عِـشْقٌ سَرْمَـدِيٌّ– هُـوَيْـدَا الـمـاحى/ إبينغى يا غرق يا جيت حازمها

عِـشْقٌ سَرْمَـدِيٌّ– هُـوَيْـدَا الـمـاحى

 إبينغى يا غرق يا جيت حازمها

عشق البلد/ القاهرة

@مـربـوحـة يا هلال ..اللخو فلوران..نقاط النجم ما اعظمها .يا غرق…. يا جيت حازمها.. سامعنى يا فلوران ..؟ :و (اللى تغلب بُه العب بُه)..ولكل معركة رجالها..واريتك اكان شفت “كولر” مدرب الاهلى المصرى شن سوى..قدام الاتحاد ..غير جلده وعمل نيولوك ..هذا ما تحتمه عليك مباراة الثأر امام النجم الساحلى نحنا  انخطفن” مننا تلاته نقاط..انت مسؤل عن “إهدارن”..يبقى عندنا فوق رقبتك”اخياتن”توماتن ..التلاتة..تغير استراتيجتك..تغير طاقيتك ..”تجر خيطك”..(“جر الخيط” هو أحد الطقوس المتعلقة بمشايخ الزار)..ما شغلتنا..مطلبنا النقاط كاملات غير منقوصات .

@ مباراة الثأر الى جانب الانصار ..تمنينا ان يجتمع فيها شمل مجلس حكومة الوطن الهلال ..بملعب دار السلام؟

@ دلاقين جده انجغموا يا رجالة ..وناس افراحه زايده (الهلال السعودى) وناس انجغموا..على قدر حزن (دلاقين جده) طغت فرحة جماهير  الهلال السعودي..المهم فى الامر ان الحرب خدعة اجادها مدرب الاهلى “كولر”  عبر تغيير استراتيجية اللعب .. خاصة فى خط الوسط ..”فاستحق الفوز عن جدارة..بعكس المدرب مارسيلو غاياردو” (اب راسا ناشف الما غير ولا التكتح..فوق طريقته النمطية ..فى طريقة اللعب والضحية فريق الاتحاد السعودى الذى لم يشفع له الاستحواذ عن الخسارة المدوية.

@سايقها قوش..تصدقوا وتأمنوا انه تكلفة “عزل -خلع -استقالة” الكومبارس..الكومبارس “ابوجيبين” بلغت 10الف جنيه مصرى..(جابو بالطيارة وباعو بالخسارة)..ياخ خلع الضرس ما ب10 الف ..المهم كان فندق توليب مسرحا لها..وايجار القاعة 10الف (اتـخـاتـتـوهن)..الرشيد مياسم “دفع 3الف ..بدور يقطع عرق ويسيح دم ..ابوجيبين امانة ما “عكليت” اكان ما سولوا كدى “آآآب بمشى” بى اخوى واخوك..وهناى داك(نبيل منير) والعكس صحيح.. قالوا كب الزوغة (عمل زيكو) شرد  من التسليم والتسلم ..وقال ليك صلاح قوش متزعم امر المريخ ويشيل ويرشح فوق رجال القروش الكبار لرئاسة المريخ.

@ مدرب فاركو المصرى ” فركها” والحله حرقها..تمثلت  خطورة فريق فاركو  امام فريق زد..فى ” سيف تيرى وأحمد شريف”..واتقدم فاركو بهدف ..قام المدرب (برونو) نطح فريقه بى (قرنه)..لما طلع (سيف تيرى) غايتو مخير الله فى السينما ( البطل ما بموت) ومع فاركو البطل لازم يموت ..لينتهى اللقاء بهزيمة فاركو..(2/1)..وانا بحاول امرق نافوخى (مرقان) من نظرية المؤامرة فى استبدال تيرى الفنان لانه من “السودان”..ولا ماكدى.؟ بعدين الساقية دى مدورة من سنييين مع اللعيبة المحترفين السودانيين فى الاندية المصرية.

@ القائد الغربال الكابتينة ليست مجرد شارة ..ولا ها فشخرة وبوبار ..الكابتنية يا قائد ابطال الزعيم الهلال ادارة وحنكة وشطارة ..الكابتن ادارى ومدرب ..انت لها كن قائدا ومعلما مرشدا وموجها ومحفزا..كن ملهما..كن بلسما..(اى والله) اطلع بدورك على اكمل وجه .

@ هل اعدت الرابطة المركزية العدة للقاء المصيرى ..؟ يعنى اكان ما لقيتوا ابطال الاولتراس بسبب الحرب والموت والكتل والضرب .. استعينوا بالذكاء الاصطناعى واملوا المدرجات بالاهازيج.

@نبض العشق السرمدى يا غرام الروح.. يا هلال الروح ..مَـا الْـكَـأْسُ لَـوْلَا الْـخَمْرُ غَيْرَ زُجَاجَةٍ..وَالْــمَــرْءُ لَــوْلَا الْــحُــبُّ إِلَّا أَعْــظُـمَـا..ويبقى العشق ما بقى الوطن الهلال
زرقاء العشق
هويدا الماحى