عِـشْقٌ سَرْمَـدِيٌّ -هُـوَيْـدَا الـمـاحى/علاما أقحمت جماهير الهلال إقحاما..؟
عِـشْقٌ سَرْمَـدِيٌّ -هُـوَيْـدَا الـمـاحى
علاما أقحمت جماهير الهلال إقحاما..؟
عشق البلد/القاهرة
@اللهم يا محرر قلعة الوطن الهلال..وصرحه العتيد من قبضة احتلال مليشيا الجنجويد..حرر كل شبر في الوطن العزيز..(ولا نُحالِفُ إلا الله مِنْ أحدٍ غَيْرَ السيوفِ، إذا ما اغْرَوْرَقَ النَّظَرُ أَمَّا العَدُوُّ، فإنّا لا نَلِينُ لَهُمْ حتى يَلِينَ لِضَرْسِ الماضِغِ الحَجَرُ).
@ إِنَّهُ مِنْ هويدا الماحى الى الاستاذ / نصرالدين المحسى
الحمد لله الذي خلق الإنسان، وعلمه البيان..( جماهير سمو الوطن الهلال لا طالبت ولا الله قال) . .ونحن فى غرة شهر رجب “مُنْصِل الأَسِنّـَة” او الأصمّ (كان لا يُسْمَع فيه لا حركةُ قتالٍ ولا قَعْقَعةُ سلاح لكونه من الأشهر الحُرُم)..ولكن لم تحرم فيه قَعْقَعةُ الاقلام لا فى الجاهلية ولا فى الاسلام .. ليتك لم تقحم اساطين العشاق اقحاما فيما ما سطره يراعك دعنا نسميها مناشدة للمجلس لاصطحاب (سيف تيرى) فى قادم التسجيلات..احترم رايك الشخصى (كل زول حر فيما يرى) واختلف مع طرحك جملة وتفصيلا..بادئ ذى بدء ..لماذا الزج بجماهير سمو الهلال ..؟ ومن اين لك قياس الراى لتصدح بان تسجيل تيرى مطلب جماهيرى..؟ ولماذا تسعى الى تحجيم رغبة اساطين العشاق فى ماضى السنون..؟ احسبها ويسبقها احترامى لشخصكم :فلسفة إيحائية..فأنت تريد الفتى (تيرى) ألذى كنا نريده قبل اررربعة أعوام والعالم يتغير فى كسر من الثانية فهل تغير بل تطور اداء “سيف تيرى “عبر تلكم السنون ومن اى النواحى اجبنا يرحمك الله ..؟ حتى تعم الفائدة لنرفع عقيرتنا للمطالبة بقيده في كشوفات سيد البلد..؟ هات تقييمك الفنى اكرر الفنى لمسيرة اللاعب الاحترافيه وعلامات التطور فى ادائه وهل احرازه لهدف يتيم فى شباك الزمالك (الكان متهالك )حينها هو المعيار يا “رجال”..؟ ثمح خلينا نتكلم كورة الهدف اليتيم دا زاتو ما هى مراحل تسجيله يعنى باللغه السودانية الفصحى :(منو الكاتل ومنو المكتول ومنو السلم سودانا الغول ..ويا قلبى لا تحزن) ..منو الصنع الاسست ومنو المررو ومنو الدوره وحوره وكوره ..وكيف خدم اللاعب فريقه طوال عمر المباراة ..؟ وهل تخصص اللاعب فى هز الشباك وما هى محصلة اهدافه طوال عمر احترافه..وما هى إنجازاته خلال (اربعه سنين عاشهم تيرى فى عالم الاحتراف ..؟ (بريدك والريده ظاهرة فى عينيا بريدك والشوق غمرنى وفاض بيا..قول ليا بس كيفن القاك قول ليا آه قول ليا) فى “الفجه” دى ما تفهمنى غلط انا بريد سمو الوطن الهلال)..ثمح انت قول لينا كلنا..هلا حدثتنا عن الطفرة الفنية والاخلاقية فى مسيرة اللاعب الاحترافيه..؟ ثم هل أتاك حديث (أطهر الطاهر )اليومين ديل فى القاهرة وهو يرتاد المقاهى وكيف هى حاله عند مقدمه اليها فى ساعات الصباح الاولى وهو (لـط) للطيش (اى والله)..أنا دى عن نفسى وبحكم تواجدى بالقاهرة منذ اشهر حدثنى اناس كثر ..واخرهم احدى “صويحباته “عندها خلينا نقول مقهى فى حى (الاليزيه)بارض اللواء..تداخلت للدفاع عنه هجوما على مجلس سمو الوطن الهلال الظالم ..حتما لم اتمالك نفسى وجاء ردى عليها: هووووى يا اللخت (اطهر اظلم من ظلم)..حتما لم اكن اعنى ركلة الجزاء قبلة الحياة (هبة اطهر الطاهر للاهلى المصرى)..طبعا (البنيه)السمممحه البتشبه القمره علاقتها بالكوره { كَمَثَلِ الْحِمَارِ يَحْمِلُ أَسْفَارًا }) ..سألتها منو القال ليكى ؟ ردت :”اطهر الطاهر “هو القال لى ظلمونى الأهلة ..قلت ليها ثمح انتى بتعرفى شنو عن ..شروط عقد.. عودة اللاعب إلى صفوف الهلال بل عن ادب الوطن الهلال ألذى لم يحول دون رغبة اطهر عندما قرر (براهو)الاحتراف في مصر .. ولم يراعى حوجة الزعيم الهلال لخدماته وقتها..؟..أجابتني وقد عقدت الدهشة (لقاليقها) لحدود ما بلعت ريقها عشان تطفى الحريقه:(هو يعنى اطهر الطاهر كان محترف فى مصر؟)..أجبتها والله من غير عصر:شوفى يا السمحه لا تتحدثى بما لا تعلمى وبلاش تنصبى نفسك قاضية للنيل من مجلسنا الموقر ..للزود عن حياض اطهر ..وختيها حلقه فوق (اضانك ) واكان ما مقدوده (اخرميها)بى ركلة الجزاء البتقد الواطه..اطهر يا السمحه ظالم لنفسه.. وانا عن نفسى بذلت مساعى للتواصل معه لاجراء حوار صحفى إلا انه لم يرد على مكالماتى ..لم يفاجئني ردها وقتها قالت : (هو نان اطهر فاضى والله العظيم يجينى فى المقهى ساعات الصباح الاولى وهو مشعشع لـط) ما دفع صاحب (الكنتين) الدكان الهلالابى للتدخل بالسؤال: وانتى بتعرفى كيف سكران 😵💫 إجابته( ما هو باين باين فى العيون) والحركات والسكون وانا نضمت معاهو كتير عشان يبطل البسوى فيهو دا .. والباقى باقى..وقد تستغرب الزج بأطهر الطاهر فوق موضوع سيف تيرى ..ولكن على ذلك قيس براك.
المزيد من المشاركات
