💙 ؏ــڜــڦ ڛۜــڔمۘــدۑْۧ هويدا الماحى 💙 الْقَطِيعُ وَعُضْوُ لَجْنَةِ التَّطْبِيعِ سَتَهَ وَسَابَعَهُمْ جُرُزُهُمْ

الله لا بارك فى العليقى وفلوران مرقوا العرب من الاولمبياد

💙 استراليا/عشق البلد

إن الله إذا كلّف أعان، فلا تنظر لِثِقل التكليف وانظر لقدرة المعين.”

💙 اجتماع الثلاثى الخطير (فطير والله فطير)

يا جماعة الخير السوباط والفاضل التوم والطاهر يونس كانوا سوا سوا فى شارع الهوى..اتسالموا واتحاضنوا واتقالدوا

وصنقروا مع بعض كانت جلسة صفاء بين الاصدقاء وما بعرفهم اكان قالوا : فنجان جبنه يا بنيه فى المغربيه..ولا اكان شربولهم شاى طبعا استحالة يكونوا قعدوا ساى ..المهم حق الله وبق الله وناس البيت والجيران والحله علهم طيبين والشغل وهاك يا ونسه بريئة لا فيها مؤامرات ولا دنس ولا لغو فى الحديث وما جابوا سيرة العليقى إلا بالخير وظنيتهم ذاتهم ما(طروا) سيرته لانها جلسة صفاء ومحبة  اخوية عفوية يا (تيراب البنية)..على قول المثل الدارفوري:(جرادة في سروال ولا بعضي الا قعادو ولا حلو)

💙 سينازل سيد البلد الهلال عند الخامسه والنصف بتوقيت السودان من مساء اليوم فريق النجم الساحلى في اولى تجاربه الوديه الاعداديه بتونس ..حتما سيجنى الجهاز الفنى ثمارها

من فريق صعب المراس استطاع التعادل مع سمو الهلال

فى ديسمبر 2023 افريقيا فى الوقت بدل الضائع  على ملعب بنيامين مكابا..وعلى مستر فلوران ان يعمل حسابه لعدم تكرار ذات السيناريو لا اعنى مباراة اليوم فهى ودية ولكن مقصدى مباراة الاهلى الليبى بل وكل المباريات التنافسية ويظل الشوط الثانى شوط المدربين “سامعنى يا فلوران”.؟ جرب اليوم وغدا ولحدود آخر المباريات الحبيه من شئت من الكتيبه الزرقاء للوصول إلى تشكيلة المباراة التنافسية المثاليه

بصراحه حراسة المرمى فيها قولان  كتير

والغربال هداف سيكافا بحاجه إلى معالجة سلبياته ودا دور المدرب النصيحه لى الله الغربال ياهو نفس الغربال وين بصماتك يا فلوران وعلى ذلك فقس .

💙 قالوا:السوباط سبب استقالة العليقى

ثمح السوباط سبب  رجوعه من تانى
هو السوباط جاب العليقى  بغلبه يرجعه عن الاستقالة
وبعدين العليقى استقال وين ومتين وقدمها لى مين؟

حبوبه قالت:المصارين فى البطن بتشاكلو

وعادى جدا السوباط والعليقى يتزاعلوا ويتشاكلوا..هم بشر مثلنا.. (لَأُناسًا ما هم بأنبياءَ ولا ملائكة)..عشان ما يحصل بيناتهم عتاب وخصام وما احلى التصافى من بعد التجافى

هم بتشاكلوا عشان مصالح الوطن الهلال والرويبضه بتشتمهم وتنال منهم عشان حرموها من العطايا..ناس يا ريس رسل لى حق موية رمضان

(هو رئيس الوطن الهلال ولا عريس متقدم ليك يا شقى الحال ).؟

ويا ريس رسل لى العيدية ويا ريس

“مرتى” ميرروده وعندها طمام..ويا ريس ما عندنا حق الفطور والعطور  والبخور ودق الزار

ويا ريس الحقنى وافزعنى وامرقنى  من السودان ..شحادين وعينهم قوية

💙 السوباط ابو لى بى وما بحارب المجلس ولا يشخصن القضايا.. امضيت عام باكمله بمصر ..كما يعلم البعض منكم ..والسوباط ..كان (بزور) القاهرة يعنى رايح وجاى..قمت طلبت اجراء حوار اى تحقيق صحفى مع الريس وهذا حق اصيل

ولكن أوصدت  دونى الابواب علما بأننى لم اطلب  منحة مالية

وهم يعلمون ذلك يقينا ولكن ابت عليهم أنفسهم  إتاحة الفرصة لاجراء مقابلة صحفيه حتى عبر تسليمهم الاسئلة لايصالها له

يعنى لا يلاقينى ولا  ألاقيهو (عليك الباقى من باقينا لا نتلاقى لا يلاقينا لا نتلم🤣)..الكلام دا  من شهور طويلة  يعنى لا امبارح ولا الليلة تحديدا طلبت الأمر من زميل صحفى فتحجج بحجج هى  أوهى من خيوط العنكبوت وانا ما سكت  (وتمنّعوا عن مقلتي وتحجبوا)..وابى لى بالحوار وابا وابا وابا لى

المهم دا ما موضوعنا ولكن ضربت به مثلا على اننى 🙅‍♀️

لا اثأر لنفسى ولا ابرر لها الانقلاب على السوباط والمجلس لهذا السبب  وهو ليس على بهين يا زميلى “العزيز”ولكن كل شوكة بمرقوها بى دربها .اى والله

يا شلة الخراب والدمار موتوا بغيظكم وقد كشف الله ستركم وعمايلكم مرصوده وانت يا عضو المجلس المغضوب عليك بى عمايلك دى أوصدت باب الرجعه ابدالدهر

ويا عضو لجنة التطبيع ومعلوماتى عنك من زمان انك كنت وراء موضوع الصور والفيديو لزوم الإبتزاز عليك الله دى عمايل اولاد ناس ..اما وقد تخطاك الاختيار للمجلس وبقيت نسيا منسيا ..

لميت ليك زمرة مقاطيع لمحاربة استقرار الوطن الهلال ومعاك الجرز عضو المجلس المغضوب عليه ..انتوا عارفين عقوبة تقويض النظام هى الإعدام ولا ماكم عارفين .؟

💙 تخطف  حمام الموت الزميل (مصطفى مختار) وادمعى ما زالت سخينة على الزميل طلحة الشفيع وأياما قضيناها في

تنظيم الأصالة والصدارة ما زلت أطراها لانها كانت آخر عهدى  بالسودان ..وان أنسى لا أنسى آخر لقاء جمعني بالزميل الراحل مصطفى مختار كان بمحض صدفة في القاهرة العام

2018..وطغت فرحتنا كالاطفال  ساعة اللقاء وما كنت احسبه سيكون اللقاء الاخير بك “اى والله”..وذهلت اليوم واخى المريخى “اللدود” الزول الجميل  الذى ظلت تسعدنى مناكفاته على مر السنين الدكتور “معاوية دفع الله ” يزف نبأ رحيلك

الجمتنى الدهشه وانا اكاد لا اصدق احقا رحلت إلى دار الخلود..😭 وانا كلما استمعت او رددت

رائعة نزار قبانى (بلقيس يا رجعى ويا وجع القصيدة) تذكرتك يا ود مختار وايامنا فى صحيفة عالم النجوم( انت وانا

نفرح نطير زي الفراش لمكان ..بعيد ما زارو زولا قبلنا)

كنا نتبارى كل يوم   فى الالقاء الشعرى على اوجاع نزار قبانى والزملاء فى صمت مهيب  وبلقيس حاضرة بيننا

وقد خلدها نزار ..ويحى وويح فؤادى على رحيلك اخى وفى القلب حسرة..  يا مصطفى  (نَمْ كنَوْمةِ العَروسِ الذي لا يُوقِظُهُ إلَّا أحَبُّ أهلِهِ إليه، حتَّى يبعَثَهُ اللهُ مِن مَضْجَعِهِ)

تغمدهم الله بواسع رحمته والهمنا الصبر وحسن العزاء

💙 أعلنت رابطة الهلال  بالمنطقة  الشرقيه عن التاسع من الشهر الجارى موعدا للانتخابات بصالة ماس بارك بالفيصلية وفتح باب الطعون حتى منتصف ليل الاربعاء ..كما أفادنى الاستاذ مأمون احمد خالد السكرتير الثقافى للرابطة

💙 تنظيم فجر الغد ..عاجبنى فيك  النظام والمؤسسية

اول التبادى مجاهدات التنظيم مع المجلس المنتخب ومناصرته

فى أوقات الشدة  وآخرها بيان التنظيم لمؤازرة المجلس ضد الهجمة النجسه الشرسه  فى هذه الايام ..ويشهد له انه التنظيم الوحيد الذى اعلن عن انتخاباته حتى تنظيم المجلس لا حس ولا خبر.

💙 العليقى وفلوران الله لا غز فيكم بركة

ياخ معقوله تمرقوا العرب جت من الاولمبياد  زى الشعره من العجين ..!

ما قلت ليكم إسبانيا حالفه تجيب التار والمثل الاسبانى قال :(الما “بسد” بجيب التار أبوه حمار)

وفرنسا سوتها فى الفراعنه قدم الكيشه واجلده

والسبب العليقى وفلوران 🤣

💙 ويبقى العشق ما بقى فخامة الوطن الهلال