ركلة جزاء-د.راشد حسن طه..زعل ام العروس يا عليقى

ركلة جزاء
زعل أم العروس يا عليقى
د . راشد حسن طه

عشق البلد

& لست من هواة الكتابة فى الفارغة والمقدودة والظهور اليومي الراتب ككاتب عامود صحفي
& الهينة نحن ما ناسها ولا بنكتب فيها
& لذلك تجدني لا أكتب إلا عندما أجد ما يستحق الكتابة عنه
& فعزيزنا القارئ( الفيهو مكفيهو )
& قدم العليقي استقالته لأنه (زعلان) من كثرة وتعالي الاصوات المطالبة بإقالة( فلوران)
& نقول للعليقي أن الجماهير واعضاء مجلس ادارة الهلال لهم مليار حق بالمطالبة بإقالة فلوران
& طالما أن سيادتو قاعد سنتين ما انجز التكتح للهلال
& ياخى سيكافا غلبو يفوز بيها
& فاز بيها فريق فاز عليه الهلال بالخمسة
& مدرب لا بصمة له فى اداء الهلال
& مدرب فشل مرتين فى الوصول لدور التمانية فى دورى الابطال
& مع أنه لعب فى أضعف المجموعات
& مدرب لا يدرس خصومه ولا فاضي يشاهد لهم مباريات حتى يقف علي نقاط القوة والضعف لديهم
& مدرب جاءته فرصة من ذهب امام صنداونز ليتأهل لدور الثمانية فأضاع الفرصة بإصراره الغريب علي اشراك أفشل اللاعبين
& وحبسه للأفضل على دكة البدلاء
& حتى دخل ياسر مزمل فى اواخر أنفاس المباراة واستطاع أن يقتلع ركلة جزاء من تحت أقدام مدافعى صنداونز
& لتضيع ركلة الجزاء ببلادة فلوران قبل بلادة أطهر
& لو كان فلوران شاطر لأمر عثمان ديوف يومها بتسديد ركلة الجزاء
& لأن ديوف قبل هذه المباراة شارك مع منتخب بلاده فى نهائي بطولة امم افريقيا للمحليين
& وسدد لمنتخبه آخر ركلة جزاء اكسبت منتخب بلاده كأس البطولة
& ولكن فلوران لا يعرف ذلك التقول جايبنو يدرب محمد عبد الرحمن بس
& يا عليقي هوووووى
& أسمعها مني أنا ده
& قولة حق فخذ بها أو تجاهلها فلك مطلق الحرية
& كان راجي فلوران ده يحقق ليك بطولة افريقية (الرمادة فى خشمك)
& وفى خشم الهلالاب
& وفي خشم صحافة اقبض واكتب
& وفى خشم ناس ( يا ريس أديني حق السماية)
& نحن لما نقول ده عوج وده غلط بنقولها من واقع حب لفريقنا
& لا دايرين لينا كوتة جاز ولا غاز ولا بنزين ولا دولار
& لكن هذا زمان الطبالين
& وزمان المصلحجية
& الذين يكتبون لنا الغزل اليومي فى لعيبة (منتهي الصلاحية)
& لاعب باص ما بعرف يلعبوا يفردوا ليهو صفحات الجريدة وكأنه ( مودريتش) أو ( توني ) كروز أعظم ارتكازى وسط فى العالم
& داير تجيب بطولات يا عليقي ومدربك الفاشل ده ارتكازاتو ( أبو عاقلة ) و( صلاح عادل ) و( بوغبا )؟
& ديل التلاتة سنتين وهم سبب الهزائم والخروج من الابطال بقيادة زعيم الفشل مدربهم فلوران
& عاوز تجيب بطولة بمهاجم لا بعرف يراوغ ولا بعرف يسدد ولا عندو بنية جسمانية وطولو نص متر ؟
& وفلوران يلعبوا اساسي كل المباريات
& وكل مباراة جايينا (بتسريحة شعر ) جديدة
& وصحفيي الغفلة الانتهازيين المصلحجية يشيلوا وينفخوا فيهو
& كأنه رونالدو أو ميسي او إمبابي
& ديل (بلعبوا علي) الكورة
& ديل ما بلعبوا كورة
& يا عليقي إنت السبب فى كل ما يحدث للهلال من فشل بسبب اصرارك الغريب على الفاشل فلوران
& ولا يصر علي الفاشل الا من هو أفشل منه
& دحين يا اخوى وكت قدمت استقالتك عشان الناس قالوا ليك مدربك ده فاشل فأحسن تفوت
& والهلال ما واقف عليك
& ولا الهلال بيتلاشي من الوجود عشان انت استقلت
& الهلال حكموهو ناس الطيب عبد الله زعيم أمة الهلال
& حكموهو ناس الامين البرير خريج مدرسة الطيب عبد الله الادارية
& الطيب عبد الله جماهير الهلال احتجت عليه
& ورمته بالحجارة فى لحظة غضب وسال دمه علي جلبابه
& وقال قولته المشهورة( خلوهم . ده حقهم علينا . ولازم نحن نتحمل جماهيرنا فهم يحبون الهلال أكثر مننا)
& إنت قايل الهلال ده تاريخ بدأ بيك إنت يا عليقي ؟
& ما تستقيل وتفوت وتريحنا من فشلك واصرارك علي الفاشل زيك فلوران
& الباب يفوت جمل يا عليقي
& والله الهلال عندو رجال يهزوا ويرزوا
& ما كلموك بعبد المجيد منصور ومجلسه الذي أطلقوا عليه ( مجلس الفقراء)؟ ديل وصلوا بالهلال الي نهائي دورى أبطال أفريقيا فى ١٩٩٢
& ولا كان عندهم طلمبات جاز ولا غاز ولا دولار
& كان عندهم شخصية وكانوا بعرفوا كورة صاح
& وإنت يا عليقي لو بتعرف ( حبة ) كورة كان شلت فلوران ده برة من مباراة صنداونز
& موش تبلانا بيهو سنتين وكل سنة جايب ليك ( لورى) محترفين والمحصلة صفر كبير وسيكافا غالبو يفوز بيها
& إستقيل يا عليقي فحواء الهلال لم ( تعقر )
& و أرحل غير مأسوفا عليك ولا علي ( مشروعك) الفاشل الذى استجلبت له مدرب أفشل منك

حاجة آخيرة :
إنت كان زعلان أنا ماااا بزعل .