عِـشْقٌ سَرْمَـدِيٌّ– هُـوَيْـدَا الـمـاحى-نتوج هلالنا باسعد نهاية

عِـشْقٌ سَرْمَـدِيٌّ– هُـوَيْـدَا الـمـاحى

نتوج هلالنا باسعد نهاية

عشق البلد-القاهرة

@مَأْسَدة هلال القارة الزرقاء عرفت “القارة الزرقاء-بمآسدها”..(آسَادٌ) الزعيم الهلال على مر العصور..

 محل ما تقبل فى وطنا الهلال وطن الجدود تلاقى أسود )..!

@ أرحنا منه يا فلوران..اصبح حملا ثقيلا وهاجسا مؤرقا ..(  ربع الساعه الاخير من عمر المباراة بقى يساوى هدف  للخصم..!)

@المنصة الرقمية (Digital Platform).. (المغصة الرقمية)..(الـمنـصـة لينا والمغصة للمابينا)..!..”العليقى “سيد شباب قارة سمو الهلال ..يوم بفطسلو راسا كبير من مليشيا الجنجويد ..(الفهم فهم والمافهم يسأل المرحوم حميدتى)..خلونا فى الخطى العملية الوثابة نحو العالمية ..كدى قبالدى سيد البلد فايت الكبار والقدرو بى كم سنة ضوئية ..؟..خلونا فى منصتنا ولسان حال الجماعه :”خلونا فى مغستنا”..المنصة زى خدمة الانترت بتلقاها فووق تلفونك الشايلو دا(الوطن الفخيم العظيم سمو  الهلال بين يديك) ..وما اعظم ان تحمل الوطن الهلال بين خافقيك ..وعلى ساعديك..اول التبادى المنصة الزرقاء دى بتلقى فوقها كل حاجى بتخص الوطن الهلال ..ريدتنا ومحبتنا ..ماضينا وحاضرنا ومستقبلنا اخبارنا ومشاريعنا وكورنا..وبدل تحرموا ناس البيت من الفرجه على التلفزيون استادك فوق تلفونك وهلالك ملء جفونك ..فى السفرة وفى المكتب وفى المواصلات وفى المناسبات ..مرتاح بالك وهلالك فى جوالك..ياخ اكان مشيت فى الدفن ما بتفوتك لا شارده ولا وارده عن جلالة سمو الهلال ظنيته المرحوم ذاتو..بكون عايز  قبل ما يدخل ود اللحد يتزود بأخر اخبار الوطن الهلال ..!

@انت السبب انت .. بعد هزيمة ليفربول أمام سانت جيلواز:يورغن كلوب قال:( أنا السبب.. لن أقيم لاعبا بعد تلك المباراة)..برضو ..كلام  عقل ينضح (بالشداعه) والاعتراف بالذنب فضيلة كل ليت المدربين يعون ويغرفون دوما من ماعون (يورغن كلوب).

@ مستوى الزعيم الهلال الفنى المتطور كشف عوار الدورى السودانى ..وضح جليا العلة فى دورينا الما بقدمنا ولا بودينا واخير منه بطولة ابوجيبين “اللت” الكتشينه” .

فى راى الشخصى ويمكن يكون مشاتر ..(اى والله) ..غايتو انا شايفه اداء سمو الحبيب  الهلال لمباريات اسبوعية مع الفرق التونسية التى تكون فى الراحة الاسبوعية احسبه لن يعود على الزعيم بالفائدة المرجوة ..نسبة لان اسبوع الراحه متل يوم العيد..ومافى مدرب حيشرك الاساسيين للتبارى خوفا عليهم من الارهاق والاصابات وهلمجرا..اذا هم البدلاء ونجوم الصف الثانى ولن تتسم بحساسية اللعب التنافسى بتاتا..فما رأى الخبراء عن العائد الفنى اسأل..وماذا عن التبارى  مع الاندية ذات الثقل فى القارة  ..؟ ولا رايكم شنو فى تنظم بطولة  هلالية خالصة فى فترة توقف النشاط القارة ..بمشاركة اندية رنانة وفنانة وبتفيدنا بى امانة خلونا نسميها بطولة (المنصة الرقمية) ..وكمان نطعمها بنجوم العالم “جت” ..!

@ رأت عيناى كلاما” هردبيسا “..فى احدى الاصدارات الالكترونية فيه قدح من ادارة الوطن الهلال ..شى همز وشى لمز وشى بالواضح “الفاضح” ومن جملة الكلام البراوى دا قالوا:(أقمار سمو الهلال قاعدين يغنوا “قروشى شى شى” والمجلس ما صرف ليهم استحقاقات الاشهر الماضية ..سمح شن قولكم ولعيبة  النصر السعودى الفوقه الدون كرستيانو رونالدو “الاسطورة” ما استلموا حتى الآن  مكافآت الفوز في مباريات دوري أبطال آسيا والتأهل إلى الدور الثاني وكمان ما  استلموا  مكافآت الفوز الخاصة بمباريات بطولة كأس خادم الحرمين الشريفين..ولى يومى ويومكم دا “لحدود هسع” ما استلموا الباقى  من مكافأة تحقيق اللقب العربي)كفاكم ولا ازيدكم ..؟

@ لمحات من مباراة عزام الودية:الشوط الاول كان حاجه تمام وتمام تمام ….! والتانى فوقه اكتر من نقطة نظام ..(اى والله) اول التبادى الوديات الغرض منها (واعدوا لهم ) وهى خير الزاد لقادم المواعيد فيها يتم  سبر اغوار الفريق لمعالجة الخلل والاخطاء والسلبيات ..وكم وكم من ودية حررت شهادة ميلاد لاعب من الافذاذ-كدى خلونا فى شوط اللعب التانى “وانسميهو” شوط ابوعشرين ..كان ابوعشرين فريق بى حالو..عينى بااارده ودى ظاهرة صحية..ل”إذكاء روح التنافس” بين الاقمار ..وحتما سيعود ابوعشرين لقيادة العرين حال سنحت له الفرصة(أسد هِزَبر)-

-انتوا  “مسعولين” من الخير ..دحين.. الود اللعاب فوق فريق  عزام دا ..ما ياهو ذتو الكان “مرشحه  الغرايري  للمريخ) ولا تشابه خانات و”اسوم” ساكت ..؟ غايتو اكان ياهو ذاتو بى ذاتو ..الجنا دا الله بحبه حيث ان كون مثلا لو كان “الغرايرى” (غرر بو) ..وكعوج دربو -لاعن جماعة “حميدتى” كان زمانه( انجغم ولا برعى البهايم ونايم فوق حوش الغنم)..المهم الود للعااااب يا هلالاب-مهاجم  سمو الهلال الجديد “لنج ”  الكونغولي (ادم بوسو )..(لا يبوسنا ولا نبوسه) .. يبوس الشباك ويعلى مع الزعيم الهلال عروشه..ما عايزه اطلق الاحكام جزافا لكن (بوسو) البارح لم يقدم ما يشفع له ظنيته “لساتو” ما انسجم .

@نبض العشق السرمدى يا غرام الروح..غزل الكبار البار..غرد عملاق الفن السودانى ابوعفان :زرعنا الامانى .. رويناها شوقنا..وعايشين نأمل تقوم ترمي فوقنا..نسير في ضراها نسير لي شروقنا..نتوج هلالنا باسعد نهاية .. ويبقى العشق ما بقى الوطن الهلال
زرقاء العشق
هويدا الماحى