💙 ؏ــڜــڦ ڛۜــڔمۘــدۑْۧ هويدا الماحى 💙 وَرُبَّ سُمُوقِ الْهَلَاَلِ سَنَسُمُّهُ وَسَمًّا لَا يُفَارِقُهُ

الاتنين اجناد الهلال ..محال يحصل خصام بين الفاضل والعليقى.!

💙استراليا/عشق البلد💙

💙 جنود الوطن لبوا النداء خاضوا المعارك بالدماء..امدر القديمة امان ..والمهندسين امان عقبال بقية احياء أمدرمان والخرطوم وبحرى كمان وكل ارجاء السودان امان يا الله

💙 يا الحاسدين هلالنا..يا القاصدين دمارنا
شوفوا غيرنا وغير هلالنا..ما رايحين تنالوا “شعرة”
من “لحمتنا” و تلاحمنا وصمودنا ووئامنا
ديل قلبين 💞 عاشقين الهلال
الاتنين أجناد الهلال
والاتنين دنياهم سلام
محال يحصل خصام بين (الفاضل والعليقى).!

💙السوباط يلا  الحق .. الآن حَصْحَصَ الحقّ

قاتل الله” الوشاة” بالمجلس ..ويل للواشي الراشى..سَنَسِمُهُ ورب الهلال
وَسْـــمًا لا يُفارِقــهُ ..كمــا يُحَـزُّ بِحَـمْى المِيسَـمِ النَّجِـرُ (اى والله)
“أجغموها”السوسة البتنخر فوق عضم استقرار الوطن الهلال
قال الله تعالى:(بِالْمُهْتَدِينَ..فَلا تُطِعِ الْمُكَذِّبِينَ..وَدُّوا لَوْ تُدْهِنُ فَيُدْهِنُونَ..وَلا تُطِعْ كُلَّ حَلاَّفٍ مَّهِينٍ هَمَّازٍ مَّشَّاء بِنَمِيمٍ مَنَّاعٍ لِّلْخَيْرِ مُعْتَدٍ أَثِيمٍ عُتُلٍّ بَعْدَ ذَلِكَ زَنِيمٍ)

-قبال يومين فضح الله ستره وذاع أمره وعم القرى والحضر..سعى سعيا حثيثا لذر الرماد في العيون تمويها وتضليلا لأحداث التصدع والانشقاق في مجلس سمو الهلال

وقد تخير وقتا اتجهت فيه الافئدة صوب استهلالية استحقاقات تمهيدى الأبطال فسعى سعيا حثيثا خسيسا خبيثا لإحداث جلبة تصرف الأنظار عن معسكر الاعداد بتونس قبيل مباراة اهلى بنغازي..ليجد ضالته في احد المنتميين للقبيلة الاعلاميه

كما سرب دنسه إلى احدى الإصدارات التى تلقفت الخبر المدسوس  لتقع فى شركه النحس..ما حدا بالصحفي (الماجن)..البحث عن (دوبلير) من بين امة سمو الهلال ليستكتبه..تحت اسمه بقية الدنس ويحمل عنه وزره بين العالمين

فخاب مسعاه…إذا لابد من كشفه وتعريته وكنسه إلى مزبلة التاريخ.

💙 ذاع وعم القروبات وانتشر

ثمح اول التبادى وكتين الامتناع كان بين (التلاتى)  نفر ..منو السربه..الغفر.؟

الخبر مفاده:(اجتماع بين السوباط و الفاضل التوم و الطاهر يونس…مثلث خطير). يعنى  نقول للعليقى غنى (السوباط  نسى العشره واختار سوايا حبيب)..؟ ولا الترتيب للمجلس القادم وما الغايه المنشوده من وراء التسريب؟ بعدين ربما هو اجتماع للصلح بين الطاهر يونس والفاضل التوم ولا ما كدى؟

ويا خبر بفلوس بكره نلقى مشرور في نص الحوش  ومصلحة الوطن الهلال فوق الجميع يموت من مات ويفوت من فات  نحيا ونشوف مخرجات التحالفات

💙 فى بريد العشق

من عاشق سمو الهلال “على عباس ود مقاشى “:-استاذتنا هويدا الماحي سلامي ومودتي لك حقيقة استقالة العليقي مرفوضة نسبة لماظل يقوم به من عمل في خدمة الكيان الهلال ويجب على الرئيس السوباط ان تكون له كلمة في هذا القرار وان كان سبب الاستقالة هي موضوع اقاله فلوران فهي مرفوضة في هذا التوقيت بالذات والهلال مقبل على البطولة الافريقية. علي عباس ودمقاشي.

💙 الاهلى المصرى علم المقولون الادب برباعية نضيفه  احرز وسام ابوعلى هاتريك

💙 كلاسيكو الارض ناس فى السماء ووصيفاب تحت الارض

حقق الملكى ‏الريال 4 انتصارات  وحقق الوصيف “فشلونا” ذات الاربعه انتصارات و لكن الكتوف ما اتلاحقن انتصارات الملكى رسمية والوصيف  ودّية .(واحيا)..خليناكم للوديات🤣

💙 ربع نهائي الأولمبياد مولع نار ..🔥 مصر وفرنسا والمغرب وإسبانيا الباحثه عن التار من المغاربه بعد هزيمة مونديال قطر

💙 هلالاب أساطين العشاق اضحكوا  تضحك الدنيا وتفيض🤣🤣🤣واحده قالت : صحتني  خالتى من الدغش  قومى خال (امنا) مات ماااات ماااات..قومي..
-خالتي مالك خلعتيني..خال امنا منو؟؟
قالت لي محمووود محموود قومي..
خلاص قمتا .. كتبتو انا؟؟والكلمك منو اها؟
قالت لي اتصلو علي ي ي ي اتصلو علي…
-طيب دقيقه استنيني اخش الحمام..دي هجايم شنو ياناس المن الدغش دي🚶‍♀..يلا مشينا ركبنا المواصلات..وفي الحافله تقول لي محمود ده هو ال رباني انا وامك ياحليلو..والله كان حنييييين الله يرحمو.
#وانا بي عيني دي ما شفتو..ظهر لينا خال فجأه وكمان ربي امي وخالتي؟؟..بعد شويه خالتي اتصلو عليها تاني..قالو ليها الزول ده ما مات..غمر وقام تاني
طوالي خالتي طقطقت للكمساري ونزلنا وقطعنا الظلط بالجهه التانيه واشرنا تاني😂
-طيب ياخالتي راجعه مالك خلينا نواصل نطمن علي خالك الرباك ده😂
قالت لي انا فايقه ليهم عليك الله؟مات ابو راجلي ماجوني

هو مادام حي خلاص..وملاحي في النار وبيتي فاتح😅
قمت كلمت  امي بالواتساب امى قالت لي :محمود منو؟؟

الرباني انا؟؟وربا خالتك؟؟

هي خالتك مربيه😂؟؟أقعدي باري فيها كده لمن يجيبو صوركم في الدار ويكتبو تحتها اين ذهب هؤلاء😂😂

💙 ويبقى العشق ما بقى فخامة الوطن الهلال