عِـشْقٌ سَرْمَـدِيٌّ -هُـوَيْـدَا الـمـاحى/ ورب سمو الهلال

عِـشْقٌ سَرْمَـدِيٌّ -هُـوَيْـدَا الـمـاحى

ورب سمو الهلال

عشق البلد/القاهرة

@..وطنى الهلال زعموا سلوتُكَ.. ليتَهم. نسبوا إليّ المُمكنا..!!..أَيها الزَّاعِمُ مَا تَزَعَّما..؟..أساطين العشاق :جاوبوا انتوا نيابة عنى حد يقدر ينسى نفسو مين ومين بيقدر ينسى نفسو..!

@ افريقيا يا هلال ..ولا تفريط فى نقاط ” بترو أتلتيكو”..6مباريات اعداديه فى مدينة ابها الجبلية ..أحسبهن كافيات لمعالجة السلبيات ..(أخطاء سوء التمركز للاعبي الوسط والدفاع..وانفراط العقد فى الدقائق الاخيره الذى كلفنا كثيرا كثيرا امام النجم الساحلى وغيره).ولا تعنينى نتائج الوديات البته بل المكاسب الفنية 

@ ورب سمو الهلال ....طلباتكم اوامر . .“أسياد “..لو  اهدرتوا (دمه النجس أنا بكتلو)  .. بجغمه بى دم بارد ولن يهتز لى رمش..“ناضمنى” اخويا لى  ..من اسياد البلد “أثار حفيظتَه مقال  لكاتب “ديليقين” شغال يفلق ويداوى..قام (دزاهو ) لى ..قيل:(إن “البغايا” ليس يخجلن..إذا سميتوهن “قحاب”)..!..لكن بينى وبينكم القحاب ولا (الرويجل) الكضاب..!..“النصيبه” دا .. براهو..برجم نفسه بى نفسه.. اما كفاك عزيزى الهلالابى انه فوق عيموده لحس هرطقاته اللت عيموده “السابق..؟ ..اى والله-..جرد عن  لباسا يواري به سوآت(طايوقه) النجس..وهو الذى (قذف) مرشح رئاسة المريخ (الصغيرون)..ثم نكص وعاد على عقبيه..كالعهد به عن ما اقترفته يداه..صحى والله..(الزَّغَارِيطْ بِالْمِحَبَّةْ وِالنُّقُوطْ بِالْغَرَضْ)..والغرض هنى دى اوضح من قرنى الشمس فى البداية جلد “الولد”..بل أنطقه الله بالحق عن هلالية الولد الرشحوا المراريخ لرئاسة ناديهم ..ولم يكن مقصده احقاقا للحق لا وربى بل كانت حركة “وسخه” للفت نظر الوليد “المليونير” اليه..وظنيتهم قالولوا ..:هووووى ها يا انت ها..الجنا..دا ما بشتغل بى (هضربتك) دى الشغله وما بسد حنك بى فرد مليم ..مش لو كشفت حقيقة عشقه وانتمائه للوطن الهلال ..حتى لو طلعتوا ملحد وفاسق و”متل  بل وأعفن واحقر من رئيس الوزراء الفرنسى الجديد (يخسى) عليهو..الملوق دا بدل  ما يعتذر”..”للوليد المليونير “..قعد يبرطم ..:وانتوا يا هلالاب ((أسيادك يا جلف))..قلتوا سيدى الجديد هلالابى ما فلان وعلان وفلتكان كانوا مريخاب..وانا امس كتبت انه هلالابى سيد بلد وما عنده عضوية فى المريخ ..(اجق..اجق..اجق)..ثمح هل ياترى أسيادك الهلالاب  كانوا  قالولك اكتب عمودك الليلل اول اول البارح..ولا كنت مغيب عن الوعى اكان بالسكر ولا بالسكر..😂..ولا يا ربى القلم يكون كتب براهو..وانت بصمت وما اتكلمت..؟..بعدين مافى داعى “للورجغه” دى وشابك “البقرولك” ..(هو نان السوباط ما مريخابى )..اول التبادى فرض ولازما عليك أن تتأدب فى حضرة الوطن الهلال ..رئيس الزعيم الهلال رئيس وطن ما سأل فى اى رئيس..ولما حضرتك تأتى على سيرته يجب أن تغتسل..(أن تتطهَّر)وقع ليك..؟..والهلال يجب ماقبله ..بعدين فخامة رئيس الوطن الهلال..اعلنها مدوية عبر التلفاز :(عمرى ما فكرت يوم ادخل استاد المرحوم ..اجق..اجق..اجق) قالها ولا ما قالها ..؟ هيك عن انه  عنده عضوية يا (عوضيه) والعوض على الله..بينما ..ودالنمير يا الماك “كجركى”..اخضر خضير (يا الماك شبه “كجركى”)..انت بى عظمة لسانك استشهدت واتشوهدت ..وكتبت وصرحت عن هلاليته وعضويته بالوطن الهلال ..(بمناسبة ود النمير..ود النمير — يطلب المنجم من الزوجة العاقر صحنًا من عظام الموتى لتشربه زوجة ود النمير، لكن ما إن يقع المحظور ويشرب زوجها من المعلاق بدلًا منها، حتى يحمل في وركه.)..رئس المريخ الهلالابى النمير.. ماهو اول سيد بلد يقعد فوق راس فريقك و لن يكون الاخير حتما..كنت تبقى “راجل” وتقول للمليونير الصغيرون:سامحنى غلطان بعتذر..لله يا محسنين..لى منحتك انا منتظر ..ولى شحدتك أنا (منفزر)..بس عليك ..على نغمات اغنية فيصل صغير الاخيرة – ( رخيص و نعرفوك و نعرفو دوسيك ).!

@مطر الحزن عاود هطل ..احتسبت امة الوطن الهلال الفريق شرطة/ سيد الحسين عثمان.نائب المدير العام لقوات الشرطة الأسبق..اثر علة لم تمهله..انا لله وانا اليه راجعون.

@مخرجات اجتماع اتحاد الكره عبر تقنية الفيديو ..اهم ما جاء فيها ..(الهلال بطلا للموسم الذى لم يكتمل) اى والله الاجتماع قال:ابقاء الحال على ماهو عليه..وماهو عليه صدارة هلالية خالصه..تانى قالوا: زيادة كشوفات الاندية الى 40لاعب بينهم 10محترفين..وكمان قالوا(الله يكفينا شر قلنا وقالوا)..لكن هم قالوا:دايرين يقدموا طلب للفيفا لمد فترة التسجيلات شهر كامل..دا كووووله كوم وكلام مشاركات المنتخبات الوطنية (جت) تصدقوا وتأمنوا بالله كان كتييير لا بتقرى ولا بتبرى ..ولا يحزنون (المهم الكلام دا كووووله فيهو كلام)

@(يا فار يا فار..ياصغير يا حفار..سيك سيك..ناو ناو..وارتفعت الحراره)..قريت لى فوق اصدارة(الفار) “إعلان تحذيرى ممهور بتوقيع محامى الوطن الهلال “الدرديرى محمد عمر” . توعد باسم القانون المتاجر التى تتاجر بشعار الوطن الهلال ..من اين لها تلكم البضاعه اوليست من  منهوبات المخازن التى حوت الشعار بكميات كبيره..؟..(الله يعوضنا عن خراب واستباحت اوطانا السودان والهلال)..عشاق سمو الهلال اوصيكم ونفسى الحفاظ على ثروات الوطن الهلال ومكتسباته عبر مقاطعة الشراء من “كناتين” دكاكين اللصوص كما اوصانا البيان ..وذات نفس الاعلان طالعته على صفحات الزرقاء اصدارة فخامة رئيس الهلال السوباط..وما يندى له الجبين خلو الموقع الرسمى من ذات الاعلان ..يا قلبى لا تحزن

@نبض العشق السرمدى ..سر البوح يا غرام الروح.. ويبقى العشق ما بقى الهلال  

زرقـاء الـعشق –هُـوَيْـدَا اَلْـمَـاحِى