..واصبحت  الشاة بمثابة الأم  للذئب..ذات يوم هجم  الذئب   على الشاة وأكلها ..فحزنت الأعرابية على صنيع الذئب الذي عرف طبعه بالفطرة ..فأنشدت (أكلتَ شويهتي وفجعت قلبي..وأنت لشاتنا ولدٌ “ربيبُ” غُذيتَ بدَرِّها ورَبَيت فينا..فمن أنبأكَ أن أباكَ ذيبُ..؟! إذا كان الطباع طباعُ سوءٍ ..فلا أدبٌ يفيدُ ولا حليب) والمرض الكعب بتسلل فى اوصال البنى آدم  لامن يتمكن منه تب ..وبعد ما يتمكن يعلن الحرب والقتال بينه والانسان المصاب ودكاترة العالم  “جت” ..ليس امامهم سوى  اعلان الاستسلام للداء اللعين ..واحميدتى كذلك والفرق الوحيد حميدتى مكنوا ما اتمكن براهو ولا الله قال..زرعه الرئيس المخلوع فى الخلاء ..لكن البرهان قلوا يا حميدتى تعال فى الضرا وبالباب القدام ما الباب الورا.. مدنه ومكنه فى قلب الخرطوم وبدل يضمه للجيش قال للجيش ارجع ورا..حميدتى وقواته كوووم برا ..حميدتى دا  ما بسألو ولا  بزعلو .. بيت الضيافه بقى بيت الجنجويد رسمى ..ورئاسة العمليات فى كل مكان تحت امرت الجنجويد..ومعسكرات الجنجويد ما تديك الدرب ..لا وكمان البرهان خرجهم من الكلية الحربيه..وقال ليهم تسلحوا واشتروا ماشاء لكم من الاسلحة الفتاكة .. وحرس القصر الجمهورى و المرافق الاستراتيجية كووووولها تحت امرة الجنجويد  بامر البرهان ..وحرس المطار كذلك وحرس البرهان عشية هجوم قوات الدعم السريع على القيادة  الجنجويد من خلفهم وامامهم وهم لا حول لهم ولا قوة 35 من خيرت الضباط استبسلوا وماتوا للحيلولة دون وصول الجنجويد الى عنقرة البرهان ..وهكذا دواليك كل المناطق الحساسه البرهان شال منها “الجياشه” ومكن عسكر حميدتى للامن والحراسه..يعنى سلمهم الجيش تسليم اهالى ولم يبالى بمغبة الامور ..وافتكر انه بى كدا امن نفسه من انقلاب الجيش عليهو وما ادرى انه قدر حرر بذلك شهادة وفاته وموت الوطن الشنيع ومليشايا الجنجويد كان شالوا ما بتشال بى اخوى واخوك وكان خلو خرب الدار ..ولن تخمد الحرب قريباتى  وسياسة النفس الطويل التى ينتهجها الجيش فى الحرب ستكون عواقبها وخيمها ..كل  عشية وصباح ستزهق الارواح وتستباح البيوت وتحرق الاسواق وتنهب المحلات والبنوك والبيوت ..انها  (سياسة الأرض المحروقة)والجنجويد منتشرين انتشار النار فى الهشيم ..لو رفعت مخدتك بتلقى تحتها جنجويدى ..ولو فتحت محفظتك محفظتك شنو ياخ لو قشيت عينك بمرقوا منها الجنجويد ..لذا يتوجب على الجيش تغيير استراتيجية النفس الطويل هذى..بعدين انتوا ناسيين  بيت حميدتى ذاتو جوووه الجك اى والله جوووه القيادة العامة قالوا هو والبرهان جيران بالحيطه هل تصدق حصلت (الزيطة والزنبليطة )..بعد العشاء الاخير ..قاليك اتعشوا مع بعض والحرس ذاتهم اتعشوا مع بعض ..لينقلبوا عليهم فى صبيحة السبت الاسود ..باختصار الجيش ممكون وممحون ومظلوم (ضيعوك وودروك الله ياخد ليك حقوقك ويجازى الظلمووووك ) 

-وحات الله ورسول مكة :(احزاب السودان سبب الخراب..اكان ..شطفوهن وحمموهن وزرعوهن متل “الفتريتى”اللت “الابرى”..حلو مر شنو يمين اكان “كوجنوهن” وعجنوهن متل المريسة شدوهن وصفوهن ما بلحقن مريسة تام زين)..السادة الساخطون على استمرار حرب الخرطوم ..الما بشوف من “الغربال يبقى مريخابى سجمان” ..انتوا عايزين الجيش يعلن الاستسلام ويسلم رقابكم للمليشيات ..؟ وعزت وجلال الله يقطعوا نسلكم بين العالمين ويعدموكم نفاخ النار.

@رحيقك يا وطنى  

أنا امدرمان مضى أمسي بنحسي..غدا وفتاى يحطم قيد حبسي..واخرج للملاء في ثوب عرسي..وابسم بعدما قد طال عبسي ..وأعلن والفضاء يعلن همسي..واهتف و الورى يعرف حسي ..فيا سودان اذا ما النفس هانت
أقدم للفداء روحي ونفسي